Asenjam nneɣ imɣaren aṭṭas
2
1 X manaya labud a d narr ȓbaȓ nneɣ i min nesȓa bac war nteffeɣ ca abriḏ.
2 Cuf, Ccariƹa nni n Musa uwint-it lmalaʼikaṯ, tuɣa tseyṭar xaneɣ tƹaqab-aneɣ meȓa neƹṣa niɣ meȓa war ntiƹ ca.
3 Ȓexxu asenjam nneɣ imɣaren, mammec iy ɣa nenjem zi lƹiqab iƹni meȓa neɣfeȓ x usenjam-a? Awaȓ n usenjam-a ibcar-iṯ-iḏ ḏ amezwaru Siḏiṯneɣ u ṯumma cehḏen xas yinni iy ḏas iṣennṭen siwḍen-ṯ-iḏ i neccin.
4 Icehheḏ xas uȓa ḏ Arebbi s lƹalamaṯ ḏ lburhanaṯ ḏ waṭṭas n lʼanwaƹ n lmuƹjizaṯ. S lʼiden nnes ifreq ƹaweḏ lqudraṯ ruḥiyaṯ n Arruḥ iqeddsen.
Wenni iǧan ḏ zzaƹim n usenjam nneɣ
5-6 Ȓexxu neccin nessawaȓ x ddunect-a iy tuɣa netraja. Cuf, maci i lmalaʼikaṯ umi yuca Arebbi ȓeḥkam x ddunect-a lla. Aqa ḏinni ij n umcan ḏi Lkitab mani icheḏ ijjen x manaya, iqqar:
<Tfekkareḏ cek ḏeg iryazen, maca min swan?
Mmis n bnaḏem, mayemmi iy ḏayes ɣa ithillan?
7 Ṯeggiḏ-ṯ ƹȓayen am lmexluqaṯ ujenna yuƹȓan,
ṯuciḏ-as ttaj n ȓuweqqar ḏ waṭṭas n ccan,
8 ṯeggiḏ swadday iḍaren nnes marra min iǧan.>
Wami igga Arebbi marra swadday iḍaren nnes, uȓa ḏ ijjen n ṯmesȓayṯ ma ṯeqqim war xas iḥekkim. Innama ƹaḏ ḏi ȓweqṯ-a war netwiȓi ca marra swadday iḍaren n bnaḏem.
9 Walakin Ƹisa wah, netwaȓa-ṯ ȓexxu s ttaj nnes n ȓuweqqar ḏ waṭṭas n ccan. Mayemmi? Lʼianna ḏeg yijjen n ȓweqṯ Ƹisa tuɣaṯ isehwa-ṯ Arebbi cwayt swadday i lmalaʼikaṯ iƹni wami iṣbar i ȓaƹḏab n ȓmewṯ. Bac s arḍa n Arebbi aḏ iqqas netta ȓmewṯ aḏ tiȓi ḏ ȓmewṯ nni n marra iwḏan.
10 Zi Arebbi iy tiȓint marra ṯimesȓayin-a u netta umi tiȓint. Ḏ Arebbi netta iy yarrin Ƹisa war ḏayes bu ȓƹib s ȓaƹḏab nni nnes iy xas iƹḏun, ḥima Arebbi aḏ d yawi aṭṭas n ṯarwa ɣar lƹaḍama nnes. Ɣares ȓmaƹna manaya ȓaḥeqqac Ƹisa netta ḏ zzaƹim n usenjam n ṯarwa-ya.
11 Aqa wenni isiṣfan iwḏan zi ȓmuƹṣiyaṯ nsen u ḏ yiwḏan nni itwasiṣfan, Babaṯsen ḏ ijjen. X manaya war xasen itƹeffar ca aḏasen yini ay ayṯma.
12 Lla, iqqar-as i Arebbi: <Aḏ ssiwȓeɣ x yisem nnec i ayṯma, ḏi ȓwesṭ n jmaƹeṯ ac ḥemḏeɣ s iɣennijen.>
13 U ƹaweḏ iqqar: <Nec aḏ teyyqeɣ ḏi Arebbi.>
Iqqar ƹaweḏ: <Aqayi nec ḏ ṯarwa inu iy ḏayi yuca Arebbi.>
14 Iḏen ṯarwa-ya niṯni ḏ iwḏan iƹni marra ḏaysen aysum ḏ iḏammen. X manaya Ƹisa uȓa ḏ netta ḏayes ṯimesȓayin-a. Ammu s ȓmewṯ nnes isbeṭṭeȓ zzaƹim n ȓmewṯ iƹni Ibȓis.
15 U ƹaweḏ Ƹisa aḏ d iḍȓeq i yinni iǧan ḏ isemɣan zi ȓexȓuq iƹni ṯḥekkem xasen ṯiggwḏi zi ȓmewṯ uca aḏ iȓin ḥurr.
16 Cuf, nessen belli Ƹisa war itƹiwin ca lmalaʼikaṯ lla, itƹawan ṯarwa n Brahim.
17 X manaya tuɣa labud Arebbi aḏ yarr Ƹisa am ayṯmas ḏi marra bac aḏ yiȓi ḏ ȓefqih ameqqran ḏayes arraḥmeṯ ḏayes ttiqeṯ ixeddem i Arebbi. U ƹaweḏ ȓefqi-ya aḏ iqeddem lfidya ḥima aḏ twaɣfarent ȓmuƹṣiyaṯ n yiwḏan.
18 Wami netta s yixef nnes itwaƹeddeb s ȓemḥayen, izemmar aḏ iƹawen yinni iǧan ḏi ȓemḥayen.