21
Penabanna tomahaja sihhapam pellaona uwai salu, DEBATA muäto'i,iai too napohäeNa iam napa'paolai.
2 Ingganna lingka salukatuboanna hupatau malolo situhu' passangainna,
sapo' DEBATA hi tia ussangai issi penaba.
3 Umpalako kamaloloam anna undu' lollä,
napakedo ia DEBATA anna la tunuam.
4 Mata muola yabo anna penaba malangka',
umballoi to tameada', anna ia too dosa.
5 Pattujunna to bassa' angga kabosasam napoleam,
sapo' menna-menna tipandaka-daka umpasuleam kalena kapemase-maseam.
6 Kulle disalu nähä
sihhapam uwai dipalimbä anna sipuli sungnga'.
7 To tameada' nahui' sesse' kamakahhasanna,
aka silele tanaaku ussoeam undu' lollä.
8 Lingkana to kasalaam lu lako lu dio mai,
sapo' to malolo ia malollä pa'palakoanna.
9 Aham tau yabo papa banuaa
anna la sibanuai baine pa'mämmängam.
10 Pikkihanna to tameada' angga umpemulu kakadakeam,
anna tä' muampuam pa'häntängam bua lako padanna.
11 Ianaanna ditahungkunni to mantelle, mendadi keaka' ia to saidi' kapaissanganna,
sapo' ianaanna dipatudui to keaka', la kehängäm kapaissanganna.
12 To Handam Malolo umpeninim banuanna to tameada',
anna napembussusanni lambi' tilaka.
13 Menna-menna tä' umposamele pengkaloa'na to mase-mase,
tä' la ditimba'i ke deenni mengkaala.
14 Pa'pebeem dipasisi'i muoppo' aha',
doi' passahoma'dinni dibeem buni umpamehe aha' kasalle.
15 Ussoeam undu' lollä pa'pohäena to meada',
sapo' pangkahea'na ia to tameada'.
16 To umpellei ulalam kakeakasam,
la tihutu' lako kaliane anitu.
17 To angga ma'masannam-sannam ma'doä la memase-mase;
to angga ussussui minnä'-minnä' kalena anna pa'anggur la sikambela ia katomakakaam.
18 To tameada' umpessulle pambo'bä'na to meada',
anna to uhhonnosam solana umpembala' ongeanna to malolo penaba.
19 Aham tau tohho lako pohiallasam,
anna la tohho sola baine pa'mämmängam anna pa'keaha'.
20 Deem kulle keangga' anna minnä' buda illaam banuanna to keaka',
sapo' to maho ia untasu-tasu kullena.
21 Menna-menna umpameä kamaloloam anna siampuam pangkaha' pa'kamase,
la ullambi' katuboam, kamaloloam anna kamatandeam.
22 To keaka' mala unteka'i tembo'na kota nahonda tentaha pa'bahani,
anna nahuppu'-huppu' bettenna to nahannuam.
23 Menna-menna ungkambi' pudu'na anna unjagai lilana,
kalembasanna ungkambi' kalena dio mai sussa tanggana-gana.
24 To malangka' penaba anna ussanga-sanga kalena, diuaam to mantelle,
angga makahha' batu pa'palakoanna.
25 To busungam mengkähä napalenna' kamohäeam sugali'na,
aka mabanda' batu limanna mengkähä.
26 Lilu allo angga kata'ba-ta'ba penabanna,
sapo' to meada' ia ma'pebeem sola unä' penaba.
27 Tunuanna to tameada' nakabassi DEBATA,
la'bi-la'binna ke sitondai pikki' kadake.
28 Sa'bi tatappa' la ditahungkum,
sapo' sa'bi malolo dipabäi liu ia ma'tula'.
29 To tameada' ia lindo batu,
sapo' to malolo penaba ia napikki' yolo mane mentekkai.
30 Tä' deem kakeakasam, tä' deem kamanähängam,
anna tä' deem petundam pepakilalaam la mala umpentaloi DEBATA.
31 Daham dipapohebai la mentama pa'bundusam,
sapo' kapataloam ia dio pala' limanNa DEBATA.