Siḏiṯneɣ Ƹisa isekkar-d Liƹazar zi ȓmewṯ
11
1 Ij n bnaḏem qqaren-as Liƹazar ihȓec, netta zi dcar nni umi qqaren Bayt Ƹanya. Zeddɣent ḏinni suyṯmas, icten qqaren-as Maryam icten qqaren-as Marṯa.
2 Maryam ḏ nettaṯ ig iḏehnen iḍaren n Ƹisa s waman n lwarḏ ṯemseḥ-as-ṯen s ucewwaf nnes. Umas n Maryam Liƹazar ihȓec.
3 Suyṯmas nni ssekkent-id ɣar Ƹisa nnant-as a Siḏi, qa wenni xak iƹizzen qa ihȓec.
4 Wami isȓa i manayenni Ƹisa inna ȓeḥȓac-a war d yusi ca ḥima aḏ immeṯ. Lla, yusa-d ḏ ȓesbab i lƹaḍama n Arebbi ḥima azzayes itwasemɣar Mmis n Arebbi.
5 Tuɣa ƹizzen xas x Ƹisa Marṯa ḏ učmas ḏ umas Liƹazar.
6 Wami isȓa netta qa ihȓec, iqqim ḏinni yumayen mani iǧa.
7 Menbaƹd i manaya inna-asen i imeḥḍaren nnes: "Yallah a neḏweȓ ƹaweḏ ɣar ṯmurṯ n Yahuḏiya."
8 Nnan-as imeḥḍaren: "Mammec a lmuƹallim? Iʼisraʼiliyen nni tuɣa rezzun ac rejmen, cek ṯexseḏ aḏ tƹeqbeḏ ḏinni?"
9 Inna-asen Ƹisa: "Ḏinni ṯenƹac n swayaƹ n ṯfawt ḏi nhar. Wenni igguren ḏi nhar war itneqriḍ ca minzi itwaȓa ṯfawṯ n ddunect-a.
10 Meȓa can yijjen iggur s ǧiȓeṯ itneqraḍ minzi ǧiȓeṯ war ḏayes bu ṯfawt."
11 Wami inna manaya, irni inna-asen: "Ameddukeȓ nneɣ Liƹazar qa iṭṭeṣ, aḏ raḥeɣ aṯiḏ sfaqeɣ."
12 Nnan-as imeḥḍaren: "A Siḏi, meȓa netta iṭṭeṣ aḏ ikkar nniṯ."
13 Walakin Ƹisa issiweȓ x ȓmewṯ nnes, niṯni tɣir-asen issawaȓ x arraḥeṯ nni n yinni iṭṭṣen.
14 Uca inna-asen nican: "Qa Liƹazar immuṯ.
15 Nec farḥeɣ wami war ḏinni ǧiɣ ḥima aḏ tamnem. Yallah aɣares nraḥ."
16 Ṭumma iƹni wenni umi qqaren Acniwa inna-asen i imeḥḍaren iy iǧan ḏ imeddukaȓ nnes: "Akis nuyur uȓa ḏ neccin akis nemmeṯ."
17 Wami d yusa Ƹisa, yufa ṯeƹḏu arbeƹiyyam zeg wami itwanḍeȓ.
18 Bayt Ƹanya ṯeggwej ṯȓaṯa kilumiter x Lquds.
19 Aṭṭas n iʼisraʼiliyen usin-d ɣar Marṯa ḏ Maryam ḥima aṯent ƹezzan x umaṯsent.
20 Wami ṯesȓa Marṯa qa Ƹisa iggur-d, ṯruḥ aṯ teȓqa walakin Maryam ṯeqqim ḏi ṯeddarṯ.
21 Ṯenna-as Marṯa i Ƹisa: "A Siḏi, maƹlik aqac ḏanita, iȓi war immuṯ ca uma.
22 Nec ssneɣ belli ƹaḏ ȓexxu qa Arebbi aḏac yuc min ma ṯettareḏ-as."
23 Inna-as Ƹisa: "Aḏ d ikkar ƹaweḏ wumam."
24 Ṯenna-as Marṯa: "Ssneɣ aḏ ikkar ḏi ȓweqṯ n Lqiyama ḏi Nhar Aneggaru."
25 Inna-as Ƹisa: "Nec ḏ lqiyama nec ḏ ṯuḏarṯ, wenni itamnen zzayi ataf aḏ iddar waxxa immuṯ.
26 Marra wenni iddaren u netta itamen zzayi ataf war itmetti i ȓebda. Ma ṯumneḏ zi manaya?"
27 Ṯenna-as: "Wah a Siḏi. Nec umneɣ qa cek ḏ Lmasiḥ, cek ḏ Mmis n Arebbi, cek ḏ wenni iy d itasen ɣar ddunect."
28 Wami ṯenna manaya, ṯruḥ ṯȓaɣa-d i učmas s ȓḥess ṯenna-as: "Lmuƹallim yusa-d irezzu xam."
29 Wami ṯesȓa manaya, ṯekkar s ṯazȓa ṯraḥ ɣares.
30 Ƹisa ƹaḏ war d yusi ca ɣar ubilaj, aqaṯ ḏeg umcan mani ṯ teȓqa Marṯa.
31 Iʼisraʼiliyen nni aqaṯen ak Maryam ḏi ṯeddarṯ tƹezzan-t. Wami ẓrin Maryam ṯekkar s ṯazȓa ṯeffeɣ niṯni ḏfaren-t tɣir-asen aḏ traḥ ɣar unḍeȓ aḏ tru ḏinni.
32 Wami d tusa Maryam mani iǧa Ƹisa, ṯeẓri-ṯ ṯewḍa-yas ɣar iḍaren nnes ṯenna-as: "A Siḏi, maƹlik aqac ḏanita iȓi war immuṯ ca uma."
33 Ƹisa wami t iẓra ṯetru ḥetta ḏ iʼisraʼiliyen nni iy kiḏes d yusin uȓa ḏ niṯni trun, netta uȓ nnes iɣȓeb-iṯ ixeyyeq ḏi nnefs nnes.
34 Inna-asen: "Mani ṯ tneḍȓem?"
Nnan-as: "Araḥ-d a Siḏi aḏ teẓreḏ."
35 Ƹisa itru.
36 Nnan iʼisraʼilyen nni xzarem mecḥaȓ tuɣa xas iƹizz.
37 Nnan ȓebƹaḍ zzaysen qa ḏ wanita iy isgenfan ṯiṭṭawin n uḍarɣaȓ, ma war izemmar ataf igga can ȓḥajeṯ bac war itmetti ca Liƹazar?
38 Ƹisa iziǧez-as ƹaweḏ ḏeg wuȓ nnes, yusa-d ɣar yifri n unḍeȓ yufa xas azru.
39 Inna Ƹisa: "Sbeƹƹḏeṯ xas azru-ya."
Ṯenna-as Marṯa učmas n wenni immuṯen: "A Siḏi, qa yurṣuḍ ȓaḥeqqac ṯeƹḏu xas arbeƹiyyam zeg wami immuṯ."
40 Inna-as Ƹisa: "Yac nniɣ-am, meȓa ṯumneḏ aḏ teẓreḏ lƹaḍama n Arebbi?"
41 Uca niṯni sbeƹƹḏen azru nni. Iysi Ƹisa ṯiṭṭawin ɣar ujenna inna: "Tcekkareɣ-cek a Baba, ṯestajbeḏ-ayi.
42 Nec ssneɣ qa cek ȓebda testajabeḏ-ayi, walakin nec qqareɣ manaya ƹlaḥsab x ȓɣaci-ya iy ḏayi d innḍen, ḥima aḏ amnen belli qa ḏ cek iy ḏayi d issekken."
43 Wami inna manaya, iȓaɣa s jjehḏ: "A Liƹazar, ffeɣ-d ssenni!"
44 Iffeɣ-d wenni immuṯen, inneḍ-as ȓecfen x ifassen ḏ iḍaren x uɣembub nnes xas ȓqabb. Inna-asen Ƹisa: "Kksem xas ȓecfen nni, jjem-ṯ aḏ yuyur."
Iʼisraʼiliyen tafqen aḏ nɣen Siḏiṯneɣ Ƹisa
45 Aṭṭas n iʼisraʼiliyen iy d yusin ɣar Maryam ẓrin min igga Ƹisa umnen zzayes.
46 Walakin inneḍni ruḥen ɣar ifarrisiyen nnan-asen min igga.
47 Munen arruyas n ȓefquha ḏ ifarrisiyen ak jmaƹṯ n lḥukkam n Ayṯ-Israʼil nnan: "Min ɣa negg? Qa aryaz-a itegg aṭṭas n lmuƹjizaṯ.
48 Meȓa nejji-ṯ ammu, marra azzayes amnen. Aḏ d asen irumaniyen, aḏaneɣ xerben ṯamziḏa ṯameqqrant nneɣ ḏ lʼumma nneɣ."
49 Ijjen zzaysen qqaren-as Qiyafa, netta ḏ arrayes n ȓfuqha ḏeg useggwas nni. Ikkar netta inna-asen: "Kenniw war ṯessinem walu,
50 war ṯefhimem ca. Ḥsen i kenniw aḏ immeṯ ij n uryaz x ccaƹb ḥima war ṯfenni ca lʼumma nneɣ marra."
51 Netta ḏeg useggwas nni tuɣaṯ ḏ arrayes n ȓfuqha. War inni ca manayenni zeg yixef nnes lla, yusa-as-d manayenni zi Arebbi belli Ƹisa aḏ immeṯ x lʼumma n Ayṯ-Israʼil.
52 War iǧi bu x lʼumma n Ayṯ-Israʼil waha, uȓa ḏ ṯarwa n Arebbi itemzeǧaƹen ḏi ṯmura, aṯen ismun Arebbi ḏ ijjen.
53 Zi nhar nni tafqen ḥima aṯ nɣen.
54 X manaya war iqqim ca Ƹisa itraḥ itas-d jar iʼisraʼiliyen. Iruḥ ɣar can ṯmurṯ ṯuḏes ȓexȓa, ɣar yij ubilaj qqaren-as Afrayim iqqim ḏinni ak imeḥḍaren nnes.
55 Iqarreb-d Ȓƹiḏ Ameqqran n Ayṯ-Israʼil. Usin-d aṭṭas n yiwḏan zi ȓedcur ɣar Lquds ḥima aḏ ṭehharen ixef nsen qbeȓ i Ȓƹiḏ.
56 Tuɣa rezzun x Ƹisa, ssawaȓen wami bedden ḏi ṯemziḏa ṯameqqrant n Ayṯ-Israʼil qqaren jarasen, Min twaȓam? Ma war d itis bu ɣar Ȓƹiḏ?
57 Arruyas n ȓfuqha ḏ ifarrisiyen weṣṣan wenni iy ɣa iẓren mani iǧa Ƹisa, asen t yini bac aḏ raḥen aṯ ṭṭfen.