Ccerr n twajar iḍeǧmen iwḏan
5
1 Yallah a twajar, ṣennṭeṯ mliḥ! Truṯ, sɣuyeṯ x lmuṣibaṯ iy ɣa ɣarwem d ihwan.
2 Agȓa nwem ixser, arruḍ nwem ccin-ṯ ṯkeccawin.
3 Dheb nwem ḏ nuqqarṯ nwem rcant, ṯarciṯ nni aḏ techeḏ ḍed nwem aḏ tecc aysum nwem amecnaw ṯimessi. Kenniw ṯxezznem agȓa aṭṭas ḏi ȓƹaheḏ-a aneggaru.
4 Iwa, kenniw war ṯxeǧisem ca icewwaren nni iy ḏawem mejjaren ḏeg imarjeƹiwen nwem, texȓiseṯ nni nsen ṯesɣuyiw u tceṯca ḍed nwem. U ṯɣuyyiṯ nni n icewwaren itsȓa-yas Siḏi Arebbi Lƹalamin.
5 Kenniw tƹicem ḏi ddunect s ufelles ḏ ccehweṯ nwem. Ṯḏewȓem ṯṣaḥḥem amecnaw iyenduzen wejḏen i nhar iy ḏi ḏasen ɣa ɣarṣen.
6 Ṯḥekmem x yinni iǧan nican, ṯenɣim-ṯen bȓa ma ḏawem ƹerrḍen.
Labud ṣbar ḏeg uƹeddeb
7 Ay ayṯma, ṣbareṯ aȓ d ɣa yas Siḏiṯneɣ. Xzareṯ ɣar ufeǧaḥ mammec itraja ṯafeǧaḥṯ n ṯmurṯ, itraja-t s yij n ṣbar aȓ ɣa yuweṯ unẓar amezwaru ḏ wenni aneggaru.
8 Uȓa ḏ kenniw ṣbareṯ, cejjƹeṯ ixef nwem minzi Siḏiṯneɣ ƹȓayen aḏ d iƹqeb.
9 Ay ayṯma, war ssawaȓeṯ ca ḏeg wayawya ḥima war twaƹiqibem ca. Qa wenni iteḥkamen ibedd-d ɣar ṯewwarṯ.
10 Ay ayṯma, ḏfareṯ abriḏ n lʼanbiya ig issiwȓen s yisem n Siḏi Arebbi niṯni twaƹeddaben ṣebbaren.
11 Aqa ṯessnem kenniw yinni iṣbaren nteḥsab-iṯen ɣarsen ssaƹḏ. Kenniw ṯesȓim x ṣbar n nnabi Ayub u ṯessnem mammec ṯ ibarek Siḏi Arebbi ḏeg uneggaru minzi Siḏi Arebbi ḏ aḥnin ḏ araḥim.
12 Ay ayṯma, aqa min iǧan muhim. War tjaǧam ca s ujenna niɣ s ṯmurṯ niɣ s can ṯmesȓayṯ nneɣnit. Lla! Xmi ɣa ṯinim wah, iniṯ wah. Xmi ɣa ṯinim lla, iniṯ lla. Ḥima war xawem d ihewwi ȓƹiqab.
Jjehḏ n ṯẓaǧiṯ
13 Meȓa ḏaywem can yijjen itwaƹeddab, itxeṣṣa-yas aḏ iẓẓaǧ. Meȓa ḏaywem can yijjen ifarreḥ, itxeṣṣa-yas aḏ iɣennej i Arebbi.
14 Meȓa ḏaywem can yijjen itnezbar, itxeṣṣa-yas aḏ d iȓaɣa x imeqqranen n jmaƹṯ n ȓmuminin axas ẓẓaǧen aṯ dehnen s zzect s yisem n Siḏiṯneɣ.
15 U ṯẓaǧiṯ nni ṯenni itqeddamen s lʼiman aḏ tesgenfa wenni iǧan ƹeyyan. Ssenni Siḏiṯneɣ aṯ isbedd. Meȓa igga ȓmuƹṣiyaṯ, aḏas iɣfar.
16 Ƹtarfeṯ s ȓmuƹṣiyaṯ nwem kenniw i wayawya, ẓẓaǧeṯ x wayawya ḥima aḏ tgenfam. Ṯẓaǧiṯ n bnaḏem ig iǧan nican ṯenni ḏayes jjehḏ aṭṭas ṯefsus.
17 Tuɣa nnabi Ilyas ḏ bnaḏem am neccin, iẓẓuǧ aṭṭas ḥima war icciṯ bu unẓar, ikka ṯeȓt snin ḏ uzyen war yuwṯi bu unẓar x ṯmurṯ.
18 Menbaƹd iẓẓuǧ ƹaweḏ, yuwṯa unẓar x ṯmurṯ ṯeṣȓaḥ ṯfeǧaḥṯ nnes.