Uḏemawen niṯni ḏ ȓmuƹṣiyeṯ
2
1 Ay ayṯma, kenniw ṯumnem s Siḏiṯneɣ Ƹisa Lmasiḥ iy ɣar ṯeǧa lƹaḍama, war teggeṯ bu s wuḏemawen jar yiwḏan.
2 Maṯalan, yuḏef-d ɣar jmaƹeṯ nwem can ttajar itegg ḏeg ufus nnes ṯixuṯam n dheb irreḍ arruḍ iṣbaḥ. Yuḏef-d ƹaweḏ ijjen ḏ ȓmeskin irreḍ arruḍ iwessex.
3 Kenniw ḏeɣya ṯeqqarem-as i wenni ɣar iǧa warruḍ ḏ aṣebḥan: Qqim cek ḏa ḏeg umcan-a aṣebḥan. Ṯeqqarem-as i ȓmeskin: Bedd cek ḏiha niɣ qqim ḏanita ḏi ṯmurṯ ɣar iḍaren nneɣ.
4 Iƹni teggem s wuḏemawen ag wayawya tmeyyazem jar yiwḏan s lʼafkar ḏ ṯiƹeffanin.
5 Cuf ay ayṯma iƹizzen inu, ma war ṯessinem ca Arebbi ixḍar ȓmusakin n ddunect-a ḥima aḏ iȓin ḏ twajar s lʼiman, aḏ warṯen ȓmulk iy zi iwƹeḏ Arebbi yinni iy ṯ itḥibban?
6 Walakin kenniw ṯḥeggarem ȓmusakin! Ma war ṯessinem ca ḏ twajar iy kenniw iy ḍeǧmen, tjarren-kenniw ɣar lmaḥakim?
7 Ma war ṯessinem ca belli ḏ niṯni ig issawaȓen s ȓƹib ḏeg yisem aṣebḥan n Lmasiḥ iy zi ḏawem tȓaɣan yiwḏan?
8 Ȓuṣiyeṯ n Uzeǧiḏ izeǧiḏen iy d yusin ḏi Lkitab ṯeqqar: "Aḏ texseḏ ajjar nnec amecnaw ixef nnec." Kenniw aḏ teggem mliḥ meȓa ṯxeddmem zzayes.
9 Walakin meȓa ṯeggim s wuḏemawen jar yiwḏan, aqa kenniw ṯeggim ȓmuƹṣiyeṯ u ṯḥekkem xawem Ccariƹa belli ṯeƹṣam.
10 Liʼanna wenni ixeddmen Ccariƹa marra, walakin ixḍa ɣir ḏeg yij n ȓuṣiyeṯ iƹni netta ixḍa ḏi Ccariƹa amen-ṯekmeȓ.
11 Liʼanna wenni innan: <War fesseḏ ca> inna ƹaweḏ <War neqq ca.> Meȓa ṯenɣiḏ war ṯfessḏeḏ ca, aḏ tiȓiḏ ṯeƹṣiḏ s Ccariƹa.
12 Iwa ssiwȓeṯ iwa ggeṯ am yiwḏan xef ɣa iḥkem Arebbi s ccariƹa nni iy ḏi ṯeǧa lḥurriya.
13 Nhar n Lḥisab Arebbi war ireḥḥem ca wenni war irḥimen ca, arraḥmeṯ ṯɣeǧeb lḥisab.
Min iƹna lʼiman bȓa lḥasanaṯ?
14 Ay ayṯma, bnaḏem min ṯ ɣa inefƹen meȓa iqqar nec ḏ ȓmumen, walakin ȓexḏayema nnes war d tesbeyyinent ca belli netta ḏ ȓmumen? Ma ḏ lʼiman-a iy ṯ ɣa isnejmen? Lla ƹemmarṣ!
15 Qa icten n wučmaṯneɣ niɣ ij n wumaṯneɣ war ɣares bu arruḍ iy ɣa ireḍ ḏayes jjuƹ.
16 Ṯenniḏ-as cek niɣ ijjen nneɣni: “Ruḥ aḏ tecceḏ aḏ terḍeḏ arruḍ. Ac iƹawen Arebbi, Allah isheȓ." Iƹni cek war ḏas tuciḏ ca min ṯeḥḏaj ddat nnes. Mant nfaƹ ḏi manaya?
17 Amenni lʼiman waḥḏes itwaḥsab immuṯ meȓa war d isbeyyen ca ȓexḏayem nnes.
18 Imken can yijjen aḏ yini: “Iwa ijjen ḏayes lʼiman, ijjen ɣares ȓexḏayem.” Nec qqareɣ: “Cek sbeyyen-ayi-d mammec iǧa lʼiman nnec bȓa ȓexḏayem, u nec aḏac sbeyyneɣ mammec iǧa lʼiman inu s ȓexḏayem inu.”
19 Cek tamneḏ belli Arebbi ḏ ijjen. Iwa mliḥ, walakin uȓa ḏ ccayaṭin tamnen zi manayenni terjijjin.
20 Ay aryaz, cek ṯqefȓeḏ! Ma nec aḏawem d sbeyyneɣ belli lʼiman bȓa ȓexḏayem war ḏayes bu nfaƹ?
21 Xzar ɣar jeddiṯneɣ Brahim aqa iḥseb-iṯ Arebbi nican s ȓexḏayem nnes wami iqeddem mmis Isḥaq x ȓmeḏbaḥ.
22 Aqa twaȓiḏ belli lʼiman nnes ixḏem akeḏ ȓexḏayem nnes, uca lʼiman nnes iḏweȓ ikmeȓ s ȓexḏayem nni iy igga Brahim.
23 Ḏ wa ḏ ȓmaƹna n wawaȓ nni n Arebbi ḏi Lkitab wami inna: "Uca yumen Brahim zi Arebbi, ikkar Arebbi iḥseb-iṯ nican s lʼiman nni." Amenni ijja Arebbi Brahim ḏ ameddukeȓ nnes.
24 Kenniw isbeyyen-awem-d Arebbi iḥesseb bnaḏem nican maci ɣir s lʼiman u ṣafi, s ȓexḏayem.