Siḏiṯneɣ Ƹisa ḏ ȓefqih ameqqran n yijjen n ȓƹaheḏ ḏ jḏiḏ
8
1 Iwa, min iǧan muhim ḏi min neqqar? Iƹni ijjen n ȓefqih ameqqran am wenni iy xef nessiweȓ aqaṯ ɣarneɣ neccin. Iqqim netta x ufusi n lƹarc n Arebbi Subḥana wa Tƹala ḏeg ujenna.
2 Netta ixeddem ḏi ṯemziḏa iƹni ḏ aqiḍun ƹaḍim n ṣṣaḥ iy igga Siḏi Arebbi maci bnaḏem.
3 Cuf, kuȓ ȓefqih ameqqran tixḍaren-ṯ bac aḏ iqeddem ṣṣeḏqeṯ ḏ dbiḥaṯ. X manaya wa labud ȓefqih wanita Ƹisa aḏ iqeddem can n ȓḥajeṯ.
4 Maƹlik netta iǧa ḏi ṯmurṯ-a, iȓi war izemmar ca aḏ ixḏem ḏ ȓefqih liʼanna ḏanita ȓfuqha n Ayṯ-Lawi itqeddamen ṣṣeḏqaṯ ƹlaḥsab Ccariƹa n Musa.
5 Xeddmen niṯni cɣeȓ nsen ḏeg yij n ṯemziḏa nettaṯ am yij n ṯiȓi temcabbah ɣar min iǧan ḏeg ujenna. X manayenni Arebbi iƹȓem i Musa wami ibḏa isbedda Aqiḍun nni Ameqqran inna-as: <Fekkar bac aḏ teggeḏ marra min ḏac xaṭṭeɣ ḏi lxariṭa nni ḏeg uḏrar.>
6 Walakin cɣeȓ nni n ȓefqih iy ḏas yuca i Ƹisa imɣar aṭṭas x cɣeȓ nni aqḏim n ȓfuqha nneɣni. U ȓƹaheḏ-a iy xef itcafaƹ imɣar uȓa ḏ netta, iƹni ḥsen aṭṭas x wenni aqḏim liʼanna ibedd x yijjen n dsas n can lwuƹud iy iǧan ḥsen.
7 Maƹlik ȓƹaheḏ nni amezwaru war ḏas inqis walu, ataf war rezzun ca x wis ṯnayen.
8 Liʼanna Arebbi yufa iwḏan nni ḏ ineqsiyen wami inna:
<Aqa tasen-d wussan, iqqar-iṯ Siḏi Arebbi,
aḏaysen ggeɣ ijjen n ȓƹaheḏ ḏ jḏiḏ i Ayṯ-Israʼil,
u ƹaweḏ i Ayṯ-Yahuḏa.
9 Maci am ȓƹaheḏ nni iy ggiɣ qbeȓ ak ȓejḏuḏ nsen,
wami ṯen ṭṭfeɣ zeg ifassen nsen,
bac aṯen sufɣeɣ zi ṯmurṯ n Miṣra.
Liʼanna niṯni war ṭṭifen ca ḏi ȓƹaheḏ inu,
uca nec semḥeɣ ḏaysen, iqqar-iṯ Siḏi Arebbi.
10 Ḏ wanita ḏ ȓƹaheḏ iy ɣa ggeɣ ak Ayṯ-Israʼil
menbaƹd i ȓweqṯ nni, iqqar-iṯ Siḏi Arebbi.
Aḏ siḏfeɣ ȓuṣiyaṯ inu ḏi ȓaƹquȓ nsen,
aɣarsen iȓint ḏ ṯira x wuȓawen nsen.
Aḏ iȓiɣ ḏ Arebbi nsen aḏ iȓin ḏ ccaƹb inu.
11 Maci kur ijjen aḏ iseȓmeḏ i wajjar nnes,
niɣ kuȓ ijjen i wumas aḏas yini: ssen Siḏi Arebbi.
Lla, marra iḏsen aḏayi ssnen nec,
s umezyan nsen ɣar umeqqran nsen.
12 Aqa nec aḏasen ɣfareɣ ccerr nsen,
ȓmuƹṣiyaṯ nsen war ḏaysent tfekkareɣ ca ƹaḏ.>
13 Wami issiweȓ Arebbi x yijjen n ȓƹaheḏ ḏ jḏiḏ, wenni amezwaru ṣafi isbeṭṭaȓ-iṯ. U wenni ig isbeṭṭaȓ iḏewweȓ ȓexxu ḏ aqḏim ataf ḏeɣya aḏ itwakkes war itiȓi ca.