4
1 Iḏen fa ƹaḏ nzemmar a naḏef ḏi arraḥeṯ n Siḏi Arebbi min zi ḏaneɣ iwƹeḏ. Wa labud a neggweḏ bac war itɣimi uȓa ḏ ijjen zzaywem war ḏinni d ixeṭṭeȓ.
2 Liʼanna ȓexbar-a n ȓxir iy ḏaneɣ d itwabeccaren i neccin, uȓa ḏ ȓejḏuḏ nneɣ twabeccaren zzayes. Walakin war stenfiƹen ca zzayes wami ugin azzayes amnen.
3 Cuf, arraḥeṯ nni mixef issawaȓ Arebbi ntaḏef ḏayes neccin iy yumnen. Issiweȓ Arebbi x manaya wami inna: <Qa jjuǧeɣ s uɣḍab inu nniɣ, ƹemmarṣ aḏ aḏfen ḏi arraḥeṯ inu.> Man arraḥeṯ? Iƹni ṯenni n Siḏi Arebbi wami ikemmeȓ ȓexḏayem nnes ixȓeq-d ddunect.a
4 Iwa ḏeg yijjen n lʼaya inna ammu x nhar wis sebƹa: <Ḏi nhar wis sebƹa ireyyeḥ Arebbi zi marra ȓexḏayem nnes.>
5 U ƹaweḏ ḏi lʼaya nni nneɣni iy xef nessiweȓ qbeȓ inna: <Ƹemmarṣ aḏ aḏfen ḏi arraḥeṯ inu.>
6 Iḏen ƹaḏ qqimen ȓebƹaḍ n yiwḏan aḏ aḏfen ḏi arraḥeṯ-a n Siḏi Arebbi, u yinni itwabeccaren qbeȓ war uḏifen ca liʼanna war uminen ca.
7 X manaya tuɣa isejjel Arebbi ijjen n ȓweqṯ nneɣni bac a naḏef ḏi arraḥeṯ nnes u ȓweqṯ nni isemma-yas Arebbi <Nhara>. Menbaƹd i waṭṭas n lqurun ig issiweȓ Arebbi s nnabi Dawed wami inna am nenna qbeȓ: <Nhara meȓa ṯesȓim i ṣṣut n Arebbi, war seqsiḥeṯ ca uȓawen nwem.>
8 Cuf, maƹlik nnabi Yacuƹa tuɣa isiweḍ ȓejḏuḏ nneɣ ɣar yijjen n arraḥeṯ, ataf Arebbi war issiweȓ ca x yij n nhar nneɣni menbaƹd i waṭṭas n lqurun.
9 Falihaḏa ƹaḏ iqqim ijjen n ssebṯ, iƹni ij n ȓweqṯ n arraḥeṯ i ccaƹb n Arebbi.
10 Liʼanna wenni yuḏfen ḏi arraḥeṯ n Arebbi aqa itreyyaḥ zi ȓxeḏmeṯ nnes mammec ireyyeḥ Arebbi zi ȓxeḏmeṯ nni nnes.
11 Iḏen labud a negg lmejhud nneɣ bac a naḏef ḏi arraḥeṯ nni ḥima uȓa ḏ ijjen war iweṭṭi ca ḏi nnefs n ȓmuƹṣiyeṯ.
12 Aqa awaȓ n Arebbi iddar netta ifsus, iqḍeƹ aṭṭas ktar zi ssif n ṯnayen n jjihaṯ. Itaḏef aȓ ḏaxeȓ iferreq buḥbeȓ ak arruḥ ḏ mani tmunen ȓemfaṣeȓ itaḏef aȓ waḏuf. Itmeyyaz jar lʼafkar ḏ lʼaɣraḍ n wuȓ.
13 War ḏinni uȓa ḏ ij n ṯmesȓayṯ zi min d itwaxeȓqen ṯnuffar zi Arebbi. Marra ṯimesȓayin twafeḍḥent u twaḍharent-id i ṯiṭṭawin n wenni umi ɣa nuc ȓeḥsab nneɣ.
14 Iḏen neccin a neṭṭef mliḥ ḏi lʼiman nneɣ iy xef ncehheḏ minzi ɣarneɣ neccin ij n ȓefqih ameqqran imɣer yuḏef ḏeg ijennaṯen iƹḏu-ṯen, netta ḏ Ƹisa Mmis n Arebbi.
Siḏiṯneɣ Ƹisa netta ḏ ȓefqih ameqqran
15 Cuf, war ɣarneɣ bu ij n ȓefqih ameqqran netta war izemmar aḏ isḥess zi ḍḍuƹef nneɣ. Wah, ɣarneɣ ijjen ȓefqih kkint xas marra ȓemḥayen. Netta am neccin walakin war iggi bu ȓmuƹṣiyeṯ.
16 Falihaḏa a nqarreb s zƹameṯ ɣar ȓƹarc n Arebbi ḏayes arḍa bac aȓ ḏinni naf arraḥmeṯ ḏ yijjen n arḍa iy ḏaneɣ ɣa iƹawnen ḏi ȓweqṯ n uḥḏaji nneɣ.