Siḏiṯneɣ Ƹisa ig isenjamen maci ḏ Ccariƹa
10
1 Cuf, Ccariƹa n Musa nettaṯ ɣir ḏ ij n ṯiȓi n ṯmesȓayin ṯiṣebḥanin iy d ɣa yasen, war ṯeǧi ca nettaṯ ḏ ṯimesȓayin nni ḏ ṣṣaḥ. X manaya, dbiḥaṯ nni n Ccariƹa iy teggen zi lƹam ɣar lƹam war zemmarent ƹemmarṣ aḏ siṣfant yinni itqarraben ɣar Arebbi aḏ iȓin bȓa ȓƹib.
2 Dbiḥaṯ nni maƹlik zemmarent aḏ siṣfant, ataf ṣafi sbedden-ṯent niɣ lla? Liʼanna yinni iƹebbḏen ataf aḏ qqimen ḏ imenqawiyen ijjen n ṯwaȓa i ȓebda, ḍḍamir nsen war itƹeddib ca s ȓmuƹṣiyeṯ.
3 Walakin dbiḥaṯ nni min ƹnant? Niṯenti tfekkarent-aneɣ kuȓ lƹam x ȓmuƹṣiyeṯ.
4 Liʼanna iḏammen n iyenduzen ḏ iɣayḏen war zemmaren ca aḏ kksen ȓmuƹṣiyeṯ, lla walu.
5 X manaya, wami d yusa Lmasiḥ ɣar ddunect-a inna-as i Arebbi:
<Ṯeswejḏeḏ-ayi ijjen n ddat,
war ṯerzuḏ ca dbiḥaṯ ḏ ṣṣeḏqeṯ lla.
6 Tuɣa war ḏac iteƹjib bu ȓḥaȓ aḏac cemḍen lḥayawanaṯ,
aḏac qeddmen ṣṣeḏqeṯ x ȓmuƹṣiyeṯ.
7 Uca nniɣ, Ay Arebbi aqayi usiɣ-d
aḏ ggeɣ ȓxaḍar nnec,
mamc xafi yura ḏi Lkitab.>
8 Ḏ amezwaru inna-as qa dbiḥaṯ ḏ ṣṣeḏqeṯ war ṯent ṯerzuḏ ca cek, war ḏac iteƹjib bu ȓḥaȓ aḏac cemḍen lḥayawanaṯ aḏac qeddmen ṣṣeḏqeṯ x ȓmuƹṣiyeṯ. (Ṯina tqeddamen-ṯent ƹlaḥsab Ccariƹa.)
9 Ṯumma inna-as aqayi usiɣ-d aḏ ggeɣ ȓxaḍar nnec. Iƹni aḏ ikkes dbiḥaṯ nni ṯimezwura aḏ igg ḏeg umcan nsent dbiḥeṯ wis ṯnayen n Lmasiḥ.
10 U s ȓxaḍar nni neccin netwasiṣfa s dbiḥeṯ n ddat n Ƹisa Lmasiḥ, ij n ṯwaȓa i ȓebda.
11 Ȓefqih kuȓ nhar itɣima netta itegg cɣeȓ-a nnes, iƹni itqeddam aṭṭas n ṯwaȓaṯin nnefs n dbiḥaṯ, walakin dbiḥaṯ nni war zemmarent aḏ kksent ȓmuƹṣiyeṯ.
12 Lmasiḥ lla, netta iqeddem ij n dbiḥeṯ waḥḏes x ȓmuƹṣiyeṯ i ȓebda, uca iqqim netta x ufusi n Arebbi.
13 Ssenni iqqim itraja ȓƹadyan nnes aḏ iȓin swadday iḍaren nnes.
14 Liʼanna yinni iḏewwaȓen ḏ ṣṣaliḥin isiṣfa-ṯen i ȓebda s yijjen n dbiḥeṯ waḥḏes bac aḏ iȓin bȓa ȓƹib.
15 Fa icehheḏ-aneɣ Arruḥ iqeddsen x manaya. Ḏ amezwaru iqqar:
16 <Ḏ wanita ḏ ȓƹaheḏ iy ɣa ggeɣ ak Ayṯ-Israʼil
menbaƹd i ȓweqṯ nni, iqqar-it Siḏi Arebbi.
Aḏ siḏfeɣ ȓuṣiyaṯ inu ḏeg wuȓawen nsen,
aɣarsen iȓint ḏ ṯira x ȓaƹquȓ nsen.>
17 Ssenni irnu inna:
<Ȓmuƹṣiyaṯ nsen ḏ ssayiʼaṯ nsen
war ḏaysent tfekkareɣ ca ƹaḏ.>
18 Ṯina, meȓa twaɣfarent maci ƹaḏ aḏ iqeddem can yijjen dbiḥeṯ x ȓmuƹṣiyeṯ.
Yallaheṯ a naḏfeṯ ɣar Arebbi s lʼiman
19-20 Iḏen fa ay ayṯma, ɣarneɣ ijjen n zƹameṯ bac a naḏef ɣar Uxxam Amqeddes Aṭṭas s iḏammen n Ƹisa iƹni s yijjen n ubriḏ ḏ jḏiḏ iddaren, innurzem-aneɣ wami iqqarṣ arwaq nni iƹni ddat nnes.a
21-22 Ɣarneɣ ij n ȓefqih ameqqran imɣar netta iḥekkem x ṯeddarṯ n Arebbi. Ƹlaḥsab ȓefqi-ya iy ɣarneɣ, a nqarrbeṯ ɣar Arebbi s yijjen n wuȓ ḏ acemȓaȓ u s yijjen n ttiqeṯ ṯejheḏ. Ƹaweḏ uȓawen nneɣ aḏ iȓin twaruccen bac ḍḍamir nneɣ aḏ itwasiṣfa war itƹeddib ca s ȓmuƹṣiyeṯ. U ƹaweḏ ddat nneɣ aḏ tiȓi twasireḏ s waman iṣfan.
23 A neṭṭef bȓa ma a neḍȓeq ḏi lʼamal nni iy xef ncehheḏ liʼanna Arebbi iy ḏaneɣ iweƹḏen ḏayes ttiqeṯ.
24 Neccin a nxemmem mliḥ mammec iy ɣa negg a nweṣṣa ayawya x ȓemḥibbeṯ ḏ lḥasanaṯ.
25 A nmun ak wayawya maci a nesmeḥ ḏi lwajib-a am mammec nnumen ȓebƹaḍ n yiwḏan. Lla, a ncejjeƹ ayawya, u ktar ƹaḏ xmi netwaȓa Nhar n Siḏiṯneɣ iqarreb-d.
26 Cuf, meȓa neccin netƹic s ȓmuƹṣiyeṯ s ȓxaḍar nneɣ u nessen lḥaqiqa, ataf war ɣarneɣ bu can dbiḥeṯ aḏ tekkes ȓmuƹṣiyeṯ nneɣ.
27 Lla, ɣir netraja s yijjen n ṯiggwḏi Lḥisab ḏ Lƹiqab ḏ yijjen n ṯmessi ṯḥeddeq aḏ tecc ȓƹadyan n Arebbi.
28 Wenni ig ixeȓfen Ccariƹa n Musa, meȓa cehḏen xas ṯnayen niɣ ṯȓaṯa n ȓechuḏ ataf aḏ immeṯ bȓa ma ṯ reḥmen.
29 Y kenniw, min tfekkarem? Mecḥaȓ iy ɣa yiȓi lƹiqab n wenni iseḥqaren Mmis n Arebbi, isexnez iḏammen n ȓƹaheḏ nni iy zi itwasiṣfa, izebbaȓ Arruḥ n arḍa!
30 Aqa neccin nessen Arebbi belli ḏ netta ig innan qa ḏ nec ig itentaqamen aṯen xeǧseɣ.
31 Meȓa ijjen ḥekkmen xas ifassen n Arebbi iddaren, ataf manaya isaggwaḏ.
32 Fa ƹeqȓeṯ x wussan nni iƹḏun wami iceƹceƹ xawem nnur. Ṯeṣbarem x yijjen n umenɣi iqseḥ, ṯwajham aƹeddeb.
33 Ȓebƹaḍ n ṯwaȓaṯin tzebbaȓen-kenniw tƹeddaben-kenniw, iwḏan tfurrujen xawem. Ȓebƹaḍ n ṯwaȓaṯin tƹawanem yinni itwaƹeddaben tbeddam akiḏsen.
34 Liʼanna imeḥbas qqimen ḏaywem ḏeg wuȓ. Ƹaweḏ ṯeṣbarem s ȓefraḥeṯ wami ḏawem kksin agȓa nwem, tuɣa tessnem belli aɣarwem yiȓi ij n wagȓa ḥsen zzayes, itduma.
35 Iḏen ejjeṯ ttiqeṯ nwem, nettaṯ aḏawem d ṯawi ij n lʼajar imɣar.
36 Aqa itxeṣṣa aḏ teṣbarem. Mayemmi? Bac xmi ɣa ṯeggem ȓxaḍar n Arebbi, ataf aɣarwem yiȓi minzi iy kenniw iwƹeḏ.
37 Liʼanna iqqim ḏrust n ȓweqṯ aḏ d yaweḍ wenni iy d itasen war itƹeṭṭaȓ ca.
38 Walakin wenni iǧan nican aḏ iƹic s lʼiman. Meȓa iwexxer xafi, ataf war xas reṭṭiɣ ca.
39 Walakin neccin maci zeg yinni iḏewwȓen ɣar ḏeffar bac a nefna. Lla, neccin zeg yinni itamnen a nsenjem ȓaƹmar nneɣ.