Allo ma'katampasam
12:1-13
12
Anna mane naua: “Wattu eta siam too duka' la sule Mikhael, indo pangngulu matandena malaika' to si ungkambi' ingganna hupatau illaam bottomu. Anna la deem wattunna kende' kamasussaam tä'pi deem dilalam mengkalao deenna simesa-mesa botto sule lako dadi kaha-kaha ia too. Sapo' wattu eta too la lappa' ia sabottomu to dilambi' tituli' sanganna illaam suha' katuboam. 2 Anna la buda indo to puham dilamum dio litä' la tubo sule, piha la ullambi' katuboam sule lako salako-lakona, anna piha la dipetuna anna mehidi'-hidi' sule lako salako-lakona. 3 Ingganna to majatta la pangkähhä susi pangkähhäna langi', anna to puha umpatette buda tau lako kamaloloam la pangkähhä susi bintä sule lako salako-lakona.4 Sapo' iko-iko, Daniel, la umbuniangam kada ia too anna ussegel indo suha' sule lako allo ma'katampasam. Buda tau umpellantunnii anna kehängänni kapaissanganna.”
5 Tappana kupengkalesoi, kao Daniel, iya kuitam dua malaika' senga' ke'de'. Mesa dio bihim tandai dipena mai salu, anna mesa dipe bihim tandai libanna. 6 Iya mekutanam mesa indo malaika' lako indo to ma'poheba sampim linen ke'de' yabona indo salu naua: “La pada hia umba masäena mane ma'tämpä'i inde kaha-kaha mepilla'-pilla'?”
7 Iya kuhingngim indo to ma'poheba sampim linen ke'de' yabona indo salu ma'dandi ussa'bu' sanganNa To Tubo sule lako salako-lakona, napasindum muäkä' dua limanna längäm langi' naua: “Pentallum anna setangnga wattu si ma'tantu masäena. Maka' too ma'tämpä'um indo dipeä lalanna la dipempa'deam kuasanna umma' to maseho, mane ma'tämpä' di duka' kaha-kaha ia too!”
8 Mannassa kuhingngi indo tula' sapo' tä' kuissam kupekalembasam. Iya mekutanamä' kuua: “O puäku, aka la kakendesanna ingganna inde kaha-kaha?”
9 Iya nauam: “Le'ba'ungko, Daniel, aka ingganna inde kada, la dibuniangampi anna la disegel sule lako allo ma'katampasam. 10 Buda tau la dibahassii, dipattinni, anna disehoi, sapo' ingganna to tameada' la tontä liu ia ma'gau' tamendiada'. Tä' deem moi podo la mesa indo to tameada' la umpähänni, sapo' ingganna to majatta la napähäm ia.
11 Dipahandu'na dipa'dei bua pemala' si dibaba allo-allo, anna dipake'de' indo pa'pasusianna to ungkähä kakadakeam la metallangam la sasa'bu dua hatu' kaseha pulo allona. 12 Maupa' anna katambasam to umpemmitai anna ullambam sasa'bu tallu hatu' tallu pulo lima allona.
13 Sapo' iko-iko, le'ba'ungko sampe ma'tämpä' katuboammu. La mellubeko anna tibangongko sule la untahima mana'mu illaam allo ma'katampasam.”