6
1 X manaya war netɣimiṯ ca ḏi ṯɣuri-ya ṯamezwarut x Lmasiḥ lla, a nuyureṯ ɣar zzaṯ bac a nemɣar. War ntaƹqib ca ɣar dsas. Iƹni war nessawaȓ ca ƹaḏ x ttuba nni n ssayiʼaṯ, niɣ x mammec ɣa negg a namen zi Arebbi,
2 niɣ x ibriḏen bac aḏ ṭehharen yiwḏan s waman, niɣ x mammec ɣa negg a nsers ifassen nneɣ x yiwḏan, niɣ x lqiyama n imettinen, niɣ x lḥisab n Nhar Aneggaru.
3 Iwa, a nuyureṯ ɣar zzaṯ iƹni meȓa ixes Arebbi.
4 Amma yinni mixef iceƹceƹ nnur, qqasen niṯni lhadiya n ujenna, carrcen ḏi Arruḥ iqeddsen,
5 niṯni ƹaweḏ ḏuwqen zi lbaraka n wawaȓ n Arebbi ḏ lqudraṯ n zman iy d ɣa yasen.
6 Yina meȓa ffɣen abriḏ, war iǧi wi ṯen d ɣa yarren ɣar ttuba. Mayemmi? Liʼanna yina aḏ iȓin am tṣellaben Mmis n Arebbi ƹaweḏ x ṣṣalib, tƹeyyaben-ṯ zzaṯ i yiwḏan.
7 Cuf, meȓa ṯamurṯ iccaṯ xas unẓar aṭṭas nettaṯ ṯsess ticc ṯafeǧaḥṯ, ataf aḏ tawi ijjen n lbaraka zi Arebbi.
8 Walakin meȓa ṯamurṯ nni ṯseɣmay-d ɣir asennan ḏ ṯzeggwarṯ, ataf nettaṯ ḏ walu aqat ḏi lxaṭar aḏ twanƹeȓ. Aȓ uneggaru at sḥarqen s ṯmessi.
9 Ay imƹizzen, waxxa nessawaȓ ammu neccin metʼakeddin ḏaywem iƹni x ṯmesȓayin bac aḏ tnejmem.
10 Iwa Arebbi, ma iticc ȓḥaqq niɣ lla? Wah, war itettu ca ȓxeḏmeṯ nwem ḏ ȓemḥibbeṯ nni ḏas d ṯseḍharem wami ṯƹawnem ṣṣaliḥin. U ƹaḏ teggem manaya.
11 Nexs aḏ tḥawȓem s wuȓ kuȓ ijjen zzaywem am qbeȓ bac aḏ tiȓim metʼakeddin ḏi lʼamal nwem aȓ uneggaru.
12 War nexs ca aḏ tƹegzem. Itxeṣṣa aḏ tiȓim am yinni itwaraṯen s ṣbar ḏ lʼiman nsen x ṯmesȓayin nni iy zi ṯen iwƹeḏ Arebbi.
13 Cuf, wami Arebbi iwƹeḏ Brahim x ȓƹaheḏ nni, ijjuǧ Arebbi aḏ icc ixef nnes. Mayemmi? Liʼanna war ḏinni ḥadd imɣar ktar zi Arebbi.
14 Inna-as: <Nec jjuǧeɣ qa ac barkeɣ s yijjen n lbaraka ṯemɣar, aḏ semɣareɣ ddurriṯ nnec.>
15 Iwa ammu wami iraja Brahim s yijjen n ṣbar yuweḍ-as-d min zi ṯ iwƹeḏ Arebbi.
16 Liʼanna iwḏan tjuǧen s yijjen aḏ yiȓi ḏ ameqqran zzaysen. U s yij n ṯjaǧiṯ aḏ ḥaqqen marra lqadiyaṯ nsen aḏ kemmȓent.
17 X manaya iḍmen Arebbi manayenni s yij n ṯjaǧiṯ i yinni iy ɣa iwarṯen min zi ṯen iwƹeḏ. Iƹni ixes aḏasen d iseḍhar mliḥ ṭṭabiƹa n lɣaraḍ nnes ƹemmarṣ aḏ twabeddeȓ.
18 Ṯnayen n ṯmesȓayin-a war twabeddiȓent ca,a Arebbi war izemmar axasent isxarreq. Zi ṯnayen n ṯmesȓayin-a azzaysent netwacejjeƹ neccin iy nerweȓ bac aɣares nnuffar. Zzaysent iy ɣa neṭṭef s jjehḏ ḏi lʼamal iy ḏaneɣ itwabeccaren.
19 Lʼamal-a itiȓi ɣarneɣ am yij uȓiyzim n uɣarrabu i ȓaƹmar nneɣ, irseq s jjehḏ war iḍeǧeq. Yuḏef lʼamal-a iƹḏu ɣar ḏeffar n arwaq n Uxxam Amqeddes Aṭṭas.
20 Ḏeg umcan nni yuḏef Ƹisa ḏinni ḏ amezwaru ƹlaḥsab neccin, iḏweȓ ḏ ȓefqih ameqqran i ȓebda amecnaw lfirqa nni n ȓefqih umi qqaren Malikiṣadiq.