Siḏiṯneɣ Ƹisa ḏ zzaƹim nneɣ u Arebbi ḏ Babaṯneɣ
12
1 Iḏen ƹlaḥsab niṯni, iƹni ȓechuḏ nni n lʼiman iy xaneɣ itennḍen am yijjen n umuni ḏ ameqqran, labud a nekkar a nekkes kuȓ dqeȓ ḏ kuȓ ȓmuƹṣiyeṯ iy ḏaneɣ iseḥṣaren. A nazzȓeṯ s ṣbar ṯazzȓa nni iy ḏaneɣ itrajan ɣar zzaṯ.
2 Labud a nxezzar mliḥ ɣar Ƹisa zzaƹim nneɣ ḏ wenni iy ḏaneɣ ɣa isiwḍen nican ɣar uneggaru. Ƹisa, s ȓefraḥeṯ nni iy tuɣa ṯ itrajan ɣar zzaṯ, iṣbar x ṣṣalib iƹni iƹeyyeb aḥeggar n ṣṣalib nni ssenni iqqim x ufusi n ȓƹarc n Arebbi.
3 Fekkareṯ mliḥ ḏi Ƹisa, mecḥaȓ iṣbar netta x cmayeṯ iy ḏas iƹarrḍen bac kenniw war tiḥȓem ca war tefciȓem ca.
4 Wami ṯmenɣem ḍed i ȓmuƹṣiyeṯ, war ṯƹirrḍem ca bac aḏ azzȓen iḏammen nwem lla.
5 U kenniw ṯettum awaȓ nni zi Lkitab iy kenniw ɣa icejjƹen, issawaȓen akiḏwem am ṯarwa nnes inna-awem:
<A mmi, war tqehhar ca ttarbiya n Siḏi Arebbi,
war tefciȓ ca meȓa netta inha-cek.
6 Minzi Siḏi Arebbi itrebba wenni xas iƹizzen,
inehha wenni iy xef yarḍa itwaḥsab ḏ mmis.>
7 Ṣbareṯ x ttarbiya n Arebbi, itegg-awem am ṯarwa nnes. Min iƹna mmis-a war ṯ itrebbi ca babas?
8 Yac marra iwḏan twarebban niɣ? Maƹlik war kenniw irebbi ca Arebbi, ataf kenniw am ṯarwa n ḥram, maci ḏ ṯarwa n lḥalal.
9 U ƹaweḏ neccin marra tuɣa ɣarneɣ lwalidin ḏi ddunect-a iy ḏaneɣ itrebban, neccin netseḏḥa zzaysen. Iwa neccin meȓa a neddar, ataf a nseḏḥa zi Babaṯneɣ n ujenna ktar niɣ lla?
10 Cuf, lwalidin trebban-aneɣ ḏeg yijjen n ȓweqṯ, ggin mammec ḏasen itɣiȓ mliḥ. Walakin Arebbi itrebba-yaneɣ i nfaƹ nneɣ bac a ncarec ḏi ṭṭabiƹa nnes iǧan ƹaḍim.
11 Ḏi ȓweqṯ nnes kuȓ ttarbiya tɣiȓ-aneɣ ṯeqseḥ maci ḏ ṯaṣebḥant. Walakin menbaƹd aḏ tarew ij n ṯfeǧaḥṯ n ȓxir ḏ ij n ȓehna i yinni iy t ɣa iȓemḏen.
12 X manaya sjehḏeṯ ifassen nwem irxun ḏ ifadden nwem ifecȓen.
13 Seggḏeṯ ibriḏen nwem nican bac iḍaren nwem izeḥḥafen war tɣimin ca ḏ ineƹḏam, aḏ genfan.
Abriḏ n ȓmuminin
14 Ggeṯ lmejhud bac aḏ tƹicem ḏi ȓehna ak marra iwḏan u bac aḏ tiȓim ṯeṣfam. Bȓa ȓeṣfiyeṯ war ḏinni ḥadd i ɣa iẓren Mawlana.
15 Arrem-d ȓbaȓ nwem bac war itɣimi ḥadd war ixeṭṭeȓ ɣar arḍa n Arebbi, niɣ ƹaweḏ war iɣemmi can n uẓwar ḏ amerzag aḏ igg lmacakil aḏ iḍeyyeƹ aṭṭas n yiwḏan.
16 Arrem-d ȓbaȓ nwem bac war itegg can yijjen zzaywem lfasad, niɣ can yijjen war ɣares itiȓi bu Arebbi am Ƹasu nni iruḥ netta izzenz ȓḥaqq nnes zi lbaraka n babas x yij n uṭebsi n lmakla.
17 Aqa ṯessnem menbaƹd wami irezzu Ƹasu aḏ iwareṯ lbaraka nni yugi-yas babas. War yufi mammec tid ɣa yarr waxxa itṭalab-as-t s imeṭṭawen.
18 Cuf, kenniw war ṯqarrbem ca ɣar yij n uḏrar iy ɣa tḥaḏam s ufus, iƹni am uḏrar nni iy ḏayes ṯimessi ṯḥeddeq ḏayes ṯaǧest ḏayes ṯubarcant ḏayes arriḥ aṭṭas.
19 Iteffeɣ-d zzayes ijjen n ṣṣut n zzammar ḏ ijjen n ṯmijja ṯessawaȓ awaȓen isaggwaḏen i yinni ḏas itsȓan, tettaren war ḏasen ṯeqqar bu can n wawaȓen nneɣni.
20 Minzi niṯni war zemmaren aḏ ṣbaren i min ɣa ṯini, iƹni meȓa waxxa iḥaḏa can n lḥayawan aḏrar nni ataf labud aḏ itwarjem s uzru.
21 Min twaȓan ḏinni isaggwaḏ aṭṭas, ḥetta ḏ nnabi Musa inna aqayi terjijjiɣ s ṯiggwḏi.
22 Walakin kenniw ṯqarrbem-d ɣar Uḏrar n Ṣiyun ɣar ṯendint nni n Arebbi iddaren iƹni Lquds n ujenna, ḏayes aȓef n uȓufat n lmalaʼikaṯ.
23 Ṯqarrbem-d ɣar yinni itmunen ḏi ȓefraḥeṯ iƹni ɣar jmaƹeṯ n yinni ixḍar Arebbi iy d ixeȓqen ḏ imezwura itwazemmen ḏeg ujenna. Ṯqarrbem-d ɣar Arebbi iy iǧan ḏ ȓqaḍi x marra iwḏan. Ṯqarrbem-d ɣar arruḥaṯ n ṣṣaliḥin iy ḏewȓen bȓa ȓƹib.
24 Ṯqarrbem-d ɣar Ƹisa wenni itcafaƹen ḏayneɣ s yijjen n ȓƹaheḏ ḏ jḏiḏ. Ṯqarrbem-d kenniw ɣar iḏammen nnes itwaruccen iy qqaren ijjen n wawaȓ ḥsen zeg wenni n nnabi Habil.
25 Arrem-d ȓbaȓ nwem war tjehiȓem ca awaȓ n wenni issawaȓen. Mayemmi? Liʼanna Ayṯ-Israʼil war feȓṯen ca wami jehȓen awaȓ n wenni tuɣa ṯen iweṣṣan ḏi ṯmurṯ. U neccin ktar ƹaḏ, ƹemmarṣ a nefȓeṯ iƹni meȓa nugi i wenni ḏaneɣ iweṣṣan zeg ujenna.
26 Ḏi ȓweqṯ nni iƹḏun ṣṣut n Arebbi isenhezz ṯamurṯ, walakin ȓexxu iwƹeḏ iqqar qa ƹaḏ ijjen n ȓweqṯ nneɣni nec aḏ senhezzeɣ ṯamurṯ ḏ ijennaṯen uȓa ḏ niṯni.
27 Awaȓ nni nnes iƹni <ƹaḏ ijjen n ȓweqṯ nneɣni> issawaȓ x ṯmesȓayin itenhezzan ataf niṯenti aḏ twakksent iƹni ḏ ṯimesȓayin nni iy d itwaxeȓqen bac ṯimesȓayin nni iy war itenhezzin ca ataf aḏ qqiment.