Pangngimpinna Nebukadnezar
2:1-49
2
Illaanni taum kaduanna ma'pahenta tomahaja Nebukadnezar, iya mangngimpim. Lambi' kapisa' anna tä' mala mamma' matanna. 2 Iya umpopetambaim ingganna to ma'issam-issam, to si manjappi, to ma'simbuhu'-buhu', anna ingganna to deem pa'issanganna la nabittuiam indo pangngimpinna. Iya sasuleammi anna ke'de'i dio olona tomahaja. 3 Iya nauaammi: “Mangngimpiä', anna kapisa'ä' aka maelo'ä' la kuissam indo pangngimpingku!”4 Iya ma'kadam indo ingganna to ma'issam-issam lako tomahaja (ma'basa Arama) naua: “O tomahaja, la mahendem dako too! Tulasanni inde mai sabua'mu indo pangngimpimmu, anna kibittuiangko.”
5 Sapo' natimba' tomahaja lako indo ingganna to deem pa'issanganna naua: “Kumuaneiammokoa' kada kuua: Maka' tä' untulasannä' indo pangngimpingku sitonda bittuinna, iya la ditättä' pusokoa' anna la dipadahi kapu'a' banuammu. 6 Sapo' maka' mala untulasannä' indo pangngimpingku sitonda bittuinna, iya la kubeengkoa' pa'lalam penaba ma'kalolosam anna pangka' malangka'. Dadi, tulasannä' indo pangngimpingku sitonda bittuinna!”
7 Iya sikanatimba' oom naua: “O tomahaja, kela mala untulasangkam yolo indo pangngimpimmu, anna mane kitulasangko bittuinna.”
8 Iya natimba'im tomahaja naua: “Kuissam siam kuua, ma'anda bale'koa', aka muissanna' ummuaneimä' kada 9 kuua, maka' tä' untulasannä' indo pangngimpingku, iya la mesaa' tahungkummu. Anna kuissam toi kuua puhangkoa' ussahandanni kada la ungkaägä'-ägä'iä' anna la ma'tula' kadake, sampe tieli' pikkihangku. Dadi tulasannä' indo pangngimpingku, anna mala kuissam kuua, la muissanna' duka' umbittuiannä'.”
10 Iya mentimba'i oom indo to deem pa'issanganna naua: “Tä' deem tau moi podo la mesam yabona inde lino la mala umponnoi itim pelauammu tomahaja! Anna tä' deem mesa tomahaja moi la maaka susi kamatandeanna anna kakuasaanna la susi inde pelauanna lako to si ma'issam-issam, to manjappi, anna to deem pa'issanganna. 11 Mapahhi' sugali' itim pelauammu tomahaja. Tä' deem moi podo la mesa tau la mala untulasangko sulibanna debata, to tä' tohho sola hupatau.”
12 Nahingnginna tomahaja tula' ia too, iya tä' deem pada sameali-ali anna hede-hede aha'na. Iya napa'pahentaammi la dipempa'deam asam ingganna to majatta dio Babel. 13 Tappana dipassubum pahenta ia too la dipatei asam ingganna indo to majatta, iya dipeä duka' Daniel sola ingganna solana la dipatei.
14 Iya tappana mengkalao Ariokh indo kapalana to si ussappi' tomahaja la umpatei ingganna to majatta dio Babel, iya ma'kadam Daniel lako sitonda akkalam anna pikkiham 15 naua: “Akanna umpassubunni pahenta tä' deem pada samakahha' tomahaja?” Iya natulasammi Ariokh Daniel kasuhunganna.
16 Iya le'ba'um Daniel umpellambi'i tomahaja anna napelaui anna mala nabeem wattu la natulasam bittuinna indo pangngimpinna.
17 Puhai, iya ma'pasulem Daniel anna natula'i kaha-kaha ia too lako Hananya, Misael anna Azarya, indo sola-solana. 18 Ia anna natulasanni anna mala umpelau pa'kamaseNa Puang Allataala to ungkuasai langi' diona indo kaha-kaha tibuni, anna mala tä' dipasipatei to majatta senga' dio Babel Daniel anna sola-solana.
19 Iya dipalosaim Daniel indo kaha-kaha tibuni dipaitai wattu bengi. Iya umpujim Puang Allataala to ungkuasai langi' Daniel 20 naua:
“Dipuji sanganNa Puang Allataala mengkalao dio mai sule lako salako-lakona,
aka Ia puäna kakeakasam anna kamatohoam!
21 Ia umpopengkubalim wattu anna tempo,
Ia umpatuhum anna umpalängäm tomahaja,
Ia umbeem kakeakasam to majatta anna kapaissangam lako to kepikkiham.
22 Ia umpa'palosaam kaha-kaha mandalam kalembasanna anna kaha-kaha tibuni.
Muissam to illaam ongeam malillim,
anna Ia naongei buttu kamasiäsam.
23 O Puang Allataala to napenombai nene to kuponene,
kupujiKo anna kupomatande,
aka Iko umbeennä'
kakeakasam anna kamatohoam.
Tentomai puhangKo untulasannä' indo to kipelau matim,
wattunna untulasangkam indo kaha-kaha to naposaha tomahaja.”
24 Puhai ia too, le'ba'um Daniel umpellambi'i Ariokh, indo to puha natuho tomahaja la umpatei asam ingganna to majatta dio Babel. Sulei lako, iya nauaammi: “Daa umpatei indo ingganna to majatta inde Babel! Pasolaä' lao mengngolo lako tomahaja anna kutulasanni bittuinna indo pangngimpinna!”
25 Iya umpasola siaham Daniel Ariokh lao mengngolo lako tomahaja anna nauaanni: “Deem mesa kulambi' illaam alla'-alla'na indo to dipahhim dio mai Yehuda, la naissam umbittui indo pangngimpimmu tomahaja.”
26 Iya mekutanam tomahaja lako Daniel, indo to si diuaam Beltsazar naua: “La muissam si'daka untulasannä' indo to kuita illaam pangngimpi anna bittuinna?”
27 Iya natimba'im Daniel naua: “Ingganna to majatta, to manjappi, to ma'issam-issam, anna to ma'potika tä' asam naissam natulasangko tomahaja indo kaha-kaha tibuni to umpekutanaam. 28 Sapo' yabo suhuga deem Puang Allataala la ungkaleäi ingganna kaha-kaha tibuni. Anna mahassammi la napaissanniko o tomahaja Nebukadnezar ingganna kaha-kaha la dadi illaam allo mane la sulena. Susi inde indo to umpangngimpi anna to dipalosaiko wattunna mamma'ko dio petindoammu:
29 Wattunna mamma'ko dio petindoammu tomahaja, kende' illaam pikkihammu diona indo la dadi illaam allo mane la sulena. Iya natulasammoko indo To naissam umpa'palosaam kaha-kaha tibuni indo la dadi. 30 Di kaona kao, puhamä' dipalosai indo kaha-kaha tibuni, tä' diua mentondom puha kao indo kakeakasam kuampuam anna la ingganna tau senga', sapo' anna mala ditulasangko tomahaja bittuinna indo pangngimpi, lambi' muissam indo to illaam penabammu.
31 O tomahaja, wattunna mamma'ko muitako mesa pa'pasusiam kasalle. Malangka' indo pa'pasusiam, tä' deem la susi pangkihha'na, te'dä-te'dä dio olomu tuam, anna mepakahea' diita. 32 Indo pa'pasusiam, bulabam täsä' dipapia ulunna, peha' dipapia kalena anna limanna, tembaga dipapia äbä'na anna apanna patomali, 33 bassi dipapia guntu'na sola lambe'na, anna bassi piha litä' pulu' piha dipapia mengkalao galantehe'na sule dokko pala' bitti'na. 34 Tappana mahassam umpahandam tuam, pissananna ham ia dihäkkä batu tä' deem natumbu hupatau, anna bassim untappai galantehe'na sule dokko pala' bitti'na indo pa'pasusiam to dipapia dio mai bassi anna litä' pulu', lambi' huppu'. 35 Iya napissannim huppu' indo bassi, litä' pulu', tembaga, peha' anna bulabam, lambi' angga' pa'tappiam dio ongeam pallullusam gandum wattu kulla'. Iya naliliammi lao hibu' sampe masapu tä'um deem tohho. Sapo' indo ia batu to untappai, mendadi tanete tonggo muissii lino.
36 Susim too indo pangngimpimmu tomahaja, anna tentomai la kitulasangko bittuinna. 37 Iko tuam, tomahajako yabona ingganna tomahaja. Puang Allataala to ungkuasai langi' umbeengko kahajaam, kakuasaam, kamatohoam anna kamatandeam. 38 Ingganna ma'hupatau, ingganna olo'-olo' malaiha, ingganna dassi yabo lawwa umba-umba naongei tohho, napadokkoam asammoko lisu pala'mu tuam. Nabeengko kakuasaam la ungkuasai ingganna ia too. Iko tuam dipasihhapangko indo ulunna bulabam dipapia.
39 Sapo' lessu'ko too tuam, iya kende'um mesa kahajaam senga' la malamma ia anna kahajaammu. Mane kende' polei mesa kahajaam senga' battu diua kahajaam katallunna dipasihhapam ia indo tembaga la ungkuasai mesa lino. 40 Puhai too, iya kende'um kahajaam kaappa'na la matoho sihhapam bassi. Indo bassi mala uhhuppu'-huppu' anna umpadahi ambum ingganna-ingganna sia. Umba susi bassi umpadahi ambum ingganna-ingganna sia la susim too duka indo kahajaam kaappa'na la umpadahi ambum ingganna kahajaam senga' ia too. 41 Anna umba susi indo galantehe'na sule dokko tahuno-huno bitti'na dipasipolo litä' pulu'na pa'tampa kuhim anna bassi, la susim too duka' indo kahajaam la tibahe-bahe. Sapo' la deem duka' kamatohoanna indo kahajaam sihhapam bassi, umba susi indo muita sihau bassi anna litä' pulu'. 42 Sapo' umba susi tahuno-huno bitti'na bassi piha dipapia litä' pulu' piha, la susim too duka' indo kahajaam, piha la matoto' piha la mahapo. 43 Umba susi indo bassi sihau litä' pulu' muita tuam, la susim too duka' la sitambe-tambengam, sapo' tä' mala la sikoppa' umba susi bassi tä' mala sidampulu' litä' pulu'.
44 Illaam paluäna wattu ma'pahenta ingganna tomahaja ia too, la napake'de' Puang Allataala to ungkuasai langi' mesa kahajaam, tä' deem la pa'dena sule lako salako-lakona, anna kapahentaanna tä' deem la lu lako kahajaam senga'. Kahajaam ia too la umpadahi ambum anna umpempa'deam ingganna kahajaam senga' ia too, sapo' la da'da' liu ia sule lako salako-lakona, 45 umba susi indo mesa batu muita tuam, dihäkkä yabo mesa tanete tä' deem natumbu hupatau anna uhhuppu' indo bassi, tembaga, litä' pulu', peha', anna bulabam. Puang Allataala to handam kasalle kuasanNa natulasam loppo'ungko tuam indo la dadi illaam allo mane la sulena. Indo pangngimpi tappa' anna bittuinna mala dikatappa'i.”
46 Iya ma'balinguntu'um tomahaja Nebukadnezar mendu'dum dokko litä' umpenombai Daniel. Anna napa'pahentaanni la dibaba bua pemala' anna tunuam bubanau' dio olona. 47 Mane ma'kadai lako Daniel naua: “Indo Puang Allataala to umpenombai mannassa Puang Allataala to untondom asam ingganna debata, anna To ungkuasai ingganna tomahaja, anna To ungkaleäi ingganna kaha-kaha tibuni, aka malako umpomasiä' indo kaha-kaha tibuni.”
48 Anna mane umbeem pangka' malangka' Daniel tomahaja, anna nabeem buda pa'lalam penaba keangga'. Napadadi to ma'kuasa illaam propinsi Babel anna mendadi kapalana ingganna to majatta dio Babel. 49 Iya napelaum Daniel lako tomahaja, anna mala Sadrakh, Mesakh, anna Abednego la muäto' kapahentaam illaam propinsi dio Babel, anna Daniel ia la tohho illaam banua kahajaam.