Kada to keaka' buttu di indona Lemuel
31:1-9
31
Susi inde kadanna Lemuel, tomahaja Masaa ullombum tula'na indona naua:2 “O änä'ku, änä' to buttu subum hoäku, änä' to kudadiam buana sambajangku.
Pehingngiiä'!
3 Daa umpapuhu' lakoi baine tohomu,
anna läpu'mu lako baine to umpopehonno' buda tomahaja.
4 O Lemuel, tä' too sipäto' le, lako mesa tomahaja,
tä' sipäto' mesa tomahaja ungkamammi'i muihu' anggur,
battu haka mesa to kasalle naala kehu'na uwai mepamäbo'.
5 Aka ianaanna muihu'i tau uwai mepamäbo', iya mala too ungkalembei tau kada dipandam,
anna umpasala' lao tahakanna to dipelamma.
6 Inde uwai mepamäbo' la dibeem ia lako to la salendu'-lendu'na penabanna,
anna uwai anggur lako to nahimpi'-himpi' sussa.
7 Pabäi naihu' anna mala ungkalembei kapemase-maseanna
anna tä'um umpikki' kamasussaanna.
8 Pa'kadaanni to malaja' ma'tula',
pelalanganni tahakanna to dipa'bahinni'i.
9 Pabäkkä'i sädämu, ammu pa'bisaha situhu' undu' lollä,
pekkalundanganni to mase-mase anna to mehio-hio.”
Tedena baine hatta'
31:10-31
10 Madähä dalle busa la dilambi' baine hatta';
keangga' puha ia anna la permata.b
11 Nahannuam ponno muanena,
längäm liu allo sangngallona muanena.
12 Ma'gau' mapia liu lako muanena, tala deem dia ma'gau' kadake,
sule lako matena.
13 Bassa' umpeä ramic anna uhhempum bulu domba,
anna happa' penabanna ungkähäi.
14 Anggasanna kappala'na to lao danggam,
sule umbaba kinande dio mai ongeam mambela.
15 Mane nannahi anna milli'um,
umpatokaam kinande solana lako sali,
anna tungga' umpatotä'i pengkähängam to mealaanna baine.
16 Tappana hatta' pattujunna, iya muallim sangngenam bela',
anna bussu' kanukunna napake untanannii anggur.
17 Muahha'i dodona,
anna muette'i katea'na.
18 Naka'da' nakaleso ingganna nakähäna la kentakim kanam,
malalam bengi mane mamma'i.
19 Dio unusam limanna,
anna dio pangngonnosam tahuno-hunona.
20 Matutu ma'pebeem lako to mase-mase,
bassa' mentando lako to mehio-hio.
21 Tä' ungkasahaam sahapunna lako sali ke lambi' oom wattu masäkke' kaliane,
aka ingganna sahapunna umpasilapi' pohebana.
22 Umpapia kale sambu' dale,
anna sampim linen malängngo' sola sampim mellolo pao pohebana.
23 Kesanga mapia muanena dio ba'ba suluham,
wattunna sitadongko-dongkongam matua ulunna pa'bottoam.
24 Untannum sampim linen malängngo' napobalusam,
anna umpapia beke' nabalu' lako pa'bulele.
25 Umpa'baju umpa'dodo sipa' mapia anna dipa'kasallei,
metaba ia untammu allo la ditingngajona.
26 Angga ia kakeakasam messubum dio pudu'na,
anna lengko lilana umpengkadaam pangkaha' pa'kamase.
27 Umpenabaam liu dapo'na,
anna tala deem ia muanna tohhona.
28 Sangngim mengke'de' änä'na nauaam: “To maupa' anna katambasam indoki,”
anna natede-tede duka' muanena naua:
29 “Abana buda baine mapia pa'palakoanna,
sapo' tä' sia deem la umpapadaiko.”
30 Pempasse' dipapia-pia mepasalanduam, kamapiaanna hupa labu' di limbä tallam di pahupu,
sapo' baine mengkahea' lako DEBATA, sihatam sipäto' dipa'kasallei.
31 Padokkoanni lisu pala'na bussu' kanukunna,
sihatam sipäto' to'doam appu'na napolalam napa'kasallei hupatau dio ba'ba suluham!