Jerúsalem ot mujilíc
15
Yohúdiya ttu kessú manúic nise aái imandár báiyain dore endilla taalim diyat doijje, ki hoilé, “Zodi Muúsar Córiyot mozin ázomi no goró, tuáñra nejat fai no faribá.” 2 Híyan ot Páule edde Bárnabase ítara lloi doró torkatorki edde barábari diyé. Ahérit zomáte fáisela goijjé de, Pául, Bárnabas edde ítarar bútor ttu hoozzon manúic uore Jerúsalem zai Hóborgwa gún lloi edde buzurgó ókkol loi e mosólar baabute mocuwara gorá foribó. 3 Baade zomáte tara re difeçáidiye; tará Fonikcíyar edde Samáriyar bútorttu zaite-zaite héçe imandár báiyain ókkol ore zanaiyé de, Beyohúdi ókkol keéngorí Allar uzu fírer; híyane ítara beggún or hañsé bicí kúci ainné. 4 Tará zeéñtte Jerúsalem ot foóñiccé, zomát or maincé, Hóborgwa gúne edde buzurgó ókkole tará re estekbal goijjé, baade Alla ye tarár áta ziín-ziín goijjé híin beggún ítarar hañsé boiyan goijjé. 5 Montor Féroci fírka ttu imandár boinné de hoozzone uçí hoór de, “Beyohúdi ókkol ottu ázomi gorár zorur ar ítara re Muúsar Córiyot amól gorí bolla hókum diyar zorur.”6 Hétunot Hóborgwa gúne edde buzurgó ókkole hé mosóla gán or uore báfi bolla zoma óiye. 7 Héçe boóut torkatorki ói baade Fitore uçí ítara re hoór de, “Óu báiyain, tuáñra tou zano, boóut din age Alla ye tuáñrar héntu añáre Beyohúdi ókkol or hañsé kúchóbor tobolik gorí bolla basí loóil, zeéne ítara fúni iman ané. 8 Ar Alla, Zibá ye fottí zon or dil zane, Íba ye Beyohúdi ókkol ore yó kobul goré de híyan ítara re Pak Ruú dii yóre sábut goijjé, zendilla Íba ye añára re yó diíl. 9 Íba ye añárar edde ítarar bútore honó forók nó goré, kiyólla-hoilé ítara iman ainné de hétolla Íba ye tou ítarar dil ore yó pak goijjé. 10 Tói yala, ze zuañl añárar bafdada ókkole boói nó fare ar añára yó nó fari, íba ummot ókkol or hañdót tulí dii Alla re kiyólla entán gorór? 11 Añára biccác gorí de, añára nejat faiyí de Malik Isár rahámote, zendilla ítara yó faiyé.”
12 Hétunot manúic beggún nizám mari táikkil, ar Pául edde Bárnabas or áta Alla ye Beyohúdi ókkol or hañsé ze illayi-nicán ókkol edde taajuippa harhána ókkol daháail híin tará ttu fúnat accíl. 13 Tará ttu hotá hoiyá ói baade, Yakube hoór de, “Óu báiyain, añár hotá fúno. 14 Sáimone añára re buzáidiye de, Alla ye Beyohúdi ókkol or bútor ttu Nizor lla eggwá koum basí loito cúrut hondilla gorí ítarar uzu nozor diyé. 15 Hotá híyan lloi nobi ókkol or hotá yó mil háa; pak-kalam ot endilla asé,
16 ‘Iín baade Añí waafes aiccúm,
ar Dawud or raijjo re agor ḍóilla banaifélayum.
Híyan or báñgasúra ókkol hónggorí yóre
abar doró goríyum,
17 zeéne ar baki insán beggúne Malik ore tuwa,
bólke tamám Beyohúdi ókkole úddwa, zetará re Añár bonda ói bolla ḍaha giyé.
Malike héndilla fórmaiye, Zibá ye híin
18 bicí deri lóti zanai dii-dii aiyér.’a”
19 Yakube aró hoór de, “Hétolla añár rai óilde, Beyohúdi zetará Allar uzu fírer ítara re añára tokolif no dii, 20 bólke añára ítarar hañsé endilla lekí, ítara zen mutti re peec goijjá nafak hána na háa, zená no goré, gola sibi marifélaiya januwar or gusso na háa, edde lou na háa. 21 Kiyólla-hoilé Muúsar Córiyot tou agor zobana ttu lóti fottí cóore-cóore tobolik gorá zaar, ar fottí ebaadot or din mujilíc-hána ókkol ot telawot gorá zaar.”
Mujilíc or zuwab
22 Baade Hóborgwa gúne edde buzurgó ókkole zomát or manúic beggún lloi mili fáisela goijjé de, ítarar bútor ttu hoozzon manúic basí loi Pául edde Bárnabas or fúañti Enṭiyok ot difeçái bolla. Ítara basí loiyé de, imandár báiyain dor bútore sóddar accíl de Yohúda re, zibá re Barsába bóuli hoó, edde Sílas ore. 23 Tarár áta ítara e ceñçí gán difeçáail:
“Enṭiyok ot, Siíriyat, Kilicíyat asó de Beyohúdi imandár báiyain dore, añára tuáñrar báiyain Hóborgwa gún or edde buzurgó ókkol or torfóttu sólam.
24 Añára fúinni de, añárar héntu hoozzon manúic añárar honó hókum sára aái tuáñra re tarár hotá lói ferecan goijjé, ar tuáñrar dil ot duk diyé. 25 Hétolla añára beggúne razi-robbot ói fáisela goijjí de, hoozzon manúic basí loi tuáñrar héçe añárar adoijja Bárnabas edde Pául or fúañti difeçái bolla. 26 Bárnabas edde Pául óilde endilla manúic zetará añárar Malik Isá Moósir nam or wasté nizor zan hótarat felaye. 27 Añára Yohúda re edde Sílas ore tuáñrar hañsé difeçáir, zetará nizor muké tuáñra re añára leikkí de híin forí fúnaibo. 28 Pak Ruú ttu edde añára ttu gom laiggé de, e zoruri hotá gún baade tuáñrar uore ar honó fuñzá tulí no dii bolla, 29 ki hoilé, tuáñra mutti re peec goijjá hána na háiyo, lou na háiyo, gola sibi marifélaiya januwar or gusso na háiyo, zená no goríyo. Zodi tuáñra híin gorá ttu basi táko, bála óibo. Kúda háfiz.”
30 Baade tará re difeçá giyé, ar tará nise Enṭiyok ot giyé. Héçe tará zomát or manúic beggún ore zoma gorí ceñçí gán diyé. 31 Manúic ókkole ceñçí gán forí nosíyoti hotá loot faiyé rár, bicí kúci óoil. 32 Yohúda edde Sílas, zetará nize nobi, tará imandár báiyain dore boóut hotá loi nosíyot ókkol goijjíl, ar ítara re mozbut goijjíl. 33 Tará héçe boóut din táki baade, imandár báiyain de tará re cántir dua loi bidai diyé, zeéne zetará tará re difeçáiye ítarar héçe tará waafes zaigói fare. 34 Lekin Sílas ottu héçe táaiza gom laiggíl. 35 Pául edde Bárnabas óu Enṭiyok ot aró táikkil, ar héçe tará aró bicí maincór fúañti manúic ókkol ore Allar kalam or taalim diyat edde tobolik gorát accíl.
Pául edde Bárnabas síra óigiyoi
36 Hooddin baade Páule Bárnabas ore hoór de, “Aiyó, añára ze cóor gún ot Malik or kalam tobolik goijjílam híin ot waafes zai imandár báiyain ókkol keén asé saáigoi.” 37 Bárnabase Yohánna re fúañti loizaitó saáil. Hé Yohánna re Markus hoói yó ḍake. 38 Montor Páule íba re loizon gom no óibo bouli báippil, kiyólla-hoilé yár age íba ye ítara re Pampúliyat félai zai ítarar fúañti ham ar nó goré. 39 Híyan olla ítarar bútore eén torkatorki óiye zeén níki ítara ek zon ottu ek zon síra óigiyoi. Baade Bárnabase Markus ore fúañti loi zaáñs ot gorí Sáifrus olla bacá loiyé. 40 Montor Páule Sílas ore baiccé, ar imandár báiyain de ítara re Malik or rahámot or át ot gosái dii baade ítara rowana loiyé, 41 ar zomát or manúic ókkol ore iman ot mozbut gorái-gorái Siíriya edde Kilicíya bái zaat doijje.