Lfirqa n ȓefqih ameqqran Malikiṣadiq
7
1 Cuf, Malikiṣadiq nni tuɣaṯ netta ḏ azeǧiḏ n ṯendint n Salima ḏ ȓefqih ɣar Siḏi Arebbi Yuƹȓan. Iruḥ iȓqa Brahim ibarek-iṯ. Manaya iwqeƹ wami d itrewwaḥ Brahim zi ȓḥarb nni iy ḏi iɣȓeb izeǧiḏen.
2 Yuca-as Brahim i Malikiṣadiq ȓaƹcur, ƹecra ḏi miyya zi marra. Ḏ amezwaru ȓmaƹna n yisem-a n Malikiṣadiq ixes aḏ yini <Azeǧiḏ n ṣṣulḥ>, u ƹaweḏ netta ḏ Lmalik n ṯendint n Salim iƹni netta ḏ azeǧiḏ n ȓehna.
3 War ɣares ntif lla babas lla yemmas lla ȓejḏuḏ nnes. War ɣares ntif amezwaru n ȓiyyam nnes uȓa ḏ aneggaru n ṯuḏarṯ nnes. Netta itcabbah ḏi Mmis n Arebbi iƹni iddar am ȓefqih ameqqran i ȓebda.
4 Iwa fekkareṯ mecḥaȓ ḏ ameqqran netta, ḥetta ḏ jeddiṯneɣ ameqqran Brahim yuca-as ȓaƹcur, ƹecra ḏi miyya zi marra agȓa nni ig irbeḥ zeg izeǧiḏen nni!
5 Ḏinni ƹaweḏ ijjen n ȓuṣiyeṯ ḏi Ccariƹa n Musa tweṣṣa yinni iǧan ḏ ȓfuqha zi Ayṯ-Lawi aḏ ysin ȓaƹcur zeg yiwḏan iƹni zi ayṯmaṯsen, waxxa uȓa ḏ ayṯmaṯsen ijji-ṯen-d jeddiṯsen ameqqran Brahim.
6 Walakin aryaz-a Malikiṣadiq war iǧi ca zi Ayṯ-Lawi, iysi ȓaƹcur zi Brahim uca Malikiṣadiq ibarek Brahim wenni umi ɣar ǧan lwuƹud.
7 U bȓa ccekk wenni ameqqran aḏ yuc lbaraka i wenni amezyan.
8 Ayṯ-Lawi ig ikessin ȓaƹcur iƹni niṯni ḏ iwḏan ƹadi iƹni tmettan. Walakin Malikiṣadiq ig iysin ȓaƹcur nni icehheḏ xas Lkitab belli netta iddar.
9 Iwa nzemmar a nini belli Lawi netta s yixef nnes iy ikessi ȓaƹcur zeg yiwḏan, yuwi ȓaƹcur i Malikiṣadiq s ufus n Brahim liʼanna Brahim ḏ jeddis ameqqran.
10 Mammec? Liʼanna wami Brahim iȓqa Malikiṣadiq tuɣa Lawi ƹaḏ aqaṯ ḏi Brahim iƹni ḏi jeddis ameqqran.
11 Iḏen, maƹlik cɣeȓ nni iy tuɣa xeddmen ȓfuqha n Ayṯ-Lawi war ḏas inqis walu, mayemmi ƹaḏ tuɣa nteḥḏaja aḏ d yas ij n ȓefqih nneɣni amecnaw lfirqa n Malikiṣadiq, maci zi lfirqa nni ƹadi n Harun n Ayṯ-Lawi?
12 U cuf, meȓa ibeddeȓ cɣeȓ nni iy xeddmen ȓfuqha n Ayṯ-Lawi ataf labud aḏ tbeddeȓ ƹaweḏ can ȓḥajeṯ ḏi Ccariƹa.
13 Liʼanna wenni iy xef nessawaȓ iƹni Ƹisa netta yusa-d zi ṯeqbiȓṯ nneɣni maci zi ṯeqbiȓṯ n Ayṯ-Lawi. Zi ṯeqbiȓṯ nnes ƹemmarṣ war ixḏim can yijjen ḏ ȓefqih ɣar ȓmeḏbaḥ.
14 Liʼanna nessen belli yusa-d Siḏiṯneɣ zi ṯeqbiȓṯ n Ayṯ-Yahuḏa. Ƹemmarṣ ma inna Musa aḏ d ffɣen ȓfuqha zi ṯeqbiȓṯ nni.
15 Ȓexxu marra manaya itwaḍhar-d mliḥ wami d iḍhar ij n ȓefqih nneɣni, iƹni ḏ Ƹisa, amecnaw lfirqa n Malikiṣadiq.
16 Iƹni maci ƹlaḥsab ijjen n ȓuṣiyeṯ x ȓejḏuḏ nnes zi Ccariƹa iy ṯ yarrin ḏ ȓefqih. Lla, netta ḏ ȓefqih ƹlaḥsab jjehḏ n ṯuḏarṯ nnes ƹemmarṣ aḏ tefna.
17 Aqa icehheḏ xas Lkitab: <Cek ḏ ȓefqih i ȓebda, amecnaw lfirqa n Malikiṣadiq.>
18 Ȓuṣiyeṯ nni ḏ ṯaqḏint ṣafi ṯetwabeddeȓ liʼanna ṯetwaḥsab ṯeḍƹef s bȓa nfaƹ.
19 Iffeɣ-d ijjen lʼamal ḥsen zi ȓuṣiyeṯ nni, zzayes iy ɣa nqarreb ɣar Arebbi ȓaḥeqqac Ccariƹa n Musa war d tarri uȓa ḏ ijjen ȓḥajeṯ aḏ tiȓi bȓa ȓƹib.
20 U cuf ƹaweḏ, manayenni s yijjen n ṯjaǧiṯ. Qbeȓ, yinni iḏewȓen ḏ ȓfuqha arrin-ṯen ḏ ȓfuqha s bȓa ṯjaǧiṯ.
21 Walakin Ƹisa wah, yarri-ṯ ḏ ȓefqih s yij n ṯjaǧiṯ wami ḏas inna Arebbi: <Aqa Siḏi Arebbi ijjuǧ u ƹemmarṣ aḏ ibeddeȓ array nnes inna qa cek ḏ ȓefqih i ȓebda.>
22 Ḏ ṯjaǧiṯ nni n Arebbi ig yarrin Ƹisa aḏ yiȓi ḏ wenni iḍemmnen ijjen n ȓƹaheḏ ḥsen zi ȓƹaheḏ nni aqḏim.
23 Ȓfuqha nni n Ayṯ-Lawi niṯni aṭṭas iḏsen, mayemmi? Liʼanna ȓmewṯ war ṯen tijji ca aḏ dumen ḏi ȓxeḏmeṯ nsen.
24 Walakin Ƹisa ȓxeḏmeṯ nnes n ȓefqih aḏ teqqim war twakkes ca liʼanna netta itduma i ȓebda.
25 X manaya yinni zzayes itqarraben ɣar Arebbi izemmar Ƹisa aṯen isenjem i ȓebda. Mayemmi? Liʼanna netta aḏ iddar i ȓebda aḏaysen itcafaƹ.
26 Cuf, ijjen n ȓefqih ameqqran am wanita ḏ netta iy neḥḏaj. Netta ƹaḍim, bȓa ȓƹib, iṣfa, ineƹzeȓ zeg yiwḏan iy ggin ȓmuƹṣiyeṯ, itwasemɣar yuƹȓa x ijennaṯen.
27 Netta maci am ȓfuqha nni nneɣni imeqqranen teḥḏajan niṯni aḏ qeddmen dbiḥaṯ kuȓ nhar iƹni x ȓmuƹṣiyaṯ nsen u menbaƹd x ȓmuƹṣiyaṯ n yiwḏan. Mayemmi? Liʼanna igga manaya icten n ṯwaȓa i ȓebda qaƹ, wami iqeddem ixef nnes ḏ lfidya x yiwḏan.
28 Liʼanna Ccariƹa n Musa tarra iryazen s ḍḍuƹef nsen aḏ iȓin ḏ ȓfuqha imeqqranen. Walakin Arebbi s ṯjaǧiṯ nnes iy d yusin menbaƹd i Ccariƹa n Musa yarra Mmis aḏ yiȓi ḏ ȓefqih ameqqran iḏewȓen netta bȓa ȓƹib qaƹ i ȓebda.