Lʼiman ḏ yinni iy zzayes itƹicen
11
1 Fa lʼiman netta ḏ ijjen n ttiqeṯ ijehḏen ḏi min netraja, neccin metʼakkadin ḏi ṯmesȓayin waxxa war ṯent netwiȓi ca.
2 S lʼiman iy twacekkaren iwḏan n zman.
3 S lʼiman iy nfehhem qa ddunect ṯetwaxȓeq-d s wawaȓ n Arebbi bac min ḏayes netwaȓa war d ikki ca zi min d itbanen.
4 S lʼiman ikkar nnabi Habil iqeddem ijjen n dbiḥeṯ iy zi xas yarḍa Arebbi ḥsen zi ṯenni n wumas Qabil. Ƹlaḥsab lʼiman nni itcekkar-iṯ Arebbi iqbeȓ-iṯ netta nican wami xas issiweȓ Arebbi mliḥ x min iqeddem. U nnabi Habil s lʼiman nnes ƹaḏ issawaȓ waxxa immuṯ.
5 S lʼiman ikkar nnabi Axnux itwaxḍef ɣar ujenna ḥima war itwiȓi ca ȓmewṯ. War ṯ ufin ca, iysi-ṯ Arebbi ɣares. U qbeȓ ma aḏ itwaxḍef itwacekkar am yijjen iy xef yarḍa Arebbi.
6 Iwa war izemmar ḥadd axas yarḍa Arebbi bȓa lʼiman. Minzi wenni iy ɣa iqarrben ɣar Arebbi u labud aḏ yamen belli netta iǧa u ḏ netta ig itjazan yinni iy xas irezzun s wuȓawen nsen.
7 S lʼiman nnabi Nuḥ wami ḏas iƹȓem Arebbi x ṯmesȓayin war ṯent ẓrin ƹemmarṣ, ikkar netta s yijjen n ṯiggwḏi ḏ yijjen n ȓeḥya igga aɣarrabu bac aḏ isenjem ayṯbab n ṯeddarṯ nnes.a Wami igga manayenni netta iƹeyyeb ddunect, iwareṯ ṣṣulḥ nni iy d itasen s lʼiman.
8 S lʼiman ikkar nnabi Brahim iṭaƹ-as i Arebbi wami ḏas d iȓaɣa aḏ iraḥ ɣar yijjen n umcan iy ɣa iqbeȓ ḏ lwareṯ. Iffeɣ netta tuɣa war issin ca mani ɣa iraḥ.
9 S lʼiman iruḥ netta izḏeɣ ḏi ṯmurṯ nni iy ṯ iwƹeḏ, netta aqaṯ ḏinni am ca ubarrani. Itƹic ḏeg iqiḍan akiḏes memmis Isḥaq ḏ wayyaw nnes Yaƹqub, twaraṯen akiḏes ƹlaḥsab min zi ṯen iwƹeḏ.
10 Ȓaḥeqqac Brahim itraja ṯandint nni ɣar ǧan dsasaṯ itduman, ixaṭṭ-it Arebbi ibna-t.
11 S lʼiman Sara s yixef nnes immuc-as jjehḏ bac aḏ teysi aƹeddis waxxa nettaṯ ṯnumɣar, minzi ṯekkar nettaṯ ṯḥesseb belli wenni iy t iweƹḏen x manayenni ḏayes ttiqeṯ.
12 Ṯumma zi Brahim iƹni ḏ ijjen n uryaz iwsar ikemmeȓ, ijja-d ddurriṯ am yiṯȓan iǧan ḏeg ujenna, ḏ ijjen n ddurriṯ am yijḏi iǧan x cceṭṭ n ȓebḥar war izemmar ḥadd aṯen iḥesseb.
13 Yina marra mmuṯen ḏi lʼiman nni nsen qbeȓ ma ḏasen d awḍent ṯmesȓayin nni iy zi ṯen iwƹeḏ. Walakin ẓrin-ṯent reḥḥben zzaysent zi ȓeggwaj, ƹtarfen belli niṯni ḏ ibarraniyen ḏ iƹezzaben ḏi ṯmurṯ-a.
14 Iwḏan iy ssawaȓen ammu itban-d belli rezzun x yijjen n ṯmurṯ aḏ tiȓi ḏ ṯamurṯ nsen.
15 Maƹlik tuɣa txemmamen ḏi ṯmurṯ nni manis d ffɣen, iȓi ɣarsen lfurṣa aḏ d ƹeqben.
16 Walakin lla, rezzun x yijjen n ṯmurṯ ḥsen zi ṯenni, iƹni icten ḏeg ujenna. X manayenni war iseḏḥi ca Arebbi aḏas inin qa cek ḏ Arebbi nneɣ, aqa isewjeḏ-asen netta ij n ṯendint.
17 S lʼiman ikkar nnabi Brahim aḏ iqeddem ḏ dbiḥeṯ s memmis Isḥaq wami ṯ ijarreb Arebbi. Iƹni tuɣa itqeddam ḏ dbiḥeṯ s memmis waḥḏes iy zi iwƹeḏ Arebbi Brahim,
18 tuɣa inna-as qa s Isḥaq iy zi ɣa twaḥaseb ddurriṯ nnec.
19 Iḥesseb Brahim belli izemmar Arebbi aḏ isekkar mmis zeg imettinen. Manayenni ḏayes ȓemƹani minzi wah memmis iḏweȓ-d i Brahim am yijjen zi ȓmewṯ.
20 S lʼiman ikkar nnabi Isḥaq ibarek ṯarwa nnes Yaƹqub ḏ Ƹasu ƹlaḥsab lmustaqbel nsen.
21 S lʼiman ikkar nnabi Yaƹqub wami tuɣa itmetta uca ibarek ṯarwa n mmis Yusef kuȓ ijjen, iƹebbeḏ netta xmi itsennaḏ x ṯeɣȓiṯ nnes.
22 S lʼiman ikkar nnabi Yusef ɣar uneggaru n ṯuḏarṯ nnes, issiweȓ x wufuɣ n Ayṯ-Israʼil zi Miṣra iweṣṣa-aṯen bac aḏ ysin akiḏsen ixsan nnes.
23 S lʼiman kkaren lwalidin n nnabi Musa wami d ixȓeq snuffaren memmiṯsen minzi ẓrin belli netta iṣbaḥ aṭṭas, war ggwiḏen ca zi min ḏasen iweṣṣa uzeǧiḏ.
24 S lʼiman ikkar nnabi Musa wami imɣar yugi aḏas ȓaɣan memmis n yeǧis n lmalik Firƹun.
25 Ixḍar axas buṣaren imiṣriyen ak ccaƹb n Arebbi, war iqbiȓ ca aḏ ifareḥ ḏeg ufelles nni iy war itdumin ca.
26 Ifhem meȓa seḥqaren-ṯ ƹlaḥsab Lmasiḥ iƹni manaya ɣares lqima ktar zi min ɣarsen ḏ lkunuz ḏi Miṣra. Aqa netta ixezzar ɣar zzaṯ ḏi ljaʼiza nnes.
27 S lʼiman ikkar Musa iffeɣ zi Miṣra, war iggwiḏ ca zeg uɣḍab n uzeǧiḏ nni. Iṭṭef ḏi lʼiman nnes am yijjen itwaȓan Arebbi iƹni wenni war ṯ itwiȓi ḥadd.
28 S lʼiman ikkar netta igga Ȓƹiḏ Ameqqran irucc ṯiwwura s iḏammen n ȓƹiḏ bac Ƹazȓayen war ineqq ca imenzab n Ayṯ-Israʼil.
29 S lʼiman ikkar ccaƹb izwa x iḍaren ɣar ujemmaḍ-in n Ȓebḥar Azeggwaɣ, ṯisi nnes amecnaw ṯamurṯ yuzɣen. Walakin wami jarrben imiṣriyen aḏ ƹḏun ssenni ifeyyeḍ-d xasen ȓebḥar ɣerqen.
30 S lʼiman ikkar ccaƹb wḍan ȓeḥyuḍ n ṯendint n Ariḥa wami ḏas itenneḍ sebƹiyyam.
31 S lʼiman ṯaḥenjirṯ nni umi qqaren Riḥab iy tuɣa iffɣen abrid, ṯekkar nettaṯ ṯreḥḥeb s lmuxabaraṯ n Ayṯ-Israʼil u s manayenni war ṯemmuṯ ca ak yinni war itṭiƹin ca.
32 Iwa min ɣa iniɣ ƹaḏ? War ɣari bu ȓweqṯ aḏ ssiwȓeɣ x Jaƹḏun ḏ Barak ḏ Camcun ḏ Yafta ḏ nnabi Dawed ḏ nnabi Ṣamwil niɣ lʼanbiya marra.
33 S lʼiman kkaren niṯni rebḥen lmemlakaṯ, ḥekmen s ȓḥaqq, ḥerṯen x lwuƹud, bellƹen iqemmumen n sbuƹaṯ,
34 sexsin ḥaḏuq n ṯmessi, feȓṯen zi ȓeqḍeƹ n ssif. Ḍḍuƹef nsen iḏweȓ ḏ jjehḏ, jehḏen ḏi ȓḥarb uzzȓen x ȓƹaskar n ṯmura nneɣni.
35 Ȓebƹaḍ n ṯemɣarin ysint-id imettinen nsent iy d kkaren zi ȓmewṯ. Ȓebƹaḍ n yiwḏan marrṯen-ṯen, walakin niṯni ugin aḏ twaḍeȓqen bac aḏ rebḥen ijjen n lqiyama ḥsen.
36 Ȓebƹaḍ n yiwḏan ḥeggaren-ṯen, uwṯin-ṯen s usɣun, carfen-ṯen s snaṣeȓ, ḥebbsen-ṯen.
37 Rejmen-ṯen s uzru, qessen-ṯen x ṯnayen s ȓmencar, nɣin-ṯen s ssif. Gguren s yiȓemawen n iḥuȓiyen ḏ iɣayḏen. Niṯni ḏ imesƹan, twaƹeddben, ƹedden xasen.
38 Niṯni ddunect-a war ṯen ṯesḏaheǧ ca. Tƹezzaben ḏi ȓexȓawaṯ ḏ iḏurar ḏ ixbucen ḏ yifran n ṯmurṯ.