Iƹibraniyen
Ṯabrat ɣar iƹibraniyen
Siḏi Arebbi issawaȓ akiḏneɣ s Mmis
1
1 Ḏi zman issawaȓ Arebbi ak ȓejḏuḏ nneɣ s uqemmum n lʼanbiya aṭṭas n ṯwaȓaṯin u s waṭṭas n ibriḏen.
2 Walakin ḏi lʼayyam-a ineggura issawaȓ akiḏneɣ s uqemmum n Mmis iƹni s wenni iy ixḍar aḏ iwareṯ marra ṯimesȓayin u zzayes iy d ixȓeq Arebbi ddunect.
3 Netta ḏ nnur n lƹaḍama n Arebbi ḏ ṣṣifeṯ n ṭṭabiƹa nnes bȓa axeṭṭi. S jjehḏ n wawaȓ nnes iy zi irebbu marra ṯimesȓayin. Wami iḥell ȓmuƹṣiyeṯ n bnaḏem isiṣfa-t, ssenni iqqim x ufusi n Arebbi Subḥana wa Tƹala.
Lƹaḍama n Mmis n Arebbi x lmalaʼikaṯ
4 Fa Mmis iḏweȓ netta imɣar aṭṭas x lmalaʼikaṯ ȓaḥeqqac isem nni iy ḏas iswareṯ Arebbi imɣar aṭṭas x yisemawen nsent.
5 Arebbi, ƹemmarṣ war ḏas inni i can n lmalak zi lmalaʼikaṯ qa cek ḏ Mmi, nhara ḏewȓeɣ nec ḏ Babac.
Ƹemmarṣ war inni x can n lmalak qa nec aḏ iȓiɣ ḏ Babas, netta aḏ yiȓi ḏ Mmi.
6 U ƹaweḏ wami d itawi Arebbi Mmis amenzua ɣar ddunect-a iqqar aḏas sejjḏent marra lmalaʼikaṯ.
7 Xmi issawaȓ x lmalaʼikaṯ iqqar:
<Ixeǧeq-d lmalaʼikaṯ nnes ḏ arriḥ,
imsexxaren nnes ḏ ḥaḏuq n ṯmessi.>
8 Walakin x Mmis iqqar ḏi Lkitab:
<Ay Arebbi, ȓƹarc nnec aḏ idum i ȓebda n ȓebdaṯ,
ȓḥaqq aḏ yiȓi ḏ ṯaɣriṯ n ȓeḥkam nnec.
9 Tḥibbiḏ min iṣeȓḥen, tƹiffiḏ ccerr.
X manaya Arebbi iƹni Arebbi nnec,
iḏhen-ac s zziṯ n ȓefraḥeṯ,
isiȓi-c ḏeg ujenna x imƹacaren nnec.>
10 Iqqar ƹaweḏ: <Ay Arebbi, ḏeg umezwaru ṯserseḏ dsasaṯ n ddunect u ṯeggiḏ ijennaṯenb s ufus nnec.
11 Yina aḏ fnan cek aḏ tdumeḏ,
marra aḏ rcan am warruḍ.
12 Aṯen tetwiḏ am uzeǧab ḏ axarṭiṭ,
aḏ twabeddȓen am warruḍ.
Cek lla, war tbeddiȓeḏ ca,
iseggwusa nnec ƹemmarṣ aḏ qḍan.>
13 Iwa ƹemmarṣ war inni Arebbi i can n lmalak zi lmalaʼikaṯ: <Qqim-d x ufusi inu aȓ ɣa ggeɣ ȓƹaḏyan nnec swadday iḍaren nnec.>
14 Lmalaʼikaṯ, min ƹnant? Niṯenti ḏ arruḥaṯ twassekkent-id bac aḏ sexxarent i yinni iy ɣa iwarṯen asenjam.