5
1 Cuf, kuȓ ȓefqih ameqqran tixḍaren-ṯ-iḏ zeg iryazen, ticcen-as ȓweqṯ n ȓxeḏmeṯ nnes bac aḏ ixḏem zzaṯ i Arebbi ƹlaḥsab iwḏan. Itqeddam ṣṣeḏqeṯ ḏ dbiḥaṯ x ȓmuƹṣiyaṯ.
2 Izemmar netta aḏ iḥinn x yinni war ifehhmen ca ḏ yinni iffɣen abriḏ minzi netta s yixef nnes ḏayes ḍḍuƹef.
3 X manaya labud aḏ iqeddem dbiḥaṯ x ȓmuƹṣiyaṯ nnes nniṯ mammec iy ṯent itqeddam x yiwḏan.
4 Ƹaweḏ war ḏinni ḥadd iy ɣa isemɣaren ixef nnes aḏ ixḏem s ccan-a iƹni ḏ ȓefqih ameqqran. Lla, iticc-as ȓḥaqq nni Arebbi mammec ḏas ṯ yuca i ȓefqi nni umi qqaren Harun.a
5 Ammu uȓa ḏ Ƹisa war isemɣar ca ixef nnes aḏ ixḏem s lƹaḍama-ya iƹni ḏ ȓefqih ameqqran. Lla, inna-as Arebbi: <Qa cek ḏ Mmi, nhara ḏewȓeɣ nec ḏ Babac.>
6 Ƹaweḏ iqqar Arebbi ḏeg yij n umcan nneɣni: <Cek ḏ ȓefqih i ȓebda amecnaw lfirqa nni n ȓefqih umi qqaren Malikiṣadiq.>
7 Ḏeg wussan nni iy ḏi tuɣa iddar Ƹisa ḏi ṯmurṯ-a, itẓaǧa itȓaɣa x Arebbi s jjehḏ u s imeṭṭawen itettar-as i wenni izemmaren aṯ isenjem zi ȓmewṯ. Arebbi itṣennaṭ-as wami Ƹisa iggweḏ zzayes.
8 Waxxa netta ḏ Mmis n Arebbi iy iǧa, iȓmeḏ ṭṭaƹa s uƹeddeb nni iy xas ikkin.
9 Wami iƹḏu aƹeddeb nni bȓa ȓmuƹṣiyeṯ, iḏweȓ netta ḏ ȓƹunṣar n usenjam iƹni izemmar aḏ isenjem marra yinni iy ṯ itṭaƹan.
10 Ssenni yarri-ṯ Arebbi ḏ ȓefqih ameqqran amecnaw lfirqa nni n ȓefqih umi qqaren Malikiṣadiq.
Yallaheṯ a nuyureṯ ɣar zzaṯ bac a nemɣar
11 Nzemmar a nini ƹaḏ aṭṭas x ṯmesȓayin-a walakin iqseḥ akenniw nsefhem. Mayemmi? Liʼanna kenniw ṯḏeqȓem bac aḏ tfehmem.
12 Cuf, wa labud ȓexxu kenniw aḏ tiȓim ḏ imseȓmaḏen walakin lla, ƹaḏ itxeṣṣa-yawem ijjen akenniw isɣar s ṯɣuri nni ṯamezwarut zeg wawaȓ n Arebbi. Kenniw teḥḏajam aɣib waha, maci lmakla ḏ ṣṣaḥ.
13 Kuȓ ijjen netta ƹaḏ ḏ aseymi itƹic s uɣi waha, iƹni war ifehhem ca i ṯɣuri x min iṣeȓḥen.
14 Walakin lmakla n ṣṣaḥ nettaṯ tetten-t yinni ɣar ǧan ȓesnin imeqqranen. Zemmaren i lmakla n ṣṣaḥ minzi ȓebda xeddmen i ṯɣuri nni iy qqaren, tmeyyazen jar min iǧan ḏ aṣebḥan jar min iǧan ḏ aƹeffan.