Domba laki anna beke laki
8:1-27
8
Illaanni taum katallunna ma'pahenta tomahaja Belsyazar, iya kao Daniel, dipalosai omä' mesa kaha-kaha senga' tappana lessu' indo yolona.2 Tappana kupengkalesoi indo to kuita illaam indo to dipa'palosaam, iya dioä' bettenna kota Susan, dio propinsi Elam, anna mahassannä' ke'de' dio bihinna palempä Ulai. 3 Iya kuäkä'um pennenne'ku angku pengkalesoi, iya kuitam mesa domba laki dua tandu'na ke'de' dio bihinna indo palempä. Bassim kalando indo tandu'na, sapo' kalando puha indo mesa. Ibundi ia tubo indo tandu' to kalando puha. 4 Iya kuitam indo domba laki paseho sau' katampusam, lako utara, anna lako selatan. Sangngim tä' nabela ma'geu' olo'-olo' muoloi, anna tä' deem mala ullappasam kalena dio mai kakuasaanna. Ma'sangka' elo' anna tuttuam ma'kuasa.
5 Mahassanni kupetua'-tua' kaha-kaha ia too, iya kuitam sule mesa beke laki buttu dio mai tandai katampusam, ussamba senambo lino tä' hampi bitti'na dokko litä'. Indo beke laki deem mesa tandu'na tintuhä' illaam mai alla' matanna. 6 Le'ba' umpenandai indo domba laki dua tandu'na to kuita dio bihim palempä, anna kumondäi napellambi'i tä' deem pada sakeaha'. 7 Mane kuitai tä' deem pada sakeaha' umpengkahuku'i indo domba laki. Natandu', iya bassim polo indo tandu'na. Tä' nabela ma'geu' indo domba laki muoloi. Natalambungam dokko litä' anna napa'ku'nä'i. Tä' deem to mala ullappasanni indo domba laki dio mai kakuasaanna. 8 Iya tuttuam ma'kuasa indo beke laki. Sapo' tappana kalaoanna matoho, iya polom indo tandu' tintuhä'na. Iya napessullem dio mai appa' tandu' tintuhä', tungga' mentuho lako appa' kabuttuanna hibu'.
9 Deem mesa indo tandu'na messubum mesa tandu' bahinni' illaam mai tuttuam lobo' lambi' tä' deem pada sakasalle mentuho lako tandai selatan, anna lu lako tandai mata allo, anna lu lako Botto Litä' Mapia.a 10 Tuttuam lobo' indo tandu' lambisam ussoka tentaha suhuga. Iya deem piha indo tentaha suhuga sola bintä nahonnosam tama lino anna napa'ku'nä'i. 11 Anna ma'salle inaba polepi duka' lako Pangngulunna tentaha suhuga, anna uhhappa bua pemala' si dibaba allo-allo lako oloNa Puang Allataala, anna nahompoam indo ongeam masehoNa. 12 Kahana indo pa'pogausam kadakena dibehoampi dokko lisu pala'na ingganna tentaha suhuga sola indo bua pemala' si dibaba allo-allo. Untalambungam kamaloloam dokko litä', anna iai napogau' iam dadi.
13 Anna mane kuhingngi mesa malaika' ma'tula', anna mane natimba'i mesa malaika' senga' naua: “La pada hia umba masäena dadi inde to dipa'palosaam: uhhappa bua pemala' si dibaba allo-allo, gau' kadake umpasule katilakaam, umpebeem ongeam maseho, anna ingganna tentaha suhuga dipa'ku'nä'?”
14 Iya natimba'im naua: “La pendua sa'bu tallu hatu' tä' la dipalako indo hettem pissam kahubem anna pissam mebengngi', mane dipakegunai sule ongeam maseho umba susi inna susinna.”
15 Pissananna kao-kao, Daniel, kupetua'-tua' indo to dipa'palosaam anna kupeä lalanna la kupengngissanni, iya pissananna ham ia ke'de'-ke'de' dio oloku anggasanna hupatau muane. 16 Mane kuhingngii gamahanna hupatau metamba dio mai tängäna palempä Ulai naua: “O Gabriel, paissannii inde tau kalembasanna indo to dipa'palosaam!”
17 Iya sulem napengkahuku'i indo ongeam kuongei ke'de', anna tappana sule, iya tä' deem pada samahea'ä' lambi' tappa lumbää'. Iya nauaammä': “O änä' to lino, pengngissannii muua indo to dipa'palosaam diona allo ma'katampasanna.”
18 Mahassanni napa'tula'iä', iya malimpämä' lumbä-lumbä dio litä'. Sapo' naanda'iä' anna nabangongannä' sule.
19 Anna mane naua: “Pennassai, la kutulasangko indo la dadi ke wattunnam la ma'tämpä' inde aha' kasalle, aka inde to dipa'palosaam diona allo ma'katampasanna to puha dipa'tantu. 20 Indo domba laki muita dua tandu'na, ia too tomahaja Media anna tomahaja Persia diuaam. 21 Anna indo beke laki kalando bulunna, ia too tomahaja Yunani diuaam. Anna indo tandu' tintuhä' tubo illaam mai alla' matanna, ia too tomahaja uhuna kahajaam Yunani diuaam. 22 Anna indo tandu' to polo anna napessullei dio mai appa' tandu', kalembasanna appa' kahajaam la kende' dio mai botto ia too, sapo' tä' la pada kamatohoanna indo kahajaam uhuna.
23 Anna dio tämpä'na kapahentaanna indo appa' kahajaam ke lempammi gau' kadakena to tameada', la kende' mesa tomahaja mato'do' lindona anna manähhä-nähhä. 24 La liba' matohona, sapo' taia kamatohoam buttu di kalena. La umpakende' katilakaam tä' deem pada sakasalle, anna la sule lako asam ingganna napogau'na. Buda to matoho la napempa'deam, susi toi duka' umma' to maseho. 25 Anna kahana kamanähhä-nähhänganna, iya la sule lako indo pantipuam napogau' anna la salle inaba. Tappana ussi'dim kamasannangam anna kamalinoam hupatau, iya la pissananna ham ia umpatei bäbä buda tau, anna mengke'de' umpobali Tomahaja yabona ingganna tomahaja. Sapo' tä' deem la natumbu hupatau anna dahi ambummi.
26 Anna indo to dipa'palosaam diona tä' la dipalako hettem pissam kahubem anna pissam mebengngi' indo to puha ditula' ingngena' ia too abana tappa'. Sapo' iko-iko, la umbuniangam indo to dipa'palosaam, aka kaha-kaha ia too ma'tula' diona wattu ma'tantu masäena mambelapi mane dadii.”
27 Iya kao Daniel, malu'bä'mä' anna masakiä' sanaka-naka allona. Puhai, iya bangommä' angku palako oo sule indo pengkähängam nabeennä' tomahaja. Pilla'ä' anna mängä-mängä diona indo to dipa'palosaam anna tä' mala kupähäm.