Ȓuṣiyaṯ ṯineggura
13
1 Qqimem aḏ tḥibbem ayawya am wawmaṯen.
2 War tettuṯ ca aḏ treḥḥbem zi midden minzi ȓebƹaḍ iy ggin manaya reḥḥben zi lmalaʼikaṯ bȓa ma ṯent ssnen.
3 Xemmmeṯ x imeḥbas amecnaw akiḏsen iy ṯetwaḥebbsem, u ḏ yinni itwabuṣaren amecnaw ḏ kenniw itwaƹeddaben.
4 Weqqareṯ ȓemȓac marra. Qama n ȓemȓac aḏ tiȓi s nniyyeṯ mbȓa ȓɣedȓan. Aqa Arebbi aḏ iƹaqeb yinni ifessḏen ḏ yinni izennan.
5 Aḏ tƹicem bȓa ma aḏ tḥibbem tmenyaṯ, aḏ tqenƹem s min ɣarwem. Arebbi s yixef nnes inna-awem qa ƹemmarṣ ac jjeɣ, ƹemmarṣ aḏayek semmḥeɣ.
6 S manayenni neqqar s zƹameṯ qa Siḏi Arebbi itƹawan-ayi, war iǧi ca bac aḏ ggwḏeɣ. Min ḏayi ɣa igg bnaḏem?
7 Ƹeqȓeṯ x yinni xawem itrayyan iƹni yinni issiwȓen akiḏwem s wawaȓ n Arebbi. Fekkareṯ ḏi min urwen ḏi ṯuḏarṯ nsen uca ggeṯ mammec ggin niṯni s lʼiman nsen.
8 Ƹisa Lmasiḥ netta ḏ ijjen, amecnaw iḍennaṭ amecnaw nhara amecnaw ȓebda.
9 Arrem-d ȓbaȓ nwem bac war tḏeffarem ca lʼanwaƹ n ṯɣuri feckel.
Cuf, ḏ lemliḥ aḏ ijheḏ wuȓ nneɣ s arḍa maci s lmakla zaƹma ddiniya, yinni iy t itetten war zzayes stenfiƹen ca.
10 Neccin ɣarneɣ ijjen n ȓmeḏbaḥ, u zi ȓmeḏbaḥ-a war ɣarsen ca ȓḥaqq azzayes ccen yinni ixeddmen ḏeg Uqiḍun Ameqqran.
11 Liʼanna ȓefqih ameqqran itawi-d akiḏes iḏammen n lḥayawanaṯ ɣar Uxxam Amqeddes Aṭṭas amecnaw ḏ ijjen n ṣṣeḏqeṯ x ȓmuƹṣiyeṯ, walakin lḥayawanaṯ nni immuṯen sḥarraqen-ṯen barra n mani qqimen yiwḏan ḏeg iqiḍan nsen.
12 Ammu ƹaweḏ Ƹisa, ṯekka xas tamara nni ɣar barra n ṯewwarṯ n ṯendint bac aḏ isiṣfa ccaƹb s iḏammen nnes.
13 X manaya a nraḥ ɣar Ƹisa ɣar barra n iqiḍan a narbu aḥeggar nni iy xef iṣbar netta.
14 Minzi ḏanita war ɣarneɣ bu ṯendint itduman. Lla, nrezzu x ṯendint nni iy d ɣa yasen.
15 Iḏen labud s Ƹisa iy zi ɣa neḥmeḏ Arebbi ḏi mkuȓ ȓweqṯ. Ḏ ṯanita ḏ dbiḥeṯ iy ɣa nqeddem i Arebbi, iƹni meȓa neƹtaref s yisem nnes.
16 U war tettuṯ ca aḏ teggem ȓxir aḏ tcarcem ak inneɣni minzi s dbiḥaṯ-a am ṯina iy ḏas iteƹjiben i Arebbi.
17 Ṭaƹeṯ i yinni xawem itrayyan, ggem-asen array minzi ḏ yinni ig iḥeṭṭan ȓaƹmar nwem. Aḏ ucen niṯni ȓeḥsab x manaya i Arebbi. Ṭaƹeṯ i yina bac ȓxeḏmeṯ nsen azzayes farḥen maci axasen ṯbesseȓ. Meȓa ṯeggim ṯaɣennant, ataf war kenniw ineffeƹ walu.
18 Ttareṯ i Arebbi xaneɣ. Aqa neccin metʼakeddin belli ḍḍamir nneɣ mertaḥ, nrezzu a nexḏem s ȓeḥya ḏi marra ṯimesȓayin.
19 Tettareɣ-awem xaṣṣatan s wuȓ inu aḏ teẓẓaǧem bac ḏeɣya aɣarwem d ḏewȓeɣ.
Lxitam n ṯebrat-a
20 Arebbi ḏayes ȓehna, ḏ netta iy d yarrin Siḏiṯneɣ Ƹisa zeg imettinen s iḏammen n ȓƹaheḏ itduman i ȓebda, Ƹisa-ya ḏ Ameksa Ameqqran n iḥuȓiyen.
21 Aḏawem iḏebbar Arebbi marra ṯimesȓayin ṯiṣebḥanin bac aḏ teggem ȓxaḍar nnes. Aḏayneɣ ixḏem min ḏas iteƹjiben zzaṯes, s Siḏiṯneɣ Ƹisa Lmasiḥ umi ɣa ṯiȓi lƹaḍama i ȓebda n ȓebdaṯ. Amin.
22 Fa ay ayṯma tettareɣ-awem aḏ teṣbarem i wawaȓ inu iy zi kenniw tweṣṣiɣ minzi uriɣ-awem-d ɣir ṯabrat-a ṯamezyant.
23 Itxeṣṣa aḏ tessnem belli ḍeȓqen-as-d i wumaṯneɣ Timuṯawus. Akenniw ẓreɣ akiḏes iƹni qa meȓa yusa-d ḏeɣya.
24 Siwḍem-asen sȓam i marra yinni iy xawem itrayyan ḏ marra ṣṣaliḥin. Yina zi Iṭalya tseǧamen-d xawem.
25 Akiḏwem yiȓi arḍa marra iḏwem.