22
Sanga mapia keangga' puha ia anna la kulle buda;dipa'kasallei kalando puha ia anna la peha' sola bulabam.
2 To makaka anna to mase-mase deem susinna:
sangngim DEBATA to metampana.
3 To keakkalam ia usseheam kalena ke muitai la mesägäinna,
sapo' to saidi' kapaissanganna tahhu'-tahhu' ia lambi' sägä.
4 Sahona to mahempo penaba anna mengkahea' lako DEBATA:
katomakakaam, pa'pakasalle anna katuboam mapia.
5 Suha sola poja bendo' mangngampa dio lalam la naolanna to sengko' penaba;
menna-menna ungkaha'i sungnga'na la umpasikambela kalena lalam ia too.
6 Patudui to mangnguha untuhu' ulalam la sipäto'na naola,
anna mala sule lako matuanna tä' deem la lempä dio mai ulalam ia too.
7 To makaka la umpahe' to mase-mase,
to ma'indam naposabua' to napa'indanni.
8 Menna-menna ma'gau' sengko' la nalambi' pa'dallena,
anna kasalleinabaanna lako tau senga' angga allo nalambi' sihhapam bose polo ta'bu.
9 To matutu ma'pebeem la katambasam,
aka untaba kinandena lako to mase-mase.
10 Suai lao to mantelle anna mala pa'de duka' kasipengkaam,
anna pa'de toi duka' kasisakkasam anna pa'petuna.
11 To umpohäe penaba mahändä,
anna mapia pessubungam pudu'na, siala penaba tomahaja.
12 Tatilio-lio matanNa DEBATA ungkambi' unjagai kapaissangam,
sapo' tä' umpatama tula'na to umpesi' tula'na.
13 To busungam angga mempi'dim dio banua,
aka naua: “Deem singa lako lalam, sitammuä' manii anna naandeä'.”
14 Pessubungam pudu'na baine passunda' sihhapam gahoä mandalam;
to nahua aha'Na DEBATA la mehonno' dokko.
15 Mendekke'um kamahoam illaam penabanna änä' mangnguha,
sapo' pesämbä' umpanännä'i lappa' dio mai kalena.
16 Menna-menna uhhoho'i to mase-mase umpatomakaka kalena,
battu haka untampoi to makaka, katampasanna ummase-masei kalena.
Tallu pulo handanna kada to keaka'
22:17–24:34
17 Patananni talingammu ammu tande talingai kada to keaka';
paalai penabammu kapaissangangku.
18 La masannangko ke umpaillaam penabai umpatianna di ate;
la umpengkadaam mandam dio pudu'mu ke pahallum.
19 Anna malako ussedam pahhannuammu längäm DEBATA,
iam too anna kupatudungko, kupatuduko tentomai.
20 Tä' daka too puham kusuhasangko tallu pulo handanna kada to keaka',
mebeem pepanännä' anna kapaissangam,
21 la napatuduko tula' tungka ianna anna kada malolo,
lambi' mala hua pentimba'mu lako to ussuako?
22 Daa uhhappa aka-akanna to mase-mase aka umpelamma;
daa uhhoho'i to dipi'di' dipakamase-mase illaam pahhottosam.
23 Aka DEBATA ia la umpa'kadaanni,
anna umpakattu sungnga' to uhhappai.
24 Daa ussola to buhassuam,
daa ussiala penaba to pa'keaha',
25 indana umpolai gau'na,
anna umpaalaiko ulä kalemu.
26 Deem ako iko la ma'dandi,
la umpangngindosam solamu.
27 Maka' tä' deem akammu la umbajasam,
iya moi too petindoammu la naalapi.
28 Pissa'-pissa' ako iko la umpadende katonam litä',
to puha natete nene to umponene.
29 Deemmaka iko muita to hatta' umpalako pengkähänganna?
La napake tomahaja, taia tia tau biasa la umpakei.