23
Maka' muokko'ko mangngande sola to kasalle,petua' manappai aka dio olomu.a
2 Daa umpaula'i bahokomu,
ke si pa'andeko!
3 Daa ungkaamma'-amma'i kinande mapianna,
aka nakeloiko manii.
4 Daa umbumbu' sugali' katomakakaam,
popeanggam itim pikkiham susi.
5 Maka' umpahappai mata la pa'de bäbä,
aka la tubo säkä-säkä pani'na,
anna mentia'i längäm lawwa susi bunia gege.
6 Daa muandei kinandena to di'di' bosi,
anna daa ungkailui kinande mapianna.
7 Aka umba susi to mahekem, susim too duka' mahekenna.
La nauaangko: “Andeko; ihu'ko!”
Sapo' tä' tia sule tama penabanna indo tula'na.
8 Maka' muandem sasimpoam baju-baju ulluam sule,
anna labu' di limbä tallam di pahupu ingganna tula' mapiammu.
9 Daa ullabusam tula'mu nahingngi to maho,
aka la naele-ele mandi tula' keaka'mu.
10 Pissa'-pissa' ako iko la umpadende katonam litä' to puha ditete yolona,
anna daa uhhappai bela'na änä' bium.
11 Aka matoho To umpekkalundanganni,
Ia la umpa'kadaanni nabaliko.
12 Pasatutui penabammu lako pepanännä',
anna patananni talingammu kada mebeem kapaissangam.
13 Daa ungkalaja'i umpanännä' änä'mu,
tä'pi deem mate änä'-änä' disämbä'i.
14 Abana ussämbä'i bätäna,
sapo' setonganna ullangnga'i hi tia sungnga'na dio mai kamateam.
15 O änä'ku, ianaanna ma'penaba keaka'ko,
la tiala duka' inabangku.
16 La sundede buaku,
ke ia sia anna pudu'mu umpassubum tula' tungka ianna.
17 Daa umpakende' kakembuhuam illaam penabammu lako mentu'na to madosa,
sapo' la sanda manuhu' dako ia lako Puang Allataala allo bengi.
18 Aka la ullambi'ko kamapiaam illaam salukatuboammu,
anna pahhannuammu la umpai pala'.
19 O änä'ku, patananni talingammu ammu pengkakeaka';
pasatutui penabammu lako ulalam malolo.
20 Daa ussitappa to pa'anggur,
battu haka soko bale.
21 Aka to pa'anggur anna to soko bale namase-masei,
anna to angga mamma' katampasanna ma'poheba sepa-sepa ia.
22 Pehingngii manappako ambemu to undadiangko,
anna daa umpa'bahinni'i indomu illaam kamatuaanna.
23 Alliko kamaloloam anna daa umpobalusanni,
teem toi kakeakasam, pepanännä', anna pikkiham.
24 Ambena to meada' la kassi tilalla';
la sundede buana to siampuam änä' keaka'.
25 Sihatam la umpasundedeko buana ambemu sola indomu;
sipäto' la umpakassiko tilalla' to undadiangko.
26 O änä'ku, pehingngiiä',
potandenganni lingka salukatuboangku.
27 Aka baine passunda' sihhapam gahoä mandalam,
anna baine ullullu' muane sihhapam tolombu mandalam.
28 Mangngampa lako lalam susi to si pahappa,
anna umpakehängänni bilanganna to ullullu' bainena.
29 Menna hia mengkaloa'? Menna hia sumahho lumoa'?
Menna hia massikalla? Menna hia kaloa'-loa'?
Menna hia basa natumä kamahoanna? Menna hia malea matanna?
30 To angga umpengkahojai muihu' anggur,
anna lao tungga' ussändä' anggur dibuli.
31 Daa umpaalai matammu anggur, moi la mepakaamma'-amma' diita,
moi la matti' elo' muitai illaam ihusam,
tiala inaba ma'gohhe' dokko bahoko.
32 Sapo' katampasanna anggasanna hi ula' metombo',
umpakende' hasum susi ula' pabalu.
33 La muitako kaha-kaha tä' biasa diita,
anna la ma'tula' sasa-sasa bäbäko.
34 La sihhapangko to yabo kappala' napakakemba-kemba bombam,
la susiko to yabo lolä'na andihi somba'.
35 La ma'kadako muua: “Napongkoä' tau, sapo' tä' mapi'di'.
Natuttu'ä' tau, sapo' tä' kusi'dim.
Piham dä' kao kilala?
Angku lao oo suhu'i anggur.”