Lƹibada ṯamezwarut ḏeg Uqiḍun Ameqqran
9
1 Ȓƹaheḏ nni amezwaru tuɣa ɣares can n lqawanin ḏi lƹibada u ḏ ijjen n umcan muqeddes ḏi ddunect.
2 Iƹni sewjaḏen ijjen n Uqiḍun Ameqqran ḏayes ṯnayen n ixammen. Ḏeg uxxam amezwaru ggin ḏayes ȓqenḏiȓ ḏ ṭṭabȓa mani ɣa sersen aɣrum nni itqeddamen ḏ ṣṣeḏqeṯ i Arebbi. Axxam nni qqaren-as <Axxam Amqeddes>.
3 Ṯumma ḏinni ijjen n arwaq,a ɣar ḏeffar nnes ḏinni ij n uxxam wis ṯnayen qqaren-as <Axxam Amqeddes Aṭṭas>.
4 Ḏayes ȓmejmar n tbaxur icellel s dheb u ḏ tabut n ȓƹaheḏ marra iɣezḏisen nnes u ḏ ṯisi nnes celllen s dheb. Ḏi tabut-a ḏayes aqnuc itwaṣenneƹ s dheb, aqnuc nni ḏayes aɣrum umi qqaren lmanna. Ḏi tabut-a ƹaweḏ ḏayes ṯaɣȓiṯ n Harun ṯnewwar, ḏ ṯeȓwiḥin n ƹecra n ȓuṣiyaṯ.
5 Ṯaqebbarṯ n tabut-a xas ṯnayen n lmexluqaṯ n lƹaḍama niṯenti am munikuṯ ɣarsent afriwen. Ṯiȓi n wafriwen nsent ṯɣeṭṭa ṯaqebbarṯ-a ṯanita n arraḥmeṯ. Walakin war nzemmar ḏi ȓweqṯ-a a nweṣṣef ṯimesȓayin-a ṯa s ṯa.
6 Wami swejḏen marra ṯimesȓayin nni ammu, tuɣa taḏfen ȓfuqha ɣar uxxam amezwaru, kuȓ nhar ḏi lʼawqat nnes, teggen cɣeȓ nsen.
7 Walakin ɣar uxxam wis ṯnayen itraḥ ḏinni ɣir ȓefqih ameqqran, ijjen n ṯwaȓa ḏi lƹam u ṣafi. Labud akiḏes yawi ca n iḏammen bac aṯen iqeddem x yixef nnes u x dnub iy ggin ccaƹb bȓa ma ṯ ssnen.
8 Min ḏaneɣ d iseḍhar Arruḥ iqeddsen s manaya? Iseḍhar-aneɣ-d meȓa ƹaḏ iqqim Uqiḍun nni Ameqqran, ataf war innurzem ca ubriḏ ɣar min iǧan ḏ amqeddes aṭṭas.
9 Marra manaya iticc ijjen lmiṯal i ȓweqṯ-a iy ḏi neǧa ȓexxu. Cɣeȓ nni iy tuɣa teggen ḏinni xmi tqeddamen ṣṣeḏqeṯ ḏ dbiḥaṯ iƹni manayenni war izemmar ca aḏ isiṣfa ḍḍamir n wenni iƹebbḏen.
10 Manaya ɣir ḏayes can n lqawanin n Ccariƹa x lmakla ḏ ṯsessi ḏ ȓuḍu, lqawanin-a war ǧin ca n wuȓawen. Xeddmen ḥetta ȓweqṯ n ȓƹaheḏ ḏ jḏiḏ u ṣafi.
11 Fa Lmasiḥ wami d iḥḍar ḏ ȓefqih ameqqran n ṯmesȓayin iy d yusin, iƹni yuḏef aqiḍun nni ƹaḍim war ḏas inqis walu war ṯ bnin ca ifassen n bnaḏem, war iǧi ca zi min d itwaxeȓqen ḏi ddunect-a.
12 Yuḏef ijjen n ṯwaȓa u ṣafi ɣar Uxxam Amqeddes Aṭṭas. Netta war yuḏif ca s iḏammen n iɣayḏen ḏ iyenduzen. Lla, yuḏef s iḏammen nnes nniṯ u s manaya ixeǧes xaneɣ lfidya bac a nenjem i ȓebda.
13 Cuf, iḏammen n iɣayḏen ḏ iyenduzen ḏ yiɣeḏb n ṯfunast truccan zzaysen yinni ixenzen uca manayenni isiṣfa-ṯen bac aḏ iȓin ḏ imenqawiyen.
14 Meȓa amenni, mecḥaȓ iy ḏaneɣ ɣa siṣfan iḏammen n Lmasiḥ ktar! Netta s Arruḥ itduma i ȓebda iqeddem ixef nnes bȓa ȓƹib i Arebbi, iḏammen nnes aḏaneɣ siṣfan ḍḍamir nneɣ zi ssayiʼaṯ bac a neƹbeḏ Arebbi iddaren.
15 Falihaḏa Lmasiḥ netta itcafaƹ jaraneɣ-d ḏ Arebbi s yijjen n ȓƹaheḏ ḏ jḏiḏ bac yinni umi d iȓaɣa Arebbi ataf aḏ awin lwareṯ iy zi ṯen iwƹeḏ itduman i ȓebda. Liʼanna Lmasiḥ immuṯ ḏ lfidya ḥima aḏasen iḍȓeq aḏ iȓin ḥurr zi ȓmuƹṣiyaṯ iy ggin swadday i ȓƹaheḏ nni amezwaru.
16 Ƹlaḥsab lwaṣiya, labud aḏ d awin chada n lwafat n wenni iggin lwaṣiya.
17 Liʼanna lwaṣiya war ṯṣeǧeḥ ca illa meȓa immuṯ bab nnes. Iƹni war ṯṣeǧeḥ ca meȓa ƹaḏ iddar wenni iy t yurin.
18 X manaya waxxa ḏ ȓƹaheḏ amezwaru tuɣa war iṣeǧeḥ ca ḥetta wami uzzȓen iḏammen.
19 Aqa wami nnabi Musa iɣra kuȓ ȓuṣiyeṯ i marra ccaƹb nnes, ṯumma iysi iḏammen n iyenduzen ḏ iɣayḏen ixelleṭ-iṯen ak waman, ṯumma irucc zzaysen Lkitab s yixef nnes ḏ marra ccaƹb s ṯaḍufṯ ṯazeggwaɣṯ ḏ uzuy.c
20 Inna-asen qa yina ḏ iḏammen n ȓƹaheḏ iy ḏawem yumar Arebbi aḏ teggem.
21 Ammu kif-kif s iḏammen nni irucc Aqiḍun Ameqqran ḏ ȓeqcuƹ iy steƹmaȓen ḏinni ḏi lƹibada, marra.
22 U ḏ ṣṣaḥ ƹlaḥsab Ccariƹa n Musa ƹȓayen marra ṯimesȓayin aḏ twasiṣfant s iḏammen. U bȓa ma aḏ azzȓen iḏammen, ataf ȓmuƹṣiyaṯ war twaɣfarent ca.
23 Iḏen ṯimesȓayin-a itcabbahen ḏi ṯmesȓayin nni n ujenna tuɣa twasiṣfant s dbiḥaṯ. Walakin ṯimesȓayin nni s yixef nsent n ujenna lla, twasiṣfant niṯenti s yijjen n nnuƹ n dbiḥaṯ ḥsen zi ṯinni nneɣni.
24 Cuf, Lmasiḥ war yuḏif ca Axxam nni Amqeddes Aṭṭas ibnan s ifassen n bnaḏem itcabbahen waha ḏeg wenni n ṣṣaḥ. Lla, netta yuḏef ḏeg ujenna nniṯ aḏ iḥḍar zzaṯ i Arebbi ƹlaḥsab neccin.
25 War yuḏif ca ḏeg ujenna bac aḏ itqeddam ixef nnes aṭṭas n ṯwaȓaṯin amecnaw mamc itegg ȓefqih nni ameqqran xmi itaḏef ɣar Uxxam Amqeddes Aṭṭas kuȓ lƹam s iḏammen maci nnes.
26 Maƹlik amenni tuɣa ataf labud Lmasiḥ itƹeddab aṭṭas n ṯwaȓaṯin zeg wami iy twaxȓeq ddunect-a. Walakin lla, ihwa-d netta ijjen n ṯwaȓa aȓ uneggaru n zmanaṯ bac aḏ isbeṭṭeȓ ȓmuƹṣiyeṯ wami iqeddem ixef nnes ḏ dbiḥeṯ.
27 Ȓmewṯ itmetta bnaḏem ijjen n ṯwaȓa, ṯumma iḏeffar-it Lḥisab ḏ Lƹiqab.
28 Ammu Lmasiḥ, itwaqeddem ḏ dbiḥeṯ ijjen n ṯwaȓa bac aḏ yarbu ȓmuƹṣiyaṯ n waṭṭas n yiwḏan. Ṯumma aḏ d ihwa wis marṯayen.d Mayemmi? Maci ƹlaḥsab ȓmuƹṣiyeṯ n yiwḏan ƹaweḏ lla, aḏ d ihwa bac aḏ isenjem yinni iy ṯ itrajan.