Hompom ma'nala-nala
3:1-30
3
Pissam wattu umpapia mesa pa'pasusiam tomahaja Nebukadnezar bulabam napapia annam pulo singkum malangka'na, annam singkum kalua'na napake'de' dio hantena Dura dio propinsi Babel. 2 Puhai ia too, napopetambai asammi tomahaja Nebukadnezar ingganna gubernur, ingganna to kuasa, ingganna bupati, ingganna to si ma'pakilala illaam kahajaam, ingganna to si muanda'i kulle kahajaam, ingganna to si mahhotto', ingganna to ullatta' ätoham, anna ingganna kapalana simesa-mesa tadongkongam la ungkadioi heem wattunna dipopellatte tappana dadi indo pa'pasusiam. 3 Iya sasuleammi ingganna gubernur, ingganna to kuasa, ingganna bupati, ingganna to si ma'pakilala illaam kahajaam, ingganna to si muanda'i kulle kahajaam, ingganna to si mahhotto', ingganna to ullatta' ätoham, anna ingganna kapalana simesa-mesa tadongkongam la ungkadioi heem wattunna dipopellatte tappana dadi indo pa'pasusiam to napake'de' tomahaja Nebukadnezar. Silele sikadehe dio olona indo pa'pasusiam.4 Iya ma'kada kasallem indo to ma'kadanna tomahaja naua: “O inggannakoa' to buttu dio mai simesa-mesa botto, kahajaam, anna basa, dipahentakoa' susi inde: 5 Maka' uhhingngikoa' moninna sangkakala, sulim, katapi, rebab, gambus, serdam anna budapi poni-poniam senga', iya pahallukoa' ma'balinguntu' menomba dio olona indo pa'pasusiam bulabam dipapia to puha napake'de' tomahaja Nebukadnezar. 6 Menna-menna tä' ma'balinguntu' menomba, la wattu eta siam too anna ditibei tama hompom ma'nala-nala!”
7 Iya tappana uhhingngi moninna sangkakala, sulim, katapi, rebab, gambus, anna budapi poni-poniam senga', iya silelem ma'balinguntu' menomba ingganna hupatau to buttu dio mai simesa-mesa botto, kahajaam, anna basa, umpenombai indo pa'pasusiam bulabam dipapia to puha napake'de' tomahaja Nebukadnezar.
8 Wattu eta siam too duka' anna le'ba'i sanaka-naka to deem pa'issanganna umpahapa' kadake to Yahudi. 9 Ma'kada lako tomahaja Nebukadnezar naua: “O tomahaja, la tubo batu hako too! 10 Puhangko umpassubum pahenta muua, ingganna to uhhingngi moni sangkakala, sulim, katapi, rebab, gambus, serdam, anna budapi poni-poniam senga', pahallu ma'balinguntu' umpenombai indo pa'pasusiam bulabam dipapia, 11 anna menna-menna tä' ma'balinguntu' menomba, la ditibe ia tama hompom ma'nala-nala. 12 Iya deem sanaka-naka to Yahudi indo to puha muäkä' tuam umbaba babangam kapahentaam illaam propinsi Babel, si diuaam Sadrakh, Mesakh, anna Abednego, iam too inde mai tä'ko napehingngii tomahaja. Tä' mehumala' lako debatammu anna tä' umpenombai indo pa'pasusiam bulabam dipapia to puha umpake'de'.”
13 Nahingnginna tomahaja, iya tä' deem pada sakeaha' anna meali-ali, lambi' umpopetambai sia ham Sadrakh, Mesakh, anna Abednego la mengngolo. Tappana dio olona tomahaja indo to tallu, 14 iya nakutanaim tomahaja Nebukadnezar naua: “O Sadrakh, Mesakh, anna Abednego, tappa' si'da haka tä' muakua' mehumala' lako debatangku anna tä'koa' umpenombai indo pa'pasusiam bulabam dipapia to puha kupake'de'? 15 Tentomai, maka' tokaa' penabammu ke uhhingnginna' moni sangkakala, sulim, katapi, rebab, gambus, serdam, anna budapi poni-poniam senga', iya pa'balinguntu'koa' penombai indo pa'pasusiam to kupapia! Sapo' maka' mokakoa' umpenombai, iya wattu eta siam too duka' la ditibekoa' tama hompom ma'nala-nala. Iya la debata mennapi la mala ullappasangkoa' dio mai pala' limangku?”
16 Iya natimba'im Sadrakh, Mesakh, anna Abednego lako tomahaja naua: “O Nebukadnezar tala kegunapi ia ke kitimba'i inde kaha-kaha. 17 Ianaanna abanai la susi, iya maka' too napoelo' Puang Allataala to kipenombai, iya la nalappasangkam too dio mai indo hompom ma'nala-nala, anna la nallappasangkam dio mai pala' limammu tomahaja. 18 Sapo' hapanna tä'kam la nalappasam illaam mai indo hompom, iya pahallu muissam tomahaja muua, tä' kiaku la mehumala' lako debatammu tuam, anna tä' toi kiaku umpenombai indo pa'pasusiam bulabam dipapia to puha umpake'de'.”
19 Iya hede-hedem aha'na tomahaja Nebukadnezar, lambi' taiam hupanna lako Sadrakh, Mesakh anna Abednego. Iya napa'pahentaammi anna mala dipa'pempitu tiluppi' malussunna anna biasanna indo hompom. 20 Anna mane umpahenta sanaka-naka handam matohona tentahana la umpungo Sadrakh, Mesakh anna Abednego, anna mane ditibe tama indo hompom ma'nala-nala. 21 Iya dipungom indo to tallu sitonda juba, talana, saputangam, anna poheba senga'na, mane ditibei tama hompom ma'nala-nala. 22 Aka tä' deem pada samakahha' indo pahentana tomahaja, iya dipaliba' ma'nala-nalanna indo hompom, nasuhum mate indo to disua muäkä' Sadrakh, Mesakh anna Abednego naä'bäi pa'nala-nalana indo hompom. 23 Sapo' indo ia to tallu, Sadrakh, Mesakh, anna Abednego, ditobängammi ia tama indo hompom ma'nala-nala sitonda pesäke'.
24 Sapo' pissananna ham ia tä' deem pada satikkedu' tomahaja Nebukadnezar, lambi' tappa ke'de', anna mekutanai lako ingganna to si ma'pakilala illaam kahajaanna naua: “Tä' daka tia anggam tallu tau ditibe sitonda pesäke' tama inde hompom?”
Iya natimba'im naua: “Tappa', tomahaja!”
25 Iya nauam tomahaja: “Sapo' appa'um tau kuita ma'lao-lao umpa'tängä-tängäi hompom pa'de pesäke'na, tä' deem maaka, anna indo kaappa'na susi ia hupanna änä' debata.”
26 Puhai, iya le'ba'um tomahaja Nebukadnezar lako ampe' ba'bana indo hompom ma'nala-nala anna ma'kada kasallei naua: “Sadrakh, Mesakh, anna Abednego, sabua'Na Puang Allataala To Handam Matande. Pessubungkoa', illaangkoa' mai!”
Iya messubummi duka' Sadrakh, Mesakh, anna Abednego illaam mai indo hompom. 27 Iya suleim duka' ingganna gubernur, ingganna to kuasa, ingganna bupati, anna ingganna to si ma'pakilala illaam kahajaam umpali' indo to tallu. Naitai, tä' deem naande api kalena indo to tallu, tä' mampu' beluä'na, anna tä' deem maaka jubana. Anna tä' toi deem diudu' pangngandeam api lako kalena.
28 Iya ma'kadam Nebukadnezar naua: “Dipuji dipa'kasallei Puang Allataala to napenombai Sadrakh, Mesakh, anna Abednego! Puham ussua malaika'Na ullappasam mentu' sabua'Na, to matappa' lako kaleNa, anna tä' umposamele pahentana tomahaja. Anna ahu' umbeho bätä puntinna aka sangngim tä' naaku mehumala' anna menomba lako debata senga' sulibanna Puang Allataala to napenombai. 29 Dadi, iam too kasuhunganna anna umpassubummä' pahenta kuua: ingganna hupatau lako simesa-mesa botto, simesa-mesa kahajaam, anna basana simesa-mesa la umpassubum mesa tula' la umbali Puang Allataala to napenombai Sadrakh, Mesakh, anna Abednego, la ditättä' puso, anna la dihuppu'-huppu' banuanna, aka tä' deem debata senga' la mala melappasam susi inde.”
30 Puhai ia too, iya umpalängämmi pangka'na Sadrakh, Mesakh, anna Abednego tomahaja dio propinsi Babel.