Umpangngimpi mesa kaju kasalle ussoka langi' Nebukadnezar
4:1-37
4
Susi inde tula'na tomahaja Nebukadnezar lu lako simesa-mesa botto, kahajaam, anna basana simesa-mesa to tadongkom illaam inde lino naua:“La sasua' malino hakoa' too anna masannam!
2 Masannam penabangku la kutulasangkoa' tanda anna tanda memängä-mängä puha napogau' Puang Allataala To Handam Matande lako kaleku.
3 Sumpu kasallena tanda mepilla'-pilla'Na
anna liba' mentandolängänna tanda memängä-mängäNa!
KahajaanNa kahajaam sule lako salako-lakona
anna kakuasaanNa ma'tintingam lako ingganna lapi'na pessubum.
4 Kao, Nebukadnezar, masannannä' tohho illaam banuangku anna tä' deem kukasepa-sepai illaam banua kahajaangku. 5 Pissananna, mangngimpiä', iya napakahea'ä' indo pangngimpingku. Wattunna mamma'ä' dio petindoangku, iya napatinggi'gi'ä' indo to dipalosaiä' anna dipaitai illaam tindo. 6 Iya umpassubummä' pahenta anna mala dipasola sule dio oloku ingganna to majatta dio Babel la natulasannä' bittuinna indo pangngimpingku. 7 Iya suleim indo ingganna to si ma'issam-issam, to si manjappi, to deem pa'issanganna, anna to si ma'potika, iya kutulasammi indo pangngimpingku, sapo' sangngim tä' naissam natulasannä' bittuinna.
8 Pissananna, sulem Daniel dio oloku. Indo Daniel si diuaam duka' Beltsazar dipasikona debatangku, anna nasalokko' ingganna debata maseho. Iya kutulasammi indo pangngimpingku kuua: 9 O Beltsazar, kapalana ingganna to ma'issam-issam! Kuissam kuua, nasalokko'ko ingganna debata maseho, anna tä' deem kaha-kaha tibuni la ungkapusa'i! Susi inde tulasanna indo to dipalosaiä' illaam pangngimpi, iya tulasannä' bittuinna.
10 Indo to kuita illaam pangngimpi wattuna mamma'ä' dio petindoangku susi inde: Kuita deem kahi' satoo' kaju tä' deem pada samalangka' illaam tängäna lino. 11 Indo kaju tuttuam lobo' anna matogom, ussoka langi' lolona, anna naita asam tau lako lili'na lino. 12 Mahä'dä' daunna, tahha' buana, anna napangngalai kinande ingganna menabanna. Naongei mentiongam olo'-olo' lako kaliane dio ibi'na, naongei dassi yabo lawwa täkena, anna ia napangngalai kinande ingganna menabanna.
13 Anna mane kuita oo illaam indo pangngimpi wattunna mamma'ä' dio petindoangku mesa malaika' maseho to manjaga, tuhum yabo mai suhuga. 14 Ma'kada kasalle lako solana naua: ‘Lellenni itim kaju anna mane umpetäkei. Puhhu'i daunna anna ussehanni lao buana! Pabäi sikalumpa' lao olo'-olo' dio ibi'na, sikatia' lao dassi yabo täkena. 15 Sapo' pabäim tia too'na sitonda waka' tohho dio litä', nasäke' hante bassi sola hante tembaga, illaam alla'-alla'na humpu' mangnguha lako litä'. Pabäi nabossi'i langullo yabo mai langi' anna pabäi tubo sola olo'-olo' anna tanangam illaam lino. 16 Pabäi mammi sipa' hupataunna dipabala'i mendadi penaba olo'-olo'. La susim too dadi lako kalena pempitu wattu si ma'tantu masäena. 17 Inde kattuam napalanda' ingganna malaika' to si manjaga, inde kada napa'pakahebaam ingganna to maseho, anna mala naissam ingganna hupatau to tubopi naua, To Handam Matande ungkuasai kahajaanna hupatau anna nabeenni lako to napoelo', moi to handam madio naäkä' umpahenta kahajaam ia too.’
18 Iam too indo to kupangngimpi, kao, tomahaja Nebukadnezar. Dadi, tentomai Beltsazar, tulasannä' bittuinna, aka ingganna to majatta illaam inde kahajaangku tä' asam ia naissam natulasannä' bittuinna. Sapo' la muissam iko aka nasalokko'ko penabanna ingganna debata maseho!”
19 Iya honto-hontom sapäi' Daniel, indo si diuaam Beltsazar, anna tinggi'gi' umpikki'i. Iya nauam tomahaja: “O Beltsazar, tä'ko la tinggi'gi' umpikki'i indo pangngimpi sola bittuinna!”
Natimba' Beltsazar naua: “Io tuam, la to ungkabassi hako too nahua itim pangngimpimmu, anna la balimmu hi too nahua indo bittuinna! 20 Indo kaju muita tuttuam lobo' anna matogom, ussoka langi' lolä'na, anna naita asam tau senambo lino, 21 mahä'dä' daunna, tahha' buana, anna napangngalai kinande ingganna menabanna, naongei mentiongam ingganna olo'-olo' lako kaliane dio ibi'na, anna naongei dassi yabo lawwa täkena 22 iko nauaam tomahaja. Tuttuam mendadiko to kasalle tuam anna matoho, sondä' langi' kamatandeammu anna sule lako lili'na lino kakuasaammu! 23 Anna indo muita tomahaja, mesa malaika' maseho to manjaga, tuhum yabo mai suhuga anna ma'kada kasallei naua: ‘Lellenni itim kaju anna untättä'i, sapo' häntäi too'na sola waka'na dio litä', disäke' hante bassi sola hante tembaga napali' lao humpu' mangnguha lako litä'. Pabäi nabossi'i langullo yabo mai langi' anna dibeenni bahena sola olo'-olo' lako kaliane, la susim too dadi lako kalena pempitu wattu si ma'tantu masäena.’
24 Iam too inde bittuinna tomahaja, anna susi inde nakattu To Handam Matande diona iko puäku tomahaja: 25 La dihambaiko illaam mai alla'-alla'na hupatau anna tohhoko sola olo'-olo' lako kaliane. Humpu' la umpokinande susi sapim anna la nabossi'iko langullo yabo mai langi'. La pempitu wattu si ma'tantu masäena dadi kaha-kaha ia too lako kalemu, sampe muakui muua To Handam Matande ungkuasai kahajaanna hupatau anna napadokkoam lisu pala'na lako to napoelo' la nabeem. 26 Anna umba susi indo pahenta la dipabäim ia too'na sola waka'na tohho dio litä', la susim too duka' kahajaammu la iko sule muanda'i ke puham muakui muua kahajaam suhuga muanda'i kakuasaam. 27 Dadi, susi inde tomahaja, kela mala untahima inde pepakilalaangku matim: Tampeanni ingganna dosamu tuam anna umpalakoko kamaloloam, susi toi duka' ingganna kasalaammu anna umpa'patandaangko pa'häntängam buamu lako to dipakamase-mase. Maka' umpateemmi, iya madomi' too tahhu' liu kamasannangammu.”
28 Iya ingganna ia too dadi asam lako kalena tomahaja Nebukadnezar. 29 Tappana lessu' sapulo dua bulanna, wattunna ma'lao-lao Nebukadnezar yabo papana banua kahajaama dio Babel, 30 iya ma'kadam naua: “Tä' daka too la umpa'patandaam kakasalleanna kamatandeangku inde kota Babel tä' deem pada sakasalle, to kupake'de' umpake kuasa kamatohoangku mendadi kota tadongkonganna tomahaja?”
31 Tä'pi teppu' tula'na Nebukadnezar, iya dihingngi ham gamaha yabo mai suhuga naua: “O tomahaja Nebukadnezar, lu tama kalemu inde tula'. Diäläim dio mai kalemu inde kahajaam. 32 La dihambaiko illaam mai alla'-alla'na hupatau anna tohhoko sola olo'-olo' lako kaliane, humpu' la umpokinande susi sapim. La pempitu wattu si ma'tantu masäena dadi kaha-kaha ia too lako kalemu, sampe muakui muua To Handam Matande ungkuasai kahajaanna hupatau anna la napadokkoam lisu pala'na lako to napoelo' la nabeem.”
33 Iya wattu eta siam too duka' anna sule lakoi kada ia too lako kalena Nebukadnezar. Dihambai illaam mai alla'-alla'na hupatau anna humpu'i napokinande susi sapim, nabossi'i langullo yabo mai langi' kalena, sampe kalando beluä'na susi bulu bahokona bunia, anna susi kanuku dassi kanukunna.
34 Tappana lessu' indo wattu puha dipa'tantu, iya mentongamä' längäm langi', kao, Nebukadnezar, iya kilala to tumbämä' tia'dam to malangngi', mane umpujiä' To Handam Matande. Kupa'kasallei anna kupomatande To Tubo sule lako salako-lakona.
KakuasaanNa, kakuasaam sule lako salako-lakona,
anna kahajaanNa ma'tintingam lako ingganna lapi'na pessubum.
35 Ingganna issinna lino tä' deem angga'na naita.
Ma'palako situhu' paelo'Na lako ingganna issinna suhuga anna issinna lino.
Tä' deem tau la mala untähänni limanNa battu haka la nauaam:
“Aka hiko umpogau'?”
36 Tappana kilala to tumbää' tia'dam to malangngi', iya sulem sule kakasalleangku anna kamatandeangku to umpomatande kahajaangku. Laoä' naala ingganna to si ma'pakilala anna to kasalle illaam kahajaangku, anna dipatadongkonnä' sule yabo okkosam kahajaangku, anna buda puhapi kamatandeam dihängänni lako kaleku.
37 Dadi tentomai, kao, Nebukadnezar, kupuji, kupomatande, anna kupa'kasallei Tomahaja yabo Suhuga, aka malolo ingganna pa'palakoanNa anna muundu' lollä ingganna ulalanNa. Anna tala napengkatohoi umpopa'bukku to malangka' penaba.