20
To pa'anggur angga nakähä mantelle, anna to pangngihu' umpakende' kahukkaam,tä' ia keaka' to napalimpu-limpu pangngihu'na.
2 Aha' kasallena tomahaja anggasanna pa'ehhenna singa kabahanianna,
menna-menna umpakendesanni aha'na ussupai kalena.
3 Keangga' mesa tau ke umpasikambelai kalena kasipengkaam,
sapo' to maho kalebu ia napohäe massitimba'.
4 To busungam tä' naaku ma'tengko la nabaha'ba'i ke wattu pengkähänganni;
tappana pepaheam katangoa-ngoa hekko' ia.
5 Issi penabanna hupatau sihhapam limbä mandalam,
sapo' mala ia nasillinni to manähä.
6 Buda tau muangga' kalena to siampuam pangkaha' pa'kamase,
sapo' to manontom si'da sia mennangka la ullambi'i?
7 To meada' mahändä pa'palakoanna
maupa' anna katambasam pessubunna.
8 Tomahaja to muokko' yabo okkosam pahhottosanna,
ussangkamata-matai ingganna kakadakeam.
9 Mennangka tau la mala ma'kada naua: “Puham kupomaseho pindam penabangku,
kupomaunna' pebajoam kaleku dio mai dosa”?
10 To umpake dua hupa datim anna dua hupa lite',
bassim nakabassi DEBATA.
11 Iapi mane diissanni sipa'na mesa tau moi duka' änä'-änä' ke diita diom pakkedoanna,
mapia haka anna malolo pa'palakoanna tä' daka.
12 Talinga dipake ma'pehingngi anna mata dipake ma'petua',
bassim DEBATA umpadeenni.
13 Daa umpemammi'i mamma' indana memase-maseko,
pomasissä'i matammu ammu bosa' kinande.
14 To mangngalli si mantaba' naua: “Masuli' sugali', taia allinna.”
sapo' puhai too naalli, memboko'um muäde-äde.
15 Abana keangga' bulabam sola batu permata,
sapo' keangga' puha ia pudu' umpassubum tula' kapaissangam.
16 Menna-menna umpangngindosam tau senga', sihatam dita'ga' jubana,
sipäto' dipatohho pohebana sulle bala'na tau ia too.
17 Kinande diala malussu mammi' disi'dim,
sapo' katampasanna hapam tau muamma' pahe kebulu.
18 Mala sule lako pattuju ke deenni petundam pepakilalaam,
iam too anna untingngajo pa'bundusam pahallu deem to mepakilala.
19 Menna-menna angga untula'-tula' kadake solana, to ma'kada bu'busam ia,
iam too anna tä'ungko la siala penaba to ma'bibi-bibi.
20 Menna-menna untädo ambena battu haka indona,
katuboanna la sihhapam lampu pi'de illaam wattu tängä bengi.a
21 Mana' diaala yolo taiapi wattunna,
katampasam tä' katambasam.
22 Pissa'-pissa' ai la muua: “La umpalaoä' gau' situmpu.”
Paihandam DEBATA-i, anna Ia ham ma'ulalam.
23 To umpake dua hupa datim nakabassi DEBATA,
anna petimbam tamalolo tä' mapia.
24 Lingka salukatuboanna hupatau DEBATA umpa'tantui,
dadi, la maakam ia susi hupatau la muissam lingka salukatuboanna?
25 Umpaalai tau ulä kale ke masimpanni tau la tidom-tidom pudu' lako DEBATA,
anna mane manosso tau pole' pa'ibundianna.
26 Tomahaja keaka' uhhisi lao to tameada',
anna napalelu'i legenna pallullu' gandum.
27 Penabanna hupatau mendadi balloNa DEBATA,
napoballo umpahessa unä' penabanna hupatau.
28 Pangkaha' pa'kamase takattu tintim tamondo' sahuham anna kamanontongam ungkambi' tomahaja,
anna pangkaha' pa'kamase napake ussamba' umpasukum okkosam kahajaanna.
29 Kamatohoanna änä' gassim nasuhum dikapilla'i,
anna ubanna tomatua nasuhum dipa'kasallei.
30 Pesämbä' mala umpa'dei gau' kadake,
anna pesämbä' ube umpapiai tanangam penaba.