Siḏiṯneɣ Ƹisa itsebbaȓ ṯuḏarṯ nnes x iḥuȓiyen nnes
10
1 "Aqa tesȓam ȓḥaqq: Wenni war itiḏfen zi ṯewwarṯ n ȓkuri n iḥuȓiyen itgaƹƹaḏ manis nneḍnit, netta itwaḥsab ḏ aceffar ḏ axewwan.
2 Walakin wenni d ɣa yaḏfen zi ṯewwarṯ netta ig irewwsen iḥuȓiyen nnes.
3 Aƹessas n ȓkuri aḏas irzem ṯawwarṯ i wenni iy irewwsen, iḥuȓiyen nnes tesȓan i ṣṣut nnes. Itȓaɣa x iḥuȓiyen nnes s yisemawen nsen, aṯen isufeɣ.
4 Aḏ isufeɣ marra iḥuȓiyen nnes iggur zzaṯsen, iḥuȓiyen nni ḏeffaren-ṯ minzi ssnen ṣṣut nnes.
5 Walakin aṯarras n midden war ṯ ḏeffaren ƹemmarṣ azzayes rewȓen, minzi niṯni war ssinen ca ṣṣut n uṯarras n midden."
6 Inna-asen Ƹisa ȓmiṯal-a, walakin niṯni war fhimen ca ṯimesȓayin mixef iy ḏasen issawaȓ.
7 Inna-asen Ƹisa ƹaweḏ: "Aqa tesȓam ȓḥaqq: Nec ḏ ṯawwarṯ n ȓkuri.
8 Marra yinni d yusin qbeȓ i nec niṯni twaḥasben ḏ iceffaren ḏ ixewwanen, iḥuȓiyen niṯni war ɣarsen sȓin ca.
9 Nec ḏ ṯawwarṯ, wenni zzayi ɣa yaḏfen aḏ injem. Aḏ yiȓi amecnaw ij n uḥuȓi itaḏef iteffeɣ itaf min ɣa icc.
10 Netta aceffar itas-d ɣir aḏ yacar aḏ ineɣ aḏ ihḏem. Nec usiɣ-d ḥima aɣarsen ṯiȓi ṯuḏarṯ nni n ṯuḏarṯ bȓa ȓeqyas.
11 Nec ig irewwsen ḏ ṣṣaḥ. Wenni ig irewwsen ḏ ṣṣaḥ itsebbaȓ ṯuḏarṯ nnes x iḥuȓiyen nnes.
12 Axeddam maci am wenni irewwsen iḥuȓiyen nnes nniṯ. Axeddam, meȓa iẓra uccan yusa-d aḏ ismeḥ ḏeg iḥuȓiyen nni aḏ irweȓ. Uccan aḏ ihjem x iḥuȓiyen aṯen iƹzeȓ x wayawya.
13 Axeddam aḏ irweȓ minzi netta ḏ axeddam waha, war ṯ thimmin ca iḥuȓiyen.
14-15 Nec ḏ wenni iy ṯen irewwsen ḏ ṣṣaḥ. Ssneɣ iḥuȓiyen inu iḥuȓiyen inu ssnen-ayi, mammec ḏayi issen Baba nec ssneɣ-ṯ. Ṯuḏarṯ inu, tsebbaȓeɣ-t x iḥuȓiyen inu.
16 Ɣari iḥuȓiyen nneḍni war ǧin bu ḏi ȓkuri-ya, itxeṣṣa-ayi aṯen d awiɣ. Aḏ sȓen i ṣṣut inu aḏ tiȓi ḏ ij n ṯḥimmarṯ ḏ ijjen iy ṯen ɣa irewsen.
17 S manaya Baba itḥibba-ayi minzi nec tsebbaȓeɣ ṯuḏarṯ inu ḥima ƹaweḏ atid arreɣ.
18 Uȓa ḏ ijjen war zzayi t itekkes lla, nec tsebbaȓeɣ ṯuḏarṯ inu s ȓxaḍar inu. Ɣari jjehḏ ḥima at sebbȓeɣ. Ɣari jjehḏ ḥima atid arreɣ ƹaweḏ. Ammu iy ḏayi iweṣṣa Baba."
19 Iwqeƹ lxilaf ƹaweḏ jar iʼisraʼiliyen x wawaȓen-a.
20 Nnan aṭṭas zzaysen: "Wanita ḏayes jnun. Netta ḏ abuhaȓi, mayemmi ɣares tesȓam?"
21 Nnan inneḍni: "Awaȓen-a war ṯen iqqar ca wenni iy ḏi ǧan jnun. Ma izemmar can yijjen zi jnun aḏ isgenfa ṯiṭṭawin n iḍarɣaȓen?"
Siḏiṯneɣ Ƹisa ḏ Babas niṯni ḏ ijjen
22 Yuweḍ-d Ȓƹiḏ lmilad n ṯemziḏa ṯameqqrant n Ayṯ-Israʼil ḏi Lquds. Manaya ḏi ȓmecta,
23 Ƹisa iggur ḏeg Useqqif n Suliman ḏi ṯemziḏa ṯameqqrant.
24 Munen xas iʼisraʼilyen nnan-as: "Aȓ meȓmi c ɣa nraja? Meȓa cek ḏ Lmasiḥ, ini-yaneɣ-ṯ nican!"
25 Inna-asen Ƹisa: "Nniɣ-awem-ṯ, kenniw war timnem ca. Ȓexḏayem iy teggeɣ ḏeg yisem n Baba cehhḏent-ayi.
26 Walakin kenniw war timnem ca minzi war ṯeǧim ca ḏ iḥuȓiyen inu.
27 Iḥuȓiyen inu tesȓan ɣar ṣṣut inu, ssneɣ-ṯen niṯni ḏeffaren-ayi.
28 Ticceɣ-asen ṯuḏarṯ n ȓebda ƹemmarṣ war fennin, war ṯen ixeṭṭef uȓa ḏ ijjen zeg ufus inu.
29 Ḏ Baba iy ḏayi ṯen yucin u netta ḏ ameqqran zi kuȓci. War izemmar uȓa ḏ ijjen aṯen ixḍef zeg ufus n Baba.
30 Nec ḏ Baba ḏ ijjen."
31 Iʼisraʼiliyen nni ysin-d ƹaweḏ izra aṯ rejmen.
32 Inna-asen Ƹisa: "Sbeyyneɣ-awem-d aṭṭas n ȓexḏayem ṯiṣebḥanin zi Baba, mant ȓxeḏmeṯ iy ṯexsem aḏayi ṯrejmem xas?"
33 Nnan-as iʼisraʼiliyen: "War c nrejjem ca x ȓxeḏmeṯ iṣebḥan lla, ac nerjem wami ṯenniḏ lbuhtan x Arebbi. Qa cek ḏ bnaḏem, ṯarriḏ ixef nnec ḏ Arebbi."
34 Inna-asen Ƹisa: "Ma ṯura niɣ lla ḏi Ccariƹa nwem belli Arebbi inna: <Nec nniɣ-awem kenniw ḏ arebbiṯen>!?
35 Netta iy ḏasen iqqaren <arebbiṯen> i yinni umi d yusa wawaȓ n Arebbi, u Lkitab ȓebda iqqar ȓḥaqq.
36 Ma ṯeqqarem i wenni ixḍar Baba issekk-iṯ-iḏ ɣar ddunect cek ṯenniḏ lbuhtan x Arebbi minzi nniɣ nec ḏ Mmis n Arebbi?
37 Meȓa war xḏimeɣ ȓexḏayem n Baba, war ḏayi tamneṯ ca.
38 Meȓa xeḏmeɣ-ṯent, amneṯ ḏi ȓexḏayem nni waxxa war zzayi ṯuminem. Ammu aḏ tessnem qa Baba aqaṯ ḏayi, nec aqayi ḏi Baba."
39 Rezzun aṯ ṭṭfen walakin inufseȓ-asen jar ifassen nsen.
40 Iḏweȓ ƹaweḏ ɣar ujemmaḍ-in n yiɣzar n Lʼurdun ɣar umcan mani tuɣa itṭehhar Yaḥya ḏeg umezwaru, iqqim ḏinni.
41 Usin-d ɣares aṭṭas nnan, Yaḥya war iggi uȓa ḏ ij n lmuƹjiza, walakin marra min inna x wanita ḏ ṣṣaḥ.
42 Umnen zzayes aṭṭas n yiwḏan ḏinni.