Siḏiṯneɣ Ƹisa imɣaren x nnabi Musa
3
1 Ay ayṯma ṣṣaliḥin ḏ kenniw iy iǧan ḏ imƹacaren ḏeg uȓaɣi nni iy d yusin zeg ujenna. Fekkareṯ mliḥ ḏi Ƹisa, netta ḏ arrasul u ḏ ȓefqih ameqqran n lʼiman iy xas ncehheḏ neccin.
2 Ixḏem Ƹisa s lʼiḏen n wenni iy ṯiḏ iƹeyynen mammec igga nnabi Musa uȓa ḏ netta ixḏem s lʼiḏen n Arebbi zi ayṯbab n ṯeddarṯ ṯekmeȓ n Arebbi.
3 Cuf, Ƹisa itwaḥsab s yij n lƹaḍama ktar zi nnabi Musa mammec itiȓi bab n ṯeddarṯ ɣares ccan ktar zi ayṯbab n ṯeddarṯ nni iy ḏinni d yurew.
4 Liʼanna kuȓ ṯaddarṯ ɣares wenni iy ṯen d yurwen u marra ijji-ṯen-d Arebbi.
5 Tuɣa nnabi Musa ixeddem nican ḏ amsexxar, itƹawan ayṯbab n ṯeddarṯ ṯekmeȓ n Arebbi, icehheḏ x ṯmesȓayin iy tuɣa ɣa itwabeccaren ḏi lmustaqbel.
6 Walakin Lmasiḥ netta ḏ Mmis iḥekkem x ayṯbab n ṯeddarṯ n Arebbi, itkellaf xasen nican. U neccin ḏ ayṯbab nni n ṯeddarṯ nnes iƹni meȓa neṭṭef mliḥ ḏi zƹameṯ nneɣ u ḏi lʼamal nneɣ iy xef nteftaxar.
Arraḥeṯ n yinni itamnen
7 X manaya ammu iqqar Arruḥ iqeddsen: Nhara meȓa ṯesȓim ṣṣut n Arebbi,
8 war seqsiḥeṯ ca uȓawen nwem mammec ggin Ayṯ-Israʼil wami ḏayi ƹṣan ḏi ȓweqṯ nni n ȓmiḥneṯ ḏi ȓexȓa.
9 Ḏeg umcan nni ȓejḏuḏ nwem zeƹƹmen-ayi s ṯɣennant nsen aḏ ẓren nec min ƹenniɣ, waxxa ḏi arbeƹin iseggwusa ẓrin ȓexḏayem inu.
10 X manayenni sƹeṣṣben-ayi yiwḏan n zman nni. Nniɣ nec qa ȓebda tbeƹƹaḏen zzayi s wuȓawen nsen, ibriḏen inu war ṯen ssinen ca niṯni.
11 Ssenni jjuǧeɣ s uɣḍab inu nniɣ qa ƹemmarṣ aḏ aḏfen ḏi arraḥeṯ inu.
12 Ay ayṯma, ḥḍam ixef nwem bac uȓa ḏ ijjen zzaywem war ɣares itiȓi bu wuȓ ḏ abercan niɣ war ḏayes itiȓi bu lʼiman bac war itbeƹƹiḏ ca netta x Arebbi iddaren.
13 Lla, meȓa nzemmar a nini <nhara>, cejjƹeṯ ayawya kuȓ nhar bac war ḏinni itiȓi ḥadd zzaywem aḏ iḏweȓ iqseḥ s wuȓ nnes aṯ texḏeƹ ȓmuƹṣiyeṯ.
14 Aqa neccin a niȓi ḏ imƹacaren ḏi Lmasiḥ iƹni qa meȓa neṭṭef mliḥ aȓ uneggaru ḏi ttiqeṯ nni iy tuɣa ɣarneɣ ḏ amezwaru.
15 Mammec iqqar ḏi Lkitab: <Nhara meȓa ṯesȓim i ṣṣut nnes, war seqsiḥeṯ ca uȓawen nwem mamc ggin Ayṯ-Israʼil wami ṯ ƹṣan.>
16 Cuf, min ƹnan yinni isȓin ugin aḏ ggen array i Arebbi? Yac ḏ iwḏan nni marra ig isufeɣ nnabi Musa zi Miṣra, niɣ?
17 Min ƹnan yinni isƹeṣṣaben Arebbi ḏi arbeƹin iseggwusa nni? Yac ḏ yinni iƹṣan Arebbi menḍaren ḏinni ḏ immurḍas ḏi ȓexȓa nni, niɣ?
18 U min ƹnan yinni iy xef ijjuǧ Arebbi inna-asen qa ƹemmarṣ aḏ aḏfen ḏi arraḥeṯ inu? Yac ḏ yinni war itṭiƹin ca, niɣ?
19 Iwa neccin netwaȓa belli niṯni tuɣa war zemmaren aḏ aḏfen ḏi arraḥeṯ n Siḏi Arebbi wami ugin aḏ amnen.