Daniel 10

To dipa'palosaam lako Daniel dio bihim Salu Tigris

10:1-11:1

Illaanni taum katallunna ma'pahenta Koresh, tomahaja Persia, iya dipalambi'im tula' Daniel, indo si disangai duka' Beltsazar. Indo tula' dipalambi'iam diona mesa passibundusam kasalle anna mannassa la dadi. Iya napähäm Daniel indo tula' dipalambi'i anna naissam kalembasanna indo to dipa'palosaam.

2 Wattu eta too, kao Daniel, mahassam anggasangku to ma'bahata tallu minggu masäena. 3 Kinande mammi' tä' kuande, bale, anna anggur tä' deem kupaissoi pudu'ku, anna tä' deem umpakeä' minnä'-minnä' bubanau' buttu' tallu minggu.

4 Illaanni allo kaduapulona appa', bulam uhuna, wattunna dioä' bihinna salu kasalle, battu diua Salu Tigris, 5 kuäkä' pennenne'ku, iya kuitam mesa tau umpa'poheba sampim linen anna ma'beke' bulabam buttu dio mai Ufas. 6 Pangkihha' susi permata kalena, pangkähhä susi tikiäna kila' lindona, anna anggasanna lekke'na obor matanna. Millo' susi tembaga puha dipaillo' katea'na sola bitti'na, anna henggem pa'tula'na anggasanna tau buda.

7 Anggam kao Daniel muitai indo to dipa'palosaam, tä' ia naita indo to kupasola. Sapo' sangngim häntä pebaba', nasuhum le'ba'i sikalumpa' membuni. 8 Iya mesa-mesangku mandam tohho, umpetua' indo to dipa'palosaam mepilla'-pilla'. Mäläi bukungku muitai. Maputtum lindoku, anna malu'bä'ä'. 9 Iya kuhingngim ma'tula'. Tappana kuhingngi pa'tula'na, iya tissämbä' siahamä' malimpä tappa lumbä dokko litä'.

10 Iya pissananna ham ia deem lima uhhaka'ä' anna nabangongannä', iya ma'balinguntu'mä' anna messundemme' limangku. 11 Mane nauaannä': “O Daniel, iko to dipakamaja, paalai penaba inde tula' kupalanda' matim anna ke'de'ko längäm, aka tentomai disuaä' sule umpellambi'iko.” Puhai nauaannä', iya ke'de'mä' längäm lumalla'-malla'.

12 Mane nauaam poleä': “Daa ummahea' Daniel, aka indopi allo uhuna kende' illaam penabammu maelo' ullambi' kapaissangam anna umpopengkadioko kalemu dio oloNa Puang Allataala to umpenombai, anna dihingngiammi indo pelauammu. Iya sulemä' tentomai aka indo pelauammu. 13 Dehe-dehe liu dio ongeanna indo malaika' to ma'kuasa dio kahajaam Persia nabali-baliä' dua pulo mesa allona. Sapo' sule Mikhael mesa duka' pangngulunna malaika' to kesanga napamoloiä', aka natähännä' ingganna to kasalle dio kahajaam Persia dio indo ongeam. 14 Suleä' umpapähänniko diona kaha-kaha la dadi lako sabottomua' illaam allo mane la sule, aka inde to dipa'palosaam silombum duka' indo allo mane la sule.”

15 Mahassanni natulasannä' kaha-kaha ia too, iya tukku-tukkumä' mennenne' dokko litä' anna tä' mala tiku'mi' pudu'ku. 16 Pissananna deem anggasanna änä' to lino uhhaka' bibingku. Iya mala siaham tiku'mi' pudu'ku anna kupahandu'i ma'tula' lako indo to ke'de' dio oloku kuua: “O puäku, naputu'ä' pi'di'ku anna mäläi kamatohoangku napobua' indo to dipa'palosaam. 17 La maakam ia susi la napa'tula'iko inde sabua'mu puäku? Pa'dem kamatohoam kuampuam anna pu'du'um penabangku.”

18 Iya nahaka' pole omä' indo to anggasanna änä' to lino anna nabeennä' kamatohoam, 19 anna ma'kadai naua: “O to dipakamaja, daa ummahea'! Nalambi'ko kamasannangam! Pomatohoi penabammu, pomatohoi penabammu!”

Mahassanni napa'tula'iä', iya matohomä' sule kusi'dim anna ma'kadaä' kuua: “Pa'tula'ko puäku, aka puhangko umbeennä' kamatohoam.”

20 Iya nauaammä': “Muissam daka anna suleä' kupellambi'iko? La bale' ma'pasulemä' lao sibundu' indo malaika' to ma'kuasa dio kahajaam Persia. Lessu'ä' too, iya sulem malaika' to ma'kuasa dio kahajaam Yunani. 21 Sapo' la kutulasangko indo tituli' illaam Suha' Kamaloloam.

Tä' deem moi podo la mesa tau muundu'iä' muebai, anggam Mikhael malaika' to ma'kuasa dio Israel.