Daniel
Pemasiä'na
Inde suha' Daniel dituli' wattunna ussi'dim kamasussaam to Yahudi aka didahha anna dipakamase-mase indo anna dipahhinni dio mai Yehuda lako botto senga'. Indo to untuli'i inde suha' umpatialaam inabanna sabottona umpake sanaka-naka tulasam anna kaheba diona ingganna indo to dipa'palosaam. Nabeem pahhannuam naua Puang Allataala la uhhonnosam indo to undakka'i anna la umpapoletottom sule kahajaanna umma'Na Puang Allataala.
Inde suha' tibahe dua anna saidi' tapada siam kalandona, sapo' deem sisala issinna.
Uhuna hondongam 1-6 naongei dituli' annam tulasam diona Daniel anna tallu solana sangngim änä' gassim to Yahudi dipahhim lako Babel. Sangngim manontom umpenombai DEBATA to disa'bu' tomahaja yabona ingganna tomahaja. Moinna anna dibeem pahenta la umpenombai tomahaja di lino, susinna Nebukadnezar sola Belsyazar bassim to Babel, anna Darius to Media, iya sangngim nakambi' anna najagai DEBATA. Ingganna tulasam ia too dadi illaam paluäna wattu ma'kuasa kahajaam Babel anna Persia.
Kaduanna hondongam 7-12 ma'tula' diona sanaka-naka pa'palosaam dipaitai Daniel sapo' ma'hupa tanda napake. Dilaham mate-mateam Daniel la napa'paissangam ingganna indo to dipa'palosaam ke tä'pi lambi' indo wattu puha dipa'tantu. Ingganna indo to dipa'palosaam dibukkai asam dio olona Daniel diona tulasanna to Yahudi nasisolonni nadakka' botto senga'. Sapo' katampasanna la nabeem kalondaam Puang Allataala, la umpake'de' sule kahajaanna, anna tä'um la nakuasai botto senga'.
Iam too sanaka-naka handanna ditula' illaam inde suha' Daniel.
Tono' Issinna
Daniel anna solana 1:1-6:29
To dipalosaiam Daniel 7:1-12:13
a. Appa' olo'-olo' anna änä' to lino 7:1-28
b. Domba laki anna beke laki 8:1-27
c. Sambajanna Daniel 9:1-27
d. To dipalosai Daniel diona kaha-kaha la dadi illaam allo mane la sulena 10:1-12:13
1) To dipa'palosaam lako Daniel dio bihim Salu Tigris 10:1-11:1
2) Tomahajanna kahajaam Utara anna tomahajanna kahajaam Selatan 11:2-45
3) Allo ma'katampasam 12:1-13