Passuha' dio hindinna banua kahajaam
5:1-30
5
Pissam wattu umpadeem hame-hame kasalle mangngande mangngihu' tomahaja Belsyazar untosabe sasa'bu to kasalle illaam kahajaanna. Muihu' duka' anggur tomahaja dio olona indo to sasa'bu. 2 Tappana nabuja anggur Belsyazar, iya ussuam tau la umbaba sule tubum bulabam anna peha' indo to napamuhu Nebukadnezar, ambena, illaam mai Banua Maseho dio Yerusalem, la naihu'i tomahaja, ingganna to kasalle illaam kahajaanna, ingganna bainena, anna ingganna bainena to tä' nababaam somba. 3 Iya dibabam sule indo tubum bulabam to dipamuhu illaam mai Banua Maseho battu diua Banua Debata dio Yerusalem. Mane naihu'i tomahaja, ingganna to kasalle illaam kahajaanna, ingganna bainena, anna ingganna bainena to tä' nababaam somba. 4 Silele muihu' anggur napasindum umpuji debata bulabam dipapia, peha', tembaga, bassi, kaju, anna batu.5 Pissananna ham ia, diita limanna tau massuha' tahuno-hunona dio hindinna banua kahajaam to dimabusai, handam naindona lampu. Tappana naita tomahaja indo lima mahassam massuha', 6 iya malea malatto'um lindona, anna tinggi'gi' mahea'. Lussem bukunna anna bassim lumalla' guntu'na.
7 Iya ma'kada kasallem tomahaja napa'pahentaam la dipasola sule mengngolo ingganna to si manjappi, ingganna to deem pa'issanganna, anna ingganna to si ma'potika. Sulei, iya ma'kadam tomahaja lako indo to majatta dio Babel naua: “Menna-menna muissanni umbatai inde dio pantuli' anna naissam toi natulasannä' bittuinna, la dipapakei poheba mellolo pao, anna la dipamani'i mani' bulabam, anna la mendadi to kuasa katallunna illaam inde kahajaam.”
8 Moinna anna sule asammi indo ingganna to majatta illaam kahajaam, sapo' sangngim tä' naissam nabata indo pantuli' battu haka la natulasam tomahaja bittuinna. 9 Iya tuttuam tinggi'gi'um mahea' tomahaja anna tuttuam malea malatto' lindona. Susi toi duka' ingganna to kasalle illaam kahajaanna silele buntä bäbä pikkihanna.
10 Tappana nahingngi indona tomahaja indo tula'na tomahaja sola ingganna to kasalle illaam kahajaanna, iya le'ba' siaham tama indo ongeam diongei ma'hame-hame mangngande mangngihu' anna nauai: “La mahendem dako too tomahaja! Daa untinggi'gi' mahea', anna daa umpomalea malatto' lindomu. 11 Aka illaam inde kahajaammu deem mesa tau nasalokko' penabanna ingganna debata maseho. Illaam paluäna wattu ma'pahenta ambemu, indo tau hatta' illaam penabanna, kepikkiham, anna keaka' susi kakeakasanna ingganna debata. Puham naäkä' tomahaja Nebukadnezar, ambemu mendadi kapalana ingganna to si ma'issam-issam, ingganna to si manjappi, ingganna to deem pa'issanganna, anna ingganna to si ma'potika. 12 Indo tau nasalokko' penaba tadisihanteam, muampuam kapaissangam, kepikkiham umbittui pangngimpi, ullemba'i sangkahume, anna uhhontim-hontim ingganna ma'bukunna. Isanga Daniel, sapo' nasangai pole Beltsazar tomahaja. Dadi, tambai temo anna natulasangko bittuinna itim passuha'!”
13 Puhai, iya dipasolam sule Daniel mengngolo lako tomahaja. Iya mekutanam tomahaja lako Daniel naua: “Ikongka inde Daniel, to tihekem duka' to napahhim ambeku dio mai lembäna Yehuda? 14 Kuhingngi diua naponnoiko penabanna ingganna debata, anna hatta' illaam penabammu, kepikkihangko, anna muampuam kakeakasam tadisihanteam. 15 Puham dipasolaannä' sule ingganna to majatta sola to si manjappi la nabata inde passuha' anna natulasannä' bittuinna, sapo' sangngim tä' di naissam nabittui. 16 Pissananna, kuhingngi diua si muissam iko mambittui anna uhhontim-hontingko ingganna ma'bukunna. Dadi maka' muissam umbata indo passuha' anna untulasannä' bittuinna, iya la dipapakeiko poheba mellolo pao, anna dipamani'i mani' bulabam. Anna la mendadiko to kuasa katallunna illaam inde kahajaam.”
17 Iya natimba'um Daniel naua: “Annam too itim pa'lalam penabammu, battu haka umbeem tau senga'. Moinna anna susi, la kubataam siangko itim passuha' tomahaja anna kutulasangko bittuinna.
18 O tomahaja! Puang Allataala To Handam Matande, puha ummana' katomahajaam, kamatandeam, kakeanggasam, anna kuasa kasalle lako Nebukadnezar, ambemu. 19 Ingganna to buttu dio mai simesa-mesa botto, kahajaam, anna basa sangngim tinggi'gi' anna mahea' lako, kahana indo kuasa kasalle to puha dimanasam. Iai too napoelo' iam napatei, anna iai too napoelo' iam napabäi tubo. Iai too napoelo' iam napalängängam pangka'na, anna iai too napoelo' iam napatuhungam pangka'na. 20 Lambisam, tappana malangka' penaba anna salle inaba, iya ma'sangka' elo'um ma'suka' inaba, nasuhum dihonnosammi yabo mai okkosam kahajaanna anna diäläi kamatandeam dio mai kalena. 21 Dihambai illaam mai alla'-alla'na hupatau anna ma'penaba olo'-olo'um, anna tohhoi sola keledai lampum. Humpu' dibeem naande susi sapim, anna nabossi'i langullo yabo mai langi' kalena sampe naakui, naua Puang Allataala To Handam Matande ungkuasai kahajaanna hupatau anna muäkä' to napoelo' umpahenta kahajaam ia too.
22 Sapo' iko Belsyazar, änä'nako, tä' dako umpomahempo penaba, moinna anna puha muissam ingganna ia too. 23 Silekosam di umpogau', ussanga-sanga hako kalemu dio oloNa Debata yabo suhuga. Umpesuaam dibabaangko sule indo pangkakka' illaam banua Debata to dipamuhu, anna muihu'ia' anggur sola ingganna to kasalle illaam kahajaammu, ingganna bainemu, anna ingganna bainemu to tä' umbabaam somba. Anna umpujiko ingganna debata peha' dipapia, bulabam, tembaga, bassi, kaju, anna batu to tä' paita, tä' pahingngi, anna tä' deem aka naissam. Anna tä' leko'ko ia umpa'kasallei Puang Allataala, to muanda'iangko bätä penabammu anna to umpoissam salu katuboammu. 24 Iam too anna ussuam indo lima ussuha' inde pantuli'.
25 Susi inde indo passuha' to tituli': Mene, Mene, Tekel, Ufarsin. 26 Indem ia kalembasanna indo kada: Mene kalembasanna, puham nahekem Puang Allataala masäena ma'pahentako anna napopa'tämpä'um. 27 Tekel kalembasanna, puham natimbam Puang Allataala mabanda'mu anna mahingngam sugali' timbangammu. 28 Peres kalembasanna, puham nabahe dua Puang Allataala kahajaammu anna nabeenni lako to Media anna to Persia.”
29 Puhai, iya napa'pahentaammi Belsyazar la dipapakei poheba mellolo pao Daniel, dipamani'i mani' bulabam, anna dipellatteanni diua la mendadi to kuasa katallunna illaam kahajaam Daniel.
30 Bengi eta siam too duka' anna dipatei Belsyazar, indo tomahajanna to Kasdim.a