Ccerr iy iǧan ḏeg yiȓes
3
1 Ay ayṯma, itxeṣṣa war zzaywem itiȓi bu aṭṭas n lmuƹallimin, minzi ṯessnem neccin lmuƹallimin belli axaneɣ izeyyar Arebbi ḏi lḥisab.
2 Marra iḏneɣ ntegg aṭṭas n lɣalaṭ. Meȓa can yijjen qaƹ war ixeṭṭi ca ḏeg wawaȓ nnes, wanita iƹni ḏ bnaḏem nican ikmeȓ. Izemmar aḏ iḥkem x ddat nnes marra.
3 Xmi ntegg sȓimeṯ deg uqemmum ikiddaren, nendeh-iṯen mani ma nexs.
4 Cuf ƹaweḏ, aɣarrabu waxxa ḏ ameqqran aṭṭas iḏeffeƹ-iṯ arriḥ ijehḏen, walakin arrayes izemmar aṯ indeh mani ma ixes s yij n dmam ɣir ḏ amezyan.
5 Uȓa ḏ iȓes nneɣ netta ḏ ij n ṯmesȓayṯ ḏ ṯamezyant ḏi ddat nneɣ maca itcehhar ixef nnes aṭṭas. Cuf, ij n ȓɣabeṯ ṯameqqrant ṯesḥarraq-it ij n ṯȓuqit ḏ ṯamezyant!
6 Iȓes netta ḏ ṯimessi ḏayes ccerr aṭṭas, netta iswessix marra min ɣarneɣ ḏi ddat nneɣ. Isruɣa ṯimessi ḏi marra ṯuḏarṯ nneɣ, u netta s yixef nnes ireqq zi ṯmessi nni n jahennama.
7 Izemmar bnaḏem aḏ irebba ȓuḥuc ḏ ijḍaḍ ḏ min itenḥuruḏen ḏ min itƹicen ḏi ȓebḥar zi mkuȓ nnawƹ, u ḏ ṣṣaḥ netta irebba-ṯen.
8 Walakin bnaḏem netta war izemmar aḏ irebba iȓes nnes, minzi netta ḏ ij n ccerr war iǧi wi ṯ ɣa isbedden, iƹemmar s ssem ineqqen.
9 Zzayes iy nḥemmeḏ Siḏi Arebbi Babaṯneɣ. Ma zzayes ƹaweḏ iy zi ɣa nenƹeȓ iryazen iy d ixȓeq Arebbi x ṣṣifeṯ nnes?
10 Wac zeg yij n uqemmum zaƹma iy zi ɣa nsufeɣ ccuker ḏ nnaƹȓeṯ? Lla ay ayṯma, itxeṣṣa manaya war itiȓi.
11 Ma zemmaren aḏ ffɣen waman ḏ imiziḍen ḏ imerzagen zeg yij n ȓƹunṣar?
12 Lla ay ayṯma. Ma ṯzemmar ṯcejjarṯ n ṯazarṯ aḏ tarew nettaṯ zzitun, niɣ ṯzayarṯ uḍiȓ aḏ tarew nettaṯ ṯazarṯ? Lla. Uȓa ḏ ȓƹunṣar ameǧaḥ war izemmar netta aḏ d isufeɣ aman ḏ imiziḍen.
Ṯanita ḏ ȓefhameṯ n ṣṣaḥ iy d yusin zi Arebbi
13 Ma akiḏwem wenni ḏi ṯeǧa ȓefhameṯ ḏ ṯusna?a Itxeṣṣa-yas aḏ d iseḍhar manaya s mammec itƹic u s min itegg ḏ aṣebḥan ak yij n ttawaḍuƹ iy d itasen s ȓefhameṯ.
14 Walakin meȓa ḏaywem ȓeḥseḏ aƹeffan ḏ ṭmaƹ, war teftaxareṯ ca kenniw. Iƹni itxeṣṣa-yawem kenniw war ṯesxarriqem ca x lḥaqiqa.
15 Nnawƹ n ȓefhameṯ-a war d thewwi ca zeg ujenna. Lla, nettaṯ n ddunect n yiwḏan n Cciṭan.
16 Minzi mani ma iǧa ȓeḥseḏ ḏ ṭmaƹ, ḏinni uȓa ḏ ȓfawḍa ḏ mkuȓ nnawƹ n ccerr.