11
Susim too duka' indo yolona, kuundu'i duka' kusamba' anna kupakatoto' illaam taum uhuna ma'pahenta Darius, indo to Media.”Tomahajanna kahajaam Utara anna tomahajanna kahajaam Selatan
11:2-45
2 Anna mane naua: “Tentomai, la kutulasangko kaha-kaha setappa'na la dadi. Pennassai, la kende' pole tallu tomahaja dio Persia, anna tomahaja kaappa'na la mentondom puha ia katomakakaanna anna la indo to tallu. Tappana matoho aka katomakakaanna, iya umpakahham solana la umbali kahajaam Yunani.
3 Puhai too, iya kende'um mesa tomahaja bahani matitta, la ma'pahenta sola kakuasaam kasalle anna la ma'sangka' elo' ma'suka' inaba. 4 Sapo' ia sia untammunna kamasannangam illaam kahajaanna, iya hakkam kahajaanna tipa'appa' situhu' appa' kabuttuanna hibu'. Tä'um deem pessubunna ullombungam kahajaam ia too, anna tä' deem ma'kuasa susi kalena ma'kuasa aka indo kahajaanna tä' la dibeem lako pessubunna sapo' la dibeem tau senga'.
5 Indo tomahaja dio kahajaam selatana la matoho, sapo' deem mesa pangngulunna tentahana la matoho puha ia anna la kalena, la mentomahaja ia dio ongeam senga', anna la kasalle puha kakuasaanna. 6 Sanaka-nakai too taunna lessu'na, iya umpamesam buku tomahaja kahajaam selatan anna tomahaja kahajaam utara, lambi' la dibeem lako tomahaja kahajaam utara änä'na baine tomahaja kahajaam selatan la napobaine anna mala dadi indo kasipattujuanna. Sapo' indo kamatohoam kalena la umpadadi kasipattujuam tä' di mala sule lako, susi siam duka' pessubunna tä' di mala nalombungam liu. Indo änä'na baine tomahaja kahajaam selatan dipebeem dipopepatei, susi siam duka' indo ingganna passappi'na, pandadianna,b anna muanena.
7 Sapo' tä' siam la masäe anna kende'um kasahapuanna indo baine änä'na tomahaja kahajaam selatan umbala'i mendadi tomahaja indo tomahaja kahajaam selatan. La le'ba' umbundu' tentahana kahajaam utara anna nakahabai bettenna, nabundu', anna nataloi. 8 La sangngim napamuhu ingganna pa'pasusianna to si napa'debatai, pa'pasusiam ditollo, anna ingganna pangkakka' keangga' peha' sola bulabam dipapia la nababa lako Mesir. Puhai ia too, iya napatohho opi sanaka-naka taunna umbundu' tomahajanna kahajaam utara. 9 Pissananna, indo opi tomahajanna kahajaam utara la ungkatama kahajaam selatan, sapo' la ma'pasule siam sule lako bottona.
10 Anna mane indo opi ingganna änä'na indo tomahaja ma'kalili' la lao ma'bundu', anna la uhhempum buda tentaha napasola lao ma'bundu', mangngaboba, anna mallulum anggasanna mala'bu'. Tappana la kapenduanna laoi nabundu', iya la nakahabam pole' bettenna.
11 Iya la tä' deem pada sakeaha' indo tomahajanna kahajaam selatan, lambi' mengke'de' lao umbundu' tomahajanna kahajaam utara, indo to uhhempum buda tentaha. Iya la dibeho indo tentaha buda dokko pala' limanna balinna. 12 Tappana dipasosso' indo tentaha buda, iya längämmi penabanna indo tomahajanna kahajaam selatan. Moinna anna puham umpatei mampulo sa'bu tau, sapo' tä' la susi liu matohona. 13 Iya uhhempum pole oom buda tentahana indo tomahajanna kahajaam utara kapenduanna buda puha ia anna la indo uhuna. Sanaka amoi taunna lessu'na, iya la le'ba' oom ma'bundu' umpasola indo tentaha budanna anna umbaba buda pangkakka' la napake illaam pa'bundusam.
14 Wattu eta too, buda tau la mengke'de' umbali tomahajanna kahajaam selatan. Anna deem duka' sanaka-naka to makahha' kadake sabottomu la mengke'de' pabali-bali, anna mala sule lako indo to dipa'palosaam, sapo' la tä deem loäna indo pabali-balinna. 15 Iya la sulem indo tomahajanna kahajaam utara umpopentampo litä' la naola längäm anna ungkatamai indo kota ma'bettem. Iya tä' la nabela paeba indo tentahana kahajaam selatan, anna moi indo tentaha pampilena tä' toi nabela paeba. 16 Nasuhum ussangka' elo'na indo tomahaja to sule umbundu'i. Tä' deem tau moi podo la mesa la nabela muebai. La naokko'i indo Botto Litä' Mapia anna diom lisu pala'na ke la nakahäppusannii. 17 Iya nakattum la umpassubum asam pada kamatohoam illaam kahajaam, anna la umpadeem kasipa'tulasam la sikapiai. La umbeho änä'na baine dokko lisu pala'na tomahajanna kahajaam selatan anna mala umpempa'deam indo kahajaam selatan, sapo' tä' siam sule lako indo pattujunna anna tä' deem gunana. 18 Puhai ia too, iya unggihi' opi pattujunna napalulako opi ingganna botto dio bihim le'bo' anna buda naokko'i. Sapo' deem mesa pangngulunna tentahana kahajaam senga' la untähänni indo pangngita-ita dokkona, anna tä' angga ia too sapo' la napakumbali'ipi indo pangngita-ita dokkona. 19 Puhai ia too, iya la unggihi' pole oom pattujunna la napalulako opi kota ma'bettem dio botto litä'na, sapo' la titedo anna tappa lumbunni, anna tä'um la dilambi' dikutanai.
20 Pissananna, la kende' mesa tau umbala'i mendadi tomahaja la umpake'de' mesa tuam passima la untetei kahajaanna la nahempungam katomakakaam. Sapo' tä' masäe anna dipempa'deammi indo tomahaja, taia kahana aha' taia kahana bundu'.
21 Iya la kende'um mesa to matuna umbala'i mendadi tomahaja, taia hatanna la mendadi tomahaja. Sapo' pissananna ham ia la sule mebalum mata untadongkonni okkosam kahajaam. 22 Ingganna tentaha to sule umbundu'i, la napasitebesam dio olona anna napatiampa', moi duka' indo to umbännäi pa'dandiam. 23 Tappana puha ussitukku'i pa'dandiam botto senga', iya la umpesi' tula'na anna la mengke'de' anna la matoho kakuasaanna moinna anna saidi' ha'ja'na. 24 Pissananna ham ia la ungkatama buda ongeam malompo illaam indo botto, anna umpogau'i pa'pogausam tää'napi deem si napogau' tomatua to napotomatua sola nene to naponene. La untaba dangge' pahappana, pamuhunna, anna kullena lako ha'ja'na. Ma'pattuju bunipi duka' la lao umbundu' ongeam ma'bettem, sapo' tä' siam la masäe.
25 La umpasumpu kamatohoanna anna kabahanianna la umbundu' tomahajanna kahajaam selatan umpasola tentaha buda. Moi anna umpatoka kalena indo tomahajanna kahajaam selatan umpasola tentaha buda anna matoho, sapo' tä' siam la nabela paeba, aka la dipa'pattujuam bunim. 26 Anna indoi siam to si namesa ande namesa ihusam la uhhonnosanni. La dipasitebesam tentahana anna buda la dipatei. 27 Bassim ma'pikki' kadake indo dua tomahaja. Sikohe yabo meja napasindum siam sipa'ägä-ägäsam, sapo' bassim tä' la sule lako indo pa'pikki'na, aka tä'pi lambi' indo wattu puha dipa'tantu. 28 Iya la ma'pasule sule lako bottona indo tomahajanna kahajaam utara umbaba pamuhunna, anna ma'pattujum illaam penabanna la umbali to manontom lako pa'dandiam maseho. Moi aka napogau' assala' mala sule lako indo to napattuju illaam penabanna, mane ma'pasulei lako bottona.
29 Tappana lambi' indo wattu puha dipa'tantu, iya la le'ba' pole oom ungkatama kahajaam selatan, sapo' inde kapenduanna tä' opi la susi indo lessu'. 30 Aka la sule sanaka-naka kappala'na to Kitimc la muebai, nasuhum mäläi penaba muanena. Lambi' la ma'pasule muämä isi lako pa'dandiam maseho anna la umpalako indo to napattuju illaam penabanna. Tappana ma'pasule, iya la umpa'kasallei indo to umpa'kalembei indo pa'dandiam maseho.
31 La mengke'de' tentahana ussahupu'i ongeam maseho battu diua ongeam dibettem. Umpa'dei bua pemala' si dipalako allo-allo anna umpake'de' pa'pasusianna to ungkähä kakadakeam la metallangam. 32 Anna la ullulu-lului ingganna to untekka indo pa'dandiam lambi' umpesi' kamatappasanna. Sapo' umma' to muissam tongam Puang Allataala to napenombai la tontä ia matoho anna la paeba.
33 Anna ingganna to majatta illaam alla'-alla'na umma' ia too la iam too umpapähänni buda tau. Sapo' tä' siam masäe anna napatilika'um pa'dam piha, naande api piha, disakka piha, anna dihampo' piha. 34 Mahassanni too dadi indo pandahhaam, iya deemmi sule pepamolo saidi', anna la buda tau naägä'i lelem umpentappai. 35 La deem piha dihonnosam indo to majatta anna malai disehoi, dibahassii, anna dipattinni sule lako allo ma'katampasam, aka diampaipi indo wattu puha dipa'tantu.
36 Indo tomahaja la ma'sangka' elo' ma'suka' inaba. La ussanga-sanga kalena anna la muangga' kalena ma'kuasa puha ia anna la ingganna debata lino. Anna la umpassubum tula' handam kadake lako Puang Allataala to ungkuasai ingganna debata lino. La mallolongam kasalle sule lako umpalippä' aha' kasalleNa Puang Allataala, aka indo to puha dipa'tantu la dadi tä' mala tala dipalako. 37 Anna tä' toi la umposamele ingganna indo debatanna nene to naponene. Susi indo si napenombai buda baine teem toi ingganna debata senga' tä' duka' la naposamele, aka ussanga-sanga kalena indo tomahaja lako ingganna indo debata lino. 38 Sapo' napasullei hi la umpenombai debatanna ingganna bettem battu diua debata to tä' naissam nene to naponene. La napenombai umpake bulabam, peha', permata, anna baham-baham keangga'. 39 La nakahaba ingganna bettem matoto'na napamoloi indo debatanna bettem. Menna-menna muakui indo debatanna botto senga', la sangngim napalambi'i pa'pakasalle, anna la nabeem kakuasaam umpahenta buda tau, anna la natabaipi litä' mendadi sahona.
40 Sapo' tappana illaam allo ma'katampasanna, iya la nabundu' tomahajanna kahajaam selatan, anna la napabala'i duka' kahajaam utara nabundu' anggasanna talimpuhu' umpake tentaha ma'bendi, tentaha ma'daham, anna buda kappala'. La ungkatama buda botto, mangngaboba, anna natilulunni anggasanna mala'bu'. 41 La ungkatama duka' Botto Litä' Mapia, anna la buda tau napempa'deam. Sapo' lappa' ia dio mai pala' limanna bottona to Edom, bottona to Moab, anna ingganna to kasalle dio Amon. 42 Umpakalua' kakuasaanna lako buda botto, anna tä' duka' nasala lembäna Mesir. 43 La ungkuasai asam ingganna pangkakka' bulabam, peha', anna ingganna baham-baham keangga' dio Mesir. Anna la umbeho kalena to Libia anna to Etiopia nakuasai. 44 Sapo' la napatinggi'gi' kaheba buttu illaam mai tandai mata allo anna dio mai tandai utara, nasuhum la mengke'de' tä' deem pada sakeaha' anna le'ba'i la umpadahi kapu' anna umpempa'deam buda tau. 45 La umpake'de' kema kasalle ma'sanga illaam alla'na le'bo' anna indo tanete matande anna maseho,d sapo' la lambi'um lämpä'na anna tä' deem tau la umpesäkäi.”