Appa' olo'-olo' anna änä' to lino
7:1-28
7
Illaam taum uhuna ma'pahenta Belsyazar, tomahaja Babel, iya mangngimpi Daniel anna dipalosai wattunna metindo dio petindoanna. Iya natuli'um gahi' kasallena indo pangngimpinna.2 Naua Daniel: “Indo dipalosäiä' wattu bengi, kuita hibu' buttu dio mai appa' kabuttuanna yabo langi' untappi le'bo' kalua'. 3 Mane kende'i dio mai le'bo' appa' olo'-olo' tä' deem pada sakasalle tungga' senga' hupanna.
4 Uhuna, susi singa hupanna, sapo' ma'pani' susi bunia gege. Iya kupetua'-tua' lium sampe tässu' lao indo pani'na anna tiäkä'i sapolona dio mai litä' anna ke'de' taui mehhondo dua bitti' ibundinna anna dipatamai penaba hupatau.
5 Kaduanna, kuita mesa olo'-olo' senga' susi hupanna beruang. Tiäkä' längam sapolona anna untoä tallu buku usu'. Dipa'kadai diua: ‘Ä, pabudai bale muande!’
6 Anna mane kuita mesa olo'-olo' senga' susi hupanna macan tutul. Appa' pani'na yabo boko'na susi pani' dassi, appa' ulunna, anna dibeem kakuasaam.
7 Tappana kupetua'-tua' liu indo to dipalosaiä' bengi eta too, iya kuitam olo'-olo' kaappa'na mepakahea', mekähhä bulu, anna tä' deem pada samatoho. Ma'isi bassi si kasalle, ussoho anna ungkukku pealanna, mane napa'kuttä'i la'binna. Inde olo'-olo' sisala indo olo'-olo' to yolo kende', anna sapulo ia tandu'na.
8 Mahassanni kupetua'-tua' indo tandu'na, iya kuitam mesa tandu' bahinni' tubo illaam alla'-alla'na indo sapulo tandu', lambi' tihebu' tallu indo tandu' yolo tubo. Deem mata kuita susi mata tau dio indo tandu' bahinni' anna pudu' ma'tula' saboä.
9 Mahassam liupi kupetua'-tua',
iya dipaokko'um sanaka-naka okkosam kahajaam.
Anna naokko'i To Tubo Batu.
Mabusa susi salju pohebaNa
anna mabusa susi bulu domba beluä'na.
Okkosam kahajaanNa anggasanna api mellelo
anna ingganna legenna susi api sundällä'.
10 Messubum api ma'salu-salu
dio mai oloNa.
Massa'bu-sa'bu to mengkähäNa,
anna mampulo sa'bu to mengkähä ke'de' dio oloNa.
Mane dipahandu'i pahhottosam
anna dibilläi sanaka-naka suha'.
11 Iya kupetua'-tua' lium, aka kuhingngi liupi tula' saboäna indo tandu'. Kupetua'-tua' lambi' dipatei indo olo'-olo' anna diette' kombenni indo bakkena mane ditibei tama api ma'nala-nala. 12 Diäläi duka' kakuasaanna indo olo'-olo' senga', sapo' dipabäi liupi ia tubo sule lako wattu puha dipa'tantu anna paluäna wattu ma'tantu masäena.
13 Iya kupetua'-tua' lium indo to dipa'palosaam bengi eta too, iya kuitam sule illaam gabum yabo langi' mesa hupa anggasanna änä' to lino. La le'ba' umpellambi'i To Tubo Batu, anna dipasolai lako oloNa. 14 Anna mane dibeem kakuasaam, kamatandeam, anna kahajaam lambisam ingganna hupatau dio mai ingganna botto, kahajaam, anna basa manibi dio olona. Kakuasaanna, kakuasaam sule lako salako-lakona, anna kahajaanna, kahajaam tä' deem la dipempa'deam.
15 Iya kao Daniel, masussa penabangku, anna tinggi'gi'ä' umpikki'i indo to dipa'palosaam. 16 Iya kupengkahuku'im mesa tau indo to sikake'de' eta too anna kupelaui napomasiäsannä' ingganna kadadiam ia too.
Iya ma'tula'um anna natulasannä' kalembasanna kaha-kaha ia too naua: 17 ‘Indo appa' olo'-olo' kasalle, kalembasanna appa' tomahaja la kende' illaam lino. 18 Sapo' ingganna to maseho ampuanNa To Handam Matande la dibeem kahajaam ia too, anna ia la muanda'i liu babangam kapahentaam illaam kahajaam ia too sule lako salako-lakona, mannassa sule lako salako-lakona.’
19 Anna mane maelo'ä' kuissam kalembasanna indo olo'-olo' kaappa'na, indo to sisala olo'-olo' senga'. Tä' deem pada samepakahea', ma'isi bassi, anna ma'kanuku tembaga, ussoho anna ungkukku pealanna mane napa'kuttä'i la'binna. 20 Anna maelo' toi kuissam kalembasanna indo sapulo tandu' yabo ulunna, anna diona indo tandu' senga' to mane tubo lambi' polo indo tallu yolo tubo. Indo tandu' mane tubo deem matanna anna deem pudu'na ma'tula' saboä. Anna mentondom puha ia diita anna la indo tandu' senga'. 21 Mahassam liupi kupetua'-tua', iya kuitam indo tandu' ma'bundu' mueba ingganna to maseho anna sangngim nataloi, 22 lambi' sule indo To Tubo Batu muundusam kamaloloam indo ingganna to maseho ampuanNa To Handam Matande. Iya lambi'um wattunna la umbaba kapahentaam indo ingganna to maseho.
23 Iya nauam indo tau: ‘Indo olo'-olo' kaappa'na kalembasanna kahajaam kaappa'na la kende' illaam lino. Kahajaam ia too sisala ingganna kahajaam senga' anna la ussoho senambo lino, napa'kuttä', anna nakukku. 24 Indo sapulo tandu' kalembasanna sapulo tomahaja la kende' dio mai kahajaam ia too. Lessu'i too, iya kende'um mesa tomahaja la sisala indo tomahaja mendiolona, anna la uhhonnosam tallu tomahaja. 25 La umpassubum tula' pabali-bali lako To Handam Matande, anna la undahha tubo ingganna to maseho ampuanNa To Handam Matande. La napeä lalanna ussole' allo kasalle anna ätoham. Ingganna to maseho la dibeho tama pala' limanna, iya la nakuasai pentallum anna setangnga wattu si ma'tantu masäena.
26 Pissananna, la dipalako pahhottosam anna diäläi kakuasaanna lambi' dipempa'deam anna dipadahi kapu' sule lako salako-lakona. 27 Mane dibehoi kapahentaam, kakuasaam, anna kamatandeanna ingganna kahajaam illaam lino dokko lisu pala'na indo ingganna to maseho ampuanNa To Handam Matande. Kahajaanna, kahajaam sule lako salako-lakona. Ingganna to kuasa la manibi anna manuhu' dio olona.’
28 Susim too tämpä'na inde tula'. Iya kao Daniel, tinggi'gi'ä' umpikki'i, anna malea malatto' lindoku. Sapo' kupaillaam penabangku kaha-kaha ia too.”