Ikóniyat Pául edde Bárnabas
14
Ikóniyat Pául edde Bárnabas Yohúdi ókkol or mujilíc-hánat giíl. Héçe tará eéngorí tobolik goijjíl, zeén níki becábicí Yohúdi ye edde Beyohúdi ye iman ainné. 2 Montor ze Yohúdi ókkole iman nú ané ítara Beyohúdi ókkol ore uskai dii yóre imandár báiyain dor ulḍa matá hóraf gorídiyé. 3 Toóu Pául edde Bárnabas héçe boóut din táikkil; tará hímmot or sáañte Malik or baabute taalim dito, ar Malike tarár áta illayi-nicán ókkol edde taajuippa harhána ókkol dahái Íbar rahámot or hotá sóiyi de sábut goittó. 4 Montor cóor or manúic ókkol faáṭ-faáṭ óigilgói; kessú Yohúdi ókkol or híkka, ar kessú Hóborgwa gún or híkka. 5 Hétolla hodún Beyohúdi ye edde Yohúdi ye ítarar sóddar ókkol loi mili sólla goijjé de, Pául edde Bárnabas ore cíl or dola mari bolla edde beizzoti gorí bolla. 6 Montor tará híyan zani faijjé rár, héntu Lukáyoniya elakar cóor Lusítarat edde Darbit edde híin or atehañsór zaga ókkol ot dái giyégoi, 7 ar héçe lagatar kúchóbor tobolik gorát accíl.Lusítarat Pául edde Bárnabas
8 Lusítarat ek zon leng manúic boói tákito. Íba héndilla zormo óoil, ar honó din áñçi faijjé de nái. 9 Hé manúic cwá Pául or boiyan fúnat accíl. Páule yóggwar uzu nozor dii saiyé rár dekér de, yóggwa ttu gom ói bolla iman asé, 10 hétolla íba ye ḍak mari hoór de, “Tuáñr ṭénge uzu gorí tíyo.” Hétunot yóggwa fál mari tíaiyé ar áñçat doijje.
11 Páule goijjé de ham mán dekí manúic ókkole guzori Lukáyoniya zubane hoór de, “Añárar hañsé insán or súrote debota ókkol lami aiccé!” 12 Ítara Bárnabas or nam diíl de Zeyus, ar Pául or nam diíl de Harmis, kiyólla-hoilé íba ye kalam or hotá bicí hoitó. 13 Zeyus debotar mondir gán cóor or ekkágorí baáre accíl. Híyan or imame cóor or geiçot biríc goru ókkol edde golar mala ókkol ainníl, kiyólla-hoilé ítar ttu edde ar manúic ókkol ottu Pául edde Bárnabas or hañsé kurbani peec goittó mon accíl.
14 Montor hóborgwa Bárnabase edde Páule híyan fúinne rár, nizor gair or hoor fáçifelaye, ar manúic or ḍaái wát duñri zai guzori-guzori hoór de, 15 “Óu dustó ókkol, tuáñra iín kiyólla gorór? Añára yó tou tuáñrar ḍóilla insán. Añára tuáñrar hañsé kúchóbor tobolik gorír de ki hoilé, tuáñra e behar sis iín ottu zinda Allar uzu fíro, Zibá ye asman, zobin, doriya, edde híin or bútore ziín asé híin beggún foida goijjé. 16 Agor zobanat Íba ye tamám koum ókkol ore nizor-nizor mon mozin soilto diíl. 17 Toóu Íba ye tuáñrar hañsé endilla sis ókkol dii raikké ziíne Íbar gobá dee. Íbar meérbani iíne zahér ó, ki hoilé, Íba ye tuáñra re asman ottu zór dee edde moósum mozin fósola ókkol dee; Íba ye tuáñra re hána dee edde tuáñrar dil kúci ye furai dee.” 18 Hotá híin hoói baade yó, manúic ókkol ore bicí mockil or sáañte tarár hañsé kurbani peec gorá ttu bon gorá foijjé.
19 Montor Enṭiyok ottu edde Ikóniya ttu hoozzon Yohúdi héçe aái manúic ókkol ore nizor híkka gorífelaye. Baade ítara Pául ore cíl or dola maijjíl, ar íba morigiyói bóuli ṭáari señsai-señsai cóor or baárkule loigiyói. 20 Montor ummot ókkol íbar sairókultu zoma ói baade, íba uçí cóor or bútore waafes giyé. Ar tarfordin íba Bárnabas or fúañti Darbi cóor ot giyégoi.
Siíriya dec or Enṭiyok ot waafesi
21 Tará Darbit kúchóbor tobolik gorí bicí ummot ókkol banaiyé. Baade tará abar Lusítarat, Ikóniyat, edde Enṭiyok ot fíri giyói. 22 Héçe tará ummot ókkol or dil ore mozbut goijjíl, ar iman ot lagi tákito nosíyot gorí hoiyé de, “Añára ttu Allar raijjot gólibar age hámahá bicí mosibot ókkol bordac gorá foribó.” 23 Páule edde Bárnabase hárr zomát ot murubbi-neta ókkol tuillé, ar ruza rakí edde dua gorí ítara re Malik or át ot gosái diyé, Zibár uore ítara iman ainné. 24 Tarfore tará Pisídiya elaka bái zai Pampúliyat aiccé, 25 ar Perga cóor ot kúchóbor tobolik gorí Attáliya cóor ot giyégoi.
26 Baade héntu zaáñs ot gorí waafes Enṭiyok olla rowana loiyé, zeçé tará re ham uúin goittó Allar rahámot or át ot gosái diya giíl ziín tará ttu fura goijjá óiye. 27 Tará héçe foóñsi baade zomát or manúic beggún ore zoma goijjé, ar Alla ye tarár áta ziín-ziín goijjé híin beggún ítarar hañsé boiyan goijjé, aró boiyan goijjé de, Alla ye Beyohúdi ókkol olla yó iman or duwar kúille. 28 Baade tará héçe ummot ókkol or fúañti boóut din fán táikke.