Sambajanna Daniel
9:1-19
9
Illaam taum uhuna ma'pahenta tomahaja Darius änä'na Ahasyweros, pessubunna to Media, to mendadim tomahaja yabona kahajaam Kasdim,a 2 iya illaam taum eta too kao, Daniel, mahassannä' umpahessa sanaka-naka suha' maseho, lambi' kuissam hekenganna taum la daum labuam Yerusalem la pitu pulo taum masäena situhu' kadanNa DEBATA lako nabi Yeremia. 3 Iya kupasatutum pennenne'ku längäm Puang Allataala Debatanta ma'sambajam anna melau, kupasindum ma'puasa anna ma'poheba bahata sola umpengkalupesso'i täiabu.4 Ma'sambajannä' längäm DEBATA, Puang Allataala to kupenombai anna muakuiä' dosaki kuua: “O Debata, Puang Allataala to ma'kuasa kasalle anna mepakahea', muantiKo manda' untobe matoto' pa'dandiamMu anna umpake pangkaha' pa'kamase takattu tintim tamondo' sahuham lako to umpake pangkaha' pa'kamase lako kaleMu anna to muanti manda' untobe matoto' pahentaMu! 5 Puhangkam umpogau' dosa anna kasalaam, ma'gau' tamendiada' anna pabali-bali dio oloMu. Kitekka kalo' kilambam mata uwai pahentaMu anna ätohamMu. 6 Tä'kam mendalinga lako mentu' sabua'Mu, battu diua ingganna nabi, to ullombungangKo pudu'Mu ma'tula' lako ingganna tomahajangki, lako ingganna to pepungngu'ki, lako ingganna nene to kiponene, anna lako ingganna pakketauam illaam botto.
7 O Debata, Iko-Iko to sanda malolo, sapo' kami'-kami' malea lindokam allo temo. Kami' to Yehuda, issinna Yerusalem, anna ingganna to Israel, to umpatisembu' dalle batte lako mobotto-bottoam susi to mahuku' teem to mambela aka silele umpa'lullu' kamatappasanna lako kaleMu. 8 O DEBATA, nahuhangkam longko' susi kaleki, teem ingganna tomahajangki, ingganna to pepungngu'ki, anna ingganna nene to kiponene, aka puhangkam umpogau' dosa lako kaleMu. 9 Debata, Puang Allataala to kipenombai siampuam himpa' himanam anna pa'panampum, moinna anna puhangkam pabali-bali lako kaleNa. 10 Tä' kipehingngii pa'kadamMu DEBATA, Puang Allataala to kipenombai, ussuakam la tubo untuhu'i paondom to puha umbeengkam muolai mentu'na sabua'Mu, battu diua ingganna nabi. 11 Ingganna to Israel sangngim puha untekka paondomMu anna lempä dio mai aka tä' umpehingngii pa'kadamMu. Nasuhum umpatalodoikam tädo to didandi illaam suha' Pepaondonganna Musa, indo sabua'Mu, aka puhakam umpogau' dosa lako kaleMu. 12 Anna puhangKo umpalako battakadamMu indo to puha umpokada lako kami' anna lako ingganna to ma'kuasa napahentakam la napasuleangkam sussa tanggana-gana. Puham umpadadi dio Yerusalem indo sussa tanggana-gana, tä'pi ia deem dadi lako ongeam senga' nakumbä langi' nahande tana. 13 Umba susi puha tisuha' illaam suha' Pepaondonganna Musa, ingganna sussa tanggana-gana ia too puhangkam nahua. Sapo' tä' deem kipeä lalanna la kipomasannangangKo penabamMu DEBATA, Puang Allataala to kipenombai, la ma'tandaam illaam ussossokam gau'ki untingko' basabangki lambi' ma'pasule lako kaleMu anna kipasalui manappa penaba kamaloloamMu. 14 Iam too anna umpatokam DEBATA indo sussa tanggana-gana anna umpahuaikam. Aka Iko DEBATA, Puang Allataala to kipenombai, muundu'Ko lollä illaam ingganna pa'palakoamMu, sapo' tä' kipehingngii pa'kadamMu.
15 Dadi tentomai, o Debata, Puang Allataala to kipenombai, puhaKo ullappasam umma'Mu illaam mai lembäna Mesir umpake katea' bassimMu anna kaleleam sangamMu, anna tontä liupi sule lako allo temo. Madosangkam, ma'gau' tamendiada'ungkam. 16 O Debata, situhu' kamaloloamMu, kela mala aha'Mu anna aha' kasalleMu lappa' dio mai Yerusalem, kota ampuamMu, battu diua tanete masehoMu. Dosaki anna kasalaanna nene to kiponene napolalam Yerusalem sola umma'Mu napobutä' isi ingganna hupatau to umpali'-pali'kam. 17 Dadi tentomai, o Puang Allataala to kipenombai, hingngianni sambajanna anna pelauanna inde sabua'Mu, paähhäi lindo maluteMu ongeam masehoMu to hu'bummi, anna mala titandeKo Debata. 18 O Puang Allataala to kupenombai, patanannii talinga anna hingngiangkam! Nenne'i anna muitai katilakaangki anna kasägänganna kota to dipakonai sangamMu. Aka umpalanda'kam pelauam dio oloMu tä'kam untuntum dohoki, sapo' la situhu' himpa' himanamMu tadipuha-puha. 19 O Debata, hingngiangkam! O Debata, panampungkam! O Debata, paalai penaba anna palakoi inde pelauangki. Daa umpa'dako'i anna mala titande sangamMu o Puang Allataala, aka dipakonaiKo umma'Mu anna kota ampuamMu.”
Pitu pulo sanda sipitu wattu ma'tantu masäena
9:20-27
20 Mahassampä' ma'tula', ma'sambajam, muakui dosaku, sola dosana sabottoku to Israel, anna umpakende' pelauangku dio oloNa DEBATA, Puang Allataala to kupenombai, umpelauam tanete masehoNa Puang Allataalab to kupenombai, 21 iya tä'pi teppu' tula'ku illaam indo sambajangku, anna tipa'siu ham mentia' Gabriel sule napenandaiä' wattunna dibaba bua pemala' dipalako mahammo. Indo Gabriel ia siam indo to kuita illaam indo to dipa'palosaam lessu'. 22 Mane napa'tula'iä' napaissanni naua: “O Daniel, tentomai suleä' la umbeengko pikkiham mandalam anna kapaissangam. 23 Tappana umpahandu' umpakende' pelauammu, iya messubum siaham kadanNa Puang Allataala. Iya sulemä' kutulasangko aka iko mesako to tä' deem pada sadipakamaja. Dadi, paalai penaba kada ia too anna umpasalui penaba indo to dipa'palosaam!
24 Puham dipa'tantu pitu pulo sanda sipitu wattu ma'tantu masäenac la dadi lako sabottomu to Israel, anna lako kota masehomu la dipopeanggam to patekka. La dipatohhom to umpogau' dosa, la dipadeem kasikapiaam lako to kasalaam, la dite'geham kamaloloam sule lako salako-lakona, la diganna'i to dipa'palosaam sola kada dipayolo lambam, anna la disussui minnä'-minnä' ongeam handam maseho.
25 Dadi, pengngissannii anna pengkalesoi: Napahandu'na messubum pahenta, battu diua wattunna dipasusii inna susinna anna dipake'de' sule Yerusalem, sule lako kasuleanna mesa to kuasa dilanti' ditolloi minnä'-minnä', la pempitu sanda sipitu wattu ma'tantu masäena. Anna pengngannam pulo dua sanda sipitu wattu ma'tantu masäena la padam too masäena dipake'de' sule kota ia too sitonda pa'hanteam kalua' illaam tängäna anna dikalo' lao pali', sapo' wattu eta too la kende' kamasussaam. 26 Lessu'i too indo pengngannam pulo dua sanda sipitu wattu ma'tantu masäena, iya dipempa'deammi indo to dilanti' ditolloi minnä'-minnä' moi kela daa tä' deem kasalaanna. Iya sulem mesa to kuasa sola pakketauanna anna umpadahi kapu'i indo kota sola ongeam maseho. Ma'katampasanna, la sule sihhapam mala'bu', anna sule lako allo ma'katampasam la kende' liu pa'bundusam, umba susi inna puham dipa'tantu. 27 La umpadeem pa'dandiam matoto' indo to kuasa sola buda hupatau pissam illaam indo pitu wattu ma'tantu masäena, anna illaam tängäna indo pitu wattu ma'tantu masäena la napatohhom dibaba tunuam anna bua pemala'. Anna yabo bubunganna Banua Debata la sule to ungkähä kakadakeam la metallangam, sule lako wattunna indo puha dipa'tantu la dipadahi kapu' indo to ungkähä kakadakeam la metallangam.”