Daniel anna leä singa
6:1-29
6
Iya napessullem Darius, indo to Media umpahenta kahajaam ia too. Kiha-kiha annam pulom dua taunna wattu eta too. 2 Pissananna nakattu Darius muäkä' sahatu' dua pulo gubernur la ma'pahenta illaam paluäna indo kahajaam, 3 la nakapalai tallu to ma'pangka' malangka', iya Daniel mesa indo to tallu. Iam too inde to tallu la naongei indo ingganna gubernur untula' pa'palakoanna anna mala tä' hugi tomahaja. 4 Iya Daniel handam mentandolängäm hatta'na padai indo to ma'pangka' malangka' anna ingganna gubernur, aka nasalokko' ia penaba tadisihanteam. Nasuhum napattuju tomahaja la muäkä' Daniel la umpahe' ingganna to muanda'i babangam kapahentaam illaam paluäna kahajaanna.5 Iya napeäm lalanna indo solana to ma'pangka' malangka' anna ingganna gubernur, anna mala deem dipa'polalanni la uhhonnosam Daniel diona babangam kapahentaam. Sapo' tä' deem nalambi' moi podo la mesam la dipa'polalanni battu haka kasalaanna Daniel aka mesa to manontom, anna tä' deem dilambi' la naägä'inna ma'gau' kadake battu haka la umpogau' kasalaam. 6 Iya sipa'tula'-tula'im naua: “Tä' deem talambi'a' moi podo la mesam la dipa'polalanni uhhonnosam Daniel, sulibanna ke dionai kamanuhusanna lako pahentaNa Puang Allataala to napenombai.”
7 Puhai, iya le'ba'im mengngolo lako tomahaja indo ingganna to ma'pangka' malangka' anna ingganna gubernur anna nauaanni: “O tomahaja Darius, la mahendem dako too! 8 Ingganna to ma'pangka' malangka' illaam inde kahajaam, ingganna to kuasa, ingganna gubernur, ingganna to si ma'pakilala illaam kahajaam, anna ingganna bupati, puham ussahandanni kada anna mala umpassubungko suha' pahenta tomahaja la dipehhondoi la naua: Menna-menna umpakende' pelauam lako debata battu haka hupatau illaam inde tallu pulo allona, sulibanna lu matim tomahaja, la ditibe tama leä singa. 9 Dadi tentomai tomahaja, passubunni mesa suha' pahenta anna untandatangannii tä'um mala disole' anna la mendadim ätohanna to Media anna to Persia, tä'um mala dihuntu' sule.” 10 Nasuhum umpassubum suha' pahenta tomahaja Darius anna natandatanganni la dipehhondoi.
11 Tappana naissam Daniel naua puham ditandatanganni indo suha' pahenta, iya le'ba'um lako banuanna. Deem sanaka-naka suleba' yabo tambinna tando längäm memba'ba lako Yerusalem. Iya si ma'balinguntu'um Daniel, ma'sambajam, pentallum sangngallo, anna umpuji Puang Allataala to napenombai, umba susi biasa napogau'. 12 Pissananna, suleim indo to umpeängam tuntungam su'be' Daniel, iya nalambi'um mahassam ma'sambajam anna umpakende' pelauam längäm Puang Allataala to napenombai.
13 Iya le'ba'im mengngolo lako tomahaja anna ma'tula'i diona indo suha' pahentana tomahaja naua: “O tomahaja, tä' daka tia puhangko untandatanganni suha' pahenta la dipehhondoi, anna maka' deem tau umpakende' pelauam lako sala'-sala' ianna debata, battu haka lako hupatau, illaam inde tallu pulo allona sulibanna lu matim tomahaja, iya la ditibe tama leä singa?” Iya natimba'im tomahaja naua: “Tappa' susi situhu' ätohanna to Media anna to Persia, tä'um mala dihuntu' sule.” 14 Iya nauaim: “Indo Daniel, mesa duka' to dipahhim dio mai Yehuda, tä'ko napehingngii tomahaja battu diua tä' natuhu'i indo suha' pahenta to untandatanganni, sapo' si pentallum ia sangngallo umpakende' sambajam.” 15 Nahingnginna tomahaja kaha-kaha ia too, iya tä' deem pada samasussa penabanna. Lambi' nakattum illaam penabanna la ullangnga'i Daniel. Sule lako lendu' allo, napeä liupi lalanna la nalappasam.
16 Pissananna, sulei oham indo to umpeängam tuntungam su'be' Daniel mengngolo lako tomahaja anna nauaanni: “O tomahaja, ungkilalai haka too muua situhu' ätohanna to Media anna to Persia, ingganna suha' pahenta battu diua pehhondoam to napassubum tomahaja, tä'um mala dihuntu' sule!”
17 Iya napa'pahentaammi tomahaja anna mala dibaba lao Daniel anna ditibei tama leä singa. Anna mane ma'kada tomahaja lako Daniel naua: “Handandanni Puang Allataala to umpenombai liu ullangnga'iko.”
18 Iya dibabam sule mesa batu kasalle dilapasam ba'bana indo leä, mane nastempel-i tomahaja umpake sissinna anna sissinna ingganna to kasalle illaam kahajaanna, anna mala tä'um mala disole' pole kaha-kahana Daniel. 19 Puhai, iya ma'pasulem tomahaja lako banua kahajaanna anna tamangngande tamangngihu'i puli bengi. Tä' naaku dipasolaam sule to la ussaleboi, anna tä' mala mamma' matanna.
20 Tibukka'na baja, bangommi tomahaja anna napasihha'i le'ba' lako indo leä singa. 21 Sulena lako ampe'na indo leä, iya napekasalleim umpa'kadai Daniel napasindum ma'gändä-gändä buana naua: “O Daniel sabua'Na Puang Allataala Debata tubo. Mala haka nalangnga'iko Puang Allataala to si umpenombai liu dio mai itim matim singa?”
22 Iya natimba'im Daniel naua: “O tomahaja, la mahendem dako too! 23 Puang Allataala to kupenombai ussua malaika'Na ungkambu pudu'na inde mai singa, nasuhum tä' deem nahumbu-humbuä', aka tä' deem nalambi' kasalaangku dio oloNa. Anna tä' tooä' duka' deem umpogau' kasalaam dio olomu tomahaja.”
24 Iya tä' deem pada satilalla' tomahaja, anna napa'pahentaanni anna mala dipassubum Daniel illaam mai indo leä singa. Iya dipassubummi Daniel illaam mai indo leä. Tä' deem dilambi' moi podo la mesam basa lako kalena aka matappa' lako Puang Allataala to napenombai. 25 Puhai, iya napa'pahentaammi tomahaja disakkai indo to umpahapa' kadake Daniel anna ditibe asanni dokko indo leä singa sola bainena anna änä'na. Tä'pi landa' manappa dokko handam diona indo leä anna nasimpau'um indo singa buda, anna sangngim nakukku sola bukui.
26 Puhai ia too, untuli'um suha' tomahaja Darius anna napakatui ingganna hupatau lako ingganna botto, kahajaam, anna basana simesa-mesa to tohho illaam lino naua: “La sasua' masannam dakoa' too! 27 Kubeengkoa' pahenta, kuua ingganna hupatau illaam paluäna kahajaangku la pahallu tinggi'gi' anna umpengkahea'i Puang Allataala to napenombai Daniel.
Aka anggam Ia Puang Allataala Debata tubo,
to tontä liu sule lako salako-lakona.
KapahentaanNa tä' deem la pa'dena,
kakuasaanNa tä' deem la meangganna.
28 Melangnga'i anna melappasam,
umpadadi tanda anna tanda memängä-mängä
susi yabo langi' teem illaam inde lino,
puha ullangnga'i Daniel dio mai pallebona singa buda.”
29 Indo Daniel ma'pangka' malangka' illaam paluäna wattu ma'pahenta Darius anna illaam paluäna wattu ma'pahenta Koresh indo to Persia.