Daniel
Illaam banua kahajaam dio Babel
1:1-21
1
Tappana tallu taum ma'pahenta Yoyakim tomahaja Yehuda, iya sulenna' Nebukadnezar, tomahaja Babel dio Yerusalem anna napepali'i lao la nabundu' kota ia too. 2 Iya nabehom Debata Yoyakim, tomahaja Yehuda dokko lisu pala'na Nebukadnezar, anna indo pangkakka' illaam banua kapenombaam längäm Puang Allataala piha. Sangngim nababa lako lembäna Sinear,a napatama banua kapenombaam lako debatanna. Ingganna indo pangkakka' nababa tama ia banua si napa'palumpunni debatanna.3 Mane umpalaoi pahenta tomahaja lako Aspenas, kapalana to mengkähä illaam banua kahajaam, la umpasola sule sanaka-naka to Israel bati' tomahaja anna litena to dibulle ulunna, 4 la sangngim änä' muane tä' deem sassainna, matege, buda kakeakasanna, kalua' kapaissanganna, masimpam umpähäm ingganna pepa'guhuam, anna hatta' la mengkähä illaam banua kahajaam. La dipatudu ma'hupa-hupa issi suha' anna basa Kasdim. 5 Nakattum tomahaja allo-allo la sangngim dibeem kinande tomahaja anna anggur si naihu' tomahaja. Tallu taum la pahallu dipatudu, anna puhai too umpengkähängammi tomahaja.
6 Indo to dipasola sule, deem sanaka-naka pessubunna Yehuda si diuaam: Daniel, Hananya, Misael, anna Azarya. 7 Iya nasangai polem indo kapalana to mengkähä illaam banua kahajaam indo to appa'. Daniel nasangai Beltsazar, Hananya nasangai Sadrakh, Misael nasangai Mesakh, anna Azarya nasangai Abednego.
8 Sapo' natonggo-tonggoi ia Daniel mengkalao illaam unä' penabanna tä' la ungkussi'i kalena kinande tomahaja anna anggur si naihu' tomahaja, nasuhum napelau lako indo kapalana to mengkähä illaam banua kahajaam anna mala napabäi tä' ungkussi'i kalena. 9 Iya napalambi'i Puang Allataala Daniel pa'kamasena anna kamapiaam penabanna indo kapalana to mengkähä illaam banua kahajaam. 10 Sapo' ma'kada indo kapalana to mengkähä illaam banua kahajaam lako Daniel naua: “Mahea'ä' lako puäku tomahaja, to puha umpa'tantu kinandemua' anna uwai ihu'mu, ke madokokoa' iko naita anna la padammua' änä' muane senga', iya ikoa' too nasuhum la nalempo'iannä' ulungku tomahaja.”
11 Iya ma'kadam Daniel lako indo to manjaga to napatadongkom indo kapalana to mengkähä illaam banua kahajaam si ungkedandai Daniel, Hananya, Misael, anna Azarya naua: 12 “Kipelau la umpangngitaikam sapulo allona. Podo anggam kami' utam umbeengkam kiande anna uwai kiihu'. 13 Puhai too, iya umpasibandimmi pa'kaleangki anna pa'kaleanna indo änä' muane senga' to muande kinande tomahaja, mane umpogau'i pole' lako kaleki situhu' pennenne'mu.” 14 Iya napehingngii indo pelauanna, mane napangngitai sapulo allona.
15 Tappana lessu' sapulo allona, iya naita sangngim mapia puha ia pa'kaleanna anna malompo puha ia anna la indo änä' muane senga' to muande kinande tomahaja. 16 Nasuhum si naala indo to manjaga indo kinande sola anggur to la pahallu battuam naande anna naihu' Daniel-a', anna utanni ia si nabeem.
17 Indo to appa' änä' muane namana' Puang Allataala kapaissangam anna kamanähängam diona ma'hupa-hupa issi suha' anna kakeakasam. Sulibanna ia too, naissam polepi ia Daniel ullemba'i to dipa'palosaam anna umbittui pangngimpi.
18 Tappana lambi' indo wattu puha napa'tantu tomahaja lako ingganna indo änä' muane, iya napasolam indo kapalana to mengkähä illaam banua kahajaam mengngolo lako Nebukadnezar. 19 Tappana sipa'tula' tomahaja pada indo änä' muane, iya tä' deem nalambi' tomahaja la susi manähäna Daniel, Hananya, Misael, anna Azarya. Iya napopengkähäm tomahaja indo to appa'. 20 Ingganna kaha-kaha to la umpahalluam kakeakasam anna pikkiham to napekutanaam tomahaja lako, iya si pessapulo tiluppi' ia hatta'na naita tomahaja anna la ingganna to ma'issam-issam anna ingganna to si manjappi illaam paluäna kahajaanna.
21 Mengkähä liu Daniel illaam banua kahajaam sule lako taum uhuna ma'pahenta tomahaja Koresh.