Injil Córif or Síyara
MARKUS
Síyara Markus or Foriso
Síyara Markus óilde Noya Niyom or eggwá síyara, zibát Isá Mosihr zindigir baabute boiyan goijjé. Háasgori, Noya Niyom or foóilar sairó síyara re “Injil” bouli hoó, ziyán or maáni “Kúchóbor” yáni “Gom Hóbor.” Síyara iín ore Isá mori baade Moti, Markus, Lukás, edde Yohánna ye leikké. Síyara Markus yibá ar tin nwá Injil síyarar túaro bicí baṛí aar yibá re Injil síyara beggún or age yáni Isá Mosih zormo ói tokoriban háiṭ-fañs ottu hóittor bosór or dormiyan ot gori leikké bóuli maniloiyé. Boóut ulema ókkole biccác goré de, síyara Markus yibá Rom cóor or Isáyi ókkol ore hímmot díbar moksót lói héṛe Rom ot leikké.
Síyara yibár lekóya óilde Markus, zaré Yohánna Markus name yó zana zah, yóggwa sáhabi Pául edde Bárnabas or sáañti accíl, montor yóggwa ye zeñtté tarár tobolik or ham or sofór eridiyé, yóggwar nam hóraf óiye (Hamól 13:13). Fisór ttu Markuse abar Bárnabas or fúañti sofór ot giiyé (Hamól 15:37-39). Markus Fitor or bicí hátilla dustó accíl de híyan zana zah (1 Fitor 5:13). Markus Isár zindigir baabute sukdahá gobá de no óile yo, boóut ulema ókkole biccác goré de, Markuse Fitor or diya gobá ókkol bicí leikké. Hétolla híin óilde Markus or lekár kúchóbor or mul. Markuse nizor e síyarat ummot banar edde Isár ahéri októr taalim or baabute leikké.
Súrki ókkol
1. Allar ham olla Isár toiyari (1:1-13)
2. Galil ot Isár keramot edde tobolik (1:14—7:23)
3. Galil or baáre Isár keramot (7:24—10:52)
4. Jerúsalem cóor ot Isá (11—13)
5. Isár duk-zulúm edde moot (14—15)
6. Isá mora ttu zinda ówa (16)