Injil Córif or Síyara
LUKÁS
Síyara Lukás or Foriso
Síyara Lukás óilde Noya Niyom or eggwá síyara, zibát Isá Mosihr zindigir baabute boiyan goijjé. Háasgori, Noya Niyom or foóilar sairó síyara re “Injil” bouli hoó, ziyán or maáni “Kúchóbor” yáni “Gom Hóbor.” Síyara iín ore Isá mori baade Moti, Markus, Lukás, edde Yohánna ye leikké. Lukáse siríf Isár zindigir kaháni leikké de no, bólke Isá mori abar zinda ói baade Íbar cárit tune ziín-ziín goijjíl híin óu leikké, híin leikké de síyara yíba re Hamól bóuli hoó. Síyara Lukás yibá hoñtté leikké edde hoṛé leikké sóiyigori honókiye no zane, lekin boóut ulema ókkole biccác goré de síyara yibá Isá mori tokoriban hóittor bosór baade leká gíyeh.
Síyara yibár lekóya óilde Lukás, zibá ézzon dabair ḍakṭor accíl. Yóggwar lekár torikaye edde estemal goijjé de zubane dahá de, yóggwa ézzon elómdar manúc accíl. Lukás ottu Isár zindigir baabute ziín zendilla óiye héndilla sóiyigori lekíto mon accíl, zeéne foróya ókkole forí fáida hásil goré (1:1-3). Yóggwa Yohúdi nu accíl (Kolóciól 4:10-14), yóggwa ye Beyohúdi ókkole buzé de torika loi leikkíl. Híyan añára yóggwa ye Yohúdir Rosóm ókkol or baabute buzáiye de héntu zani fari (1:8).
Síyara Lukás yibá beecbák síyara Moti edde Markus loi ek ḍoilla, kiyólla-hoilé tará ek ḍoilla siz ore ek torika loi boiyan goijjé. Tiní síyarar bútore, síyara Lukás ot Lukáse bápṭismadoya Yaháyar zormor baabute tofsil or sáañte leikké, héndilla, maf gorár baabute yó tulí doijje (3:3; 11:4; 17:3-4; 23:34; 24:47), aar dua gorár baabute yó tulí doijje (3:21; 5:16; 6:12; 11:1-12; 22:32).
Súrki ókkol
1. Síyarar moksót, Yaháyar edde Isár zormo (1:1—2:52)
2. Allar ham olla Isár toiyari (3:1—4:13)
3. Galil ot Isár keramot edde tobolik (4:14—9:50)
4. Jerúsalem ot zaibar foñt ot Isá (9:51—19:27)
5. Jerúsalem cóor ot Isá (19:28—21:38)
6. Isár duk-zulúm edde moot (22—23)
7. Isá mora ttu zinda ówa (24)