Yaƹqub
Ṯabrat n Arrasul Yaƹqub
Arrasul Yaƹqub itseǧam x ȓmuminin
1
1 Nec ḏ Yaƹqub ḏ ȓƹabḏ n Arebbi ḏ ȓƹabḏ n Siḏiṯneɣ Ƹisa Lmasiḥ, tseǧameɣ x ṯenƹac n ṯqebbaȓ n ȓmuminin iy itemzeǧaƹen ḏi ṯmura.
Lʼiman ḏ ȓemḥayen
2 Ay ayṯma, farḥem aṭṭas xmi ɣa ṯiȓim ḏi ȓemḥayen.
3 Kenniw ṯessnem marra ȓemḥayen-a iy ṯseƹḏum ƹlaḥsab lʼiman nwem tawint-id ṣbar.
4 Wa labud ṣbar aḏaywem ikemmeȓ cɣeȓ nnes, ḥima aḏ temɣarem aḏ tƹemmarem s lʼiman war ṯneqqṣem ca uȓa ḏ ij n ȓhajeṯ.
5 Meȓa can yijjen zzaywem itxeṣṣa-yas ȓefhameṯ, aḏas t ittar i Arebbi netta aḏas t yuc. Minzi netta ifassen nnes rezzmen, war itḥeggar ḥadd.
6 Walakin itxeṣṣa-yas aḏas ittar manaya s lʼiman bȓa ma aḏ icekk minzi wenni itcekkan netta am ȓmujeṯ n ȓebḥar ishaja-t arriḥ itawi-t itarra-t.
7 Bnaḏem-a war itxeṣṣi ca aḏ ifekkar belli Siḏi Arebbi aḏas yuc can ȓḥajeṯ.
8 Itcekka, kuȓ ȓaƹqeȓ nnes min ḏas iqqar menbaƹd itḏewwax ḏeg ibriḏen nnes marra.
9 Fa itxeṣṣa-yas i ȓmeskin ig yumnen aḏ iftaxar wami ṯ isgaƹƹeḏ Arebbi.
10 Walakin ttajar ig yumnen aḏ iftaxar wami ṯ isehwa Arebbi, ƹlaḥeqqac ttajar amecnaw nwar ḏi arbiƹ war itdummi ca.
11 Taȓi-d ṯfuct ṯejheḏ tsazzaɣ arbiƹ, iweṭṭa nwar nnes itraḥ zzin nnes. Ammu iy ḏas itewqiƹ i ttajar, netta itisraw axmi itegg cɣeȓ nnes.
12 Ssaƹḏ n wenni iṣbaren ḏi ȓemḥayen minzi xmi ɣa injeḥ aḏ iysi ttaj n ṯudarṯ iy zi iƹaheḏ Arebbi yinni ṯ itḥibban.
13 Meȓa itwaɣarr can yijjen, war iqqar ca qa ḏ Arebbi iy ḏayi itɣarran. Minzi Arebbi war itɣarri ḥadd, Arebbi war itwaɣarri ca s ccerr.
14 Netta bnaḏem itwaɣarra ḏi ssabab n ccehweṯ nnes ṯaƹeffant iy ṯ itjarran iy ṯ ixeddƹen.
15 Ssenni wami ccehweṯ ṯeysi aƹeddis ṯurew-d ȓmuƹṣiyeṯ, ṯemɣar ȓmuƹṣiyeṯ-a uca ṯejja-d ȓmewṯ.
16 War xeddƹeṯ ca ixef nwem ay ayṯma iƹizzen inu.
17 Marra ṯimuca ṯiṣebḥanin ḏ ȓehdiyaṯ ikemȓen tekkent-id niṯenti zeg ujenna, tasent-id zi Arebbi babas n nnur. Netta war itbeddiȓ ca, maci am ṯiȓi ig igguren.
18 Wami ixes netta, neccin yarra-aneɣ ḏ ṯarwa nnes iy d ixȓeq s wawaȓ n lḥaqiqa ḥima a niȓi neccin ḏ imezwura zi min d ixȓeq.
Wenni itṣennaṭen ɣar wawaȓ n Arebbi ixeṣṣa aṯ igg
19 Cuf ay ayṯma inu iƹizzen, ḏ amezwaru itxeṣṣa kenniw kuȓ ijjen zzaywem aḏ itsȓa aṭṭas, itxeṣṣa aḏ ifekkar qbeȓ ma aḏ issiweȓ, itxeṣṣa war itƹaṣṣib bu ḏeɣya.
20 Minzi aƹeṣṣeb n bnaḏem war d isiwwiḍ ca min iǧan ḏ ȓḥaqq ɣar Arebbi.
21 Beƹƹḏeṯ x marra min iǧan ḏ aƹeffan ḏ marra min iǧan ḏ ccerr. Qebbȓeṯ bȓa ttakebbur awaȓ nni n Arebbi itwaẓẓun ḏaywem ḥima aḏ isenjem nnefs nwem.
22 Fa maci aḏ tesȓem i wawaȓ n Arebbi u ṣafi. Lla, itxeṣṣa-kenniw azzayes ṯxeddmem ḥima war ṯxeḏƹem ca ixef nwem.
23-24 Maṯalan, ijjen ixezzar aɣembub nnes mliḥ walakin ḏi ṯisiṯ. Wami ixzar mliḥ ixef nnes, menbaƹd iruḥ ittu ḏeɣya mammec iǧa. Ammu ig iǧa wenni itsȓan i wawaȓ n Arebbi war zzayes ixeddem ca.
25 Walakin wenni ixezzaren ḏi ccariƹa ikemȓen ṯenni iy ḏayes lḥurriya, iteṭṭef ḏayes war itettu ca min itsȓa ixeddem zzayes, ataf azzayes yawi lbaraka ḏi min itegg.
26 Wenni itfekkaren belli netta itbaƹ ddin walakin netta war iḥeṭṭi bu yiȓes nnes, qa ixeddeƹ ixef nnes, itwaḥasab war ɣares bu ddin.
27 Ddin iṣfan inqan ɣar Arebbi Babaṯneɣ ḏ wa iƹni itraḥ bnaḏem ɣar yujiȓen ḏ ṯajjaȓin ḥima aṯen iƹawen ḏeg uzeyyar nsen, aḏ iḥḍa ixef nnes bac war ṯ twessix ca ddunect.