24
Daa ungkembuhui to tameada',anna daa ummaelo' sola pa'palakoam.
2 Aka angga ia ma'pattuju la palampi,
ingganna pessubungam pudu'na angga umpeä tuntungam su'be' undaka' pa'posanga-sanga.
3 Kakeakasam dipake umpapia banua;
kamanähängam dipake umpake'de'i matoto',
4 anna kapaissangam dipake muissii tambinna,
diissii ebangam ma'mata-mata masulli' anna mekailu-ilu.
5 To keaka' keangga' puha ia anna la to matoho;
to deem kapaissanganna mentandolängäm ia anna la to matege.
6 Aka anggam ke deenni to ma'patette anna malako ma'bundu',
anna ianaanna budai to menännä' mepakilala, mala tau patalo.
7 Kakeakasam tä' nalambi' akkalanna to maho kalebu;
tä' nasaha umbukkai pudu'na illaam pa'bisahaam.
8 Menna-menna angga umpattuju kakadakeam
la disangai to mateko.
9 Umpattuju kamahoam ia too dosa,
anna to mantelle nakabassi hupatau.
10 Ianaanna kattu hannuko illaam kamasussaam,
penäbbä'-näbbä'ko iko.
11 Lappasanni ingganna to puha dipaettenni kada sahandam la dipatei,
langnga'i to kabentä-bentä la lao dipatei.a
12 Ianaanna muuai: “Taia kami' issangki itim o!”
Tä' daka tia la naissam tungka ianna To ullosa lalam penaba?
Tä' daka tia la naissam To ungkambi' sungnga'mu?
Ia la umpabala'i simesa-mesa hupatau situhu' pa'pogausanna.
13 O änä'ku, ihu'ko duho, aka keguna;
duho ma'nini matannim dokko bahoko.
14 Kannassai, susim duka' kakeakasam keguna lako sungnga'mu.
Ianaanna ullambi'i, iya ullambi'ko kamapiaam illaam salukatuboammu,
anna pahhannuammu la umpai pala'.
15 Daa umpantoho' la ungkatama banuanna to meada' susi to tameada',
daa uhhuppu'-huppu'i banuanna.
16 Moi la pembuda mehonno' to meada', sapo' mala liu ia tibangom sule,
sapo' to tameada' ia la metalumbum nahua sippi' tanggana-gana.
17 Daa umpa'pissi' balimmu ke sägäi,
anna daa umbillisanni matammu ke sallo'do'i,
18 indana naitai DEBATA itim pa'pogausammu anna napesalaanni,
lambi' napodo'um aha'Na dio mai tau ia too.
19 Daa umpeali-ali muita to umpogau' kakadakeam,
anna daa ungkembuhui to tameada'.
20 Aka tä' ia deem pahhannuam allo di dako'na to umpogau' kakadakeam,
sihhapam lampu la pi'de.
21 O änä'ku, pengkahea'ko längäm DEBATA anna lako tomahaja;
anna daa ussitappa to umbali-balii.
22 Aka bassim mala umpakende' säkä-säkä pi'di' tanggana-gana,
anna mennangka la muissanni sussa mabanda' aka la napakende'?
23 Deempi duka' kada to keaka' susi inde:
Tä' mapia ma'bija ma'sangngana' illaam pahhottosam.
24 Menna-menna muuaam to kasalaam: “Tä' deem kasalaammu,”
la natädo ingganna kahajaam, la napanata'i mentu'na pa'lembängam.
25 Sapo' menna-menna umpassala to kasalaam la ullolongam hongko' upa',
anna la untammu tamba' sanda silapi'.
26 Menna-menna nasindohoi mentimba',
umpa'patandaam to sangkalamma' si'da sia.
27 Kähä manappai bela'mu,
papuhai ungkähä anna untanannii;
mane umpake'de'ko banuammu.
28 Daa umpassa'bii ke tä'i makaleso,
anna daa umbungkeko' lilamu.
29 Daa muuai: “La kupasusii duka' susinna indo napogausannä'!
La kupabala'i pa'pogausanna tama kaleku!”
30 Kuolai baha'ba'na to busungam
anna bela' anggurna to takepikkiham.
31 Kuita iko le, nakapu' kuhha keduhi, naponnoi kini'-kini',
anna titale bangke' bala batunna.
32 Tappana kupengkalesoi anna kupaalai penaba,
iya kulio-liom, mane kualai mesa pepatuduam kuua:
33 “Sapäi'-sapäi' tikahu'du', tapakala mamma' oham,
sapäi'-sapäi' messingngammu', tapakala lentem-lentem oham,”
34 pissananna sule säkä-säkä ham kapemase-maseam sihhapam to pahappa,
kakuhängam sihhapam to umbaba paha'buno.