19
Aham to mase-mase sapo' malolo lingka salukatuboanna,anna la dähhi' pudu' to maho polepi.
2 Kamohäeam tä' siba'ba' kapaissangam tä' mapia;
ma'sahha' takehubä' pembuda sala' lao.
3 Kamahoanna hupatau umbaba bulinni,
sapo' DEBATA hi nasosso.
4 To makaka ia tuttuam buda solana,
sapo' to mase-mase ia nasipellei-pellei solana.
5 Sa'bi tatappa' inna tä' sia la lappa' dio mai pa'tahungkungam,
anna to umpobibi tula' tatappa' saditahungkunnam ia.
6 Buda tau muala penabanna to matutu,
ingganna tau maelo' sangkalamma' to bassa' ma'pebeem.
7 To mase-mase nakabassi asam solasubunna,
senga'pa ia sangkalamma'na, napellei asam lao.
Naula' siapi mengkaala,
sapo' umba opa la nalambi'.
8 Menna-menna undaka' kakeakasam, ungkaha'i anna ungkamasei kalena;
menna-menna muanti manda' untobe matoto' kamanähängam, ullolongam hongko'.
9 Sa'bi tatappa' inna tä' sia la lappa' dio mai pa'tahungkungam,
anna to umpobibi tula' tatappa' la ullambi' katilakaam.
10 Tä' sipäto' to maho la bosa' katuboanna,
dapaka ia mesa sabua' la umpahe' to kasalle.
11 Kakeakasam umpaponno sa'baha' mesa tau,
anna dipa'kasallei aka nabela muamma' kasalaam.
12 Aha'na tomahaja anggasanna pa'ehhenna singa kabahanianna,
sapo' kamapiaam penabanna sihhapam langullo umbossi'i humpu'.
13 Änä' to maho umpasuleam katilakaam ambena,
anna baine pa'mämmängam susi uham mentalodo.
14 Banua sola kulle pa'mana'na tomatua,
sapo' baine keaka' ia pa'mana' DEBATA.
15 To busungam angga mamma'na napakahua,
anna to makuttu la nalambi' kakobeam.
16 Menna-menna muanti manda' untobe matoto' paondom ungkaha'i sungnga'na,
sapo' menna-menna umpa'bahinni'i, la mate ia.
17 Menna-menna uhhäntängam bua to mase-mase, umpatondoi DEBATA;
Ia la naongei buttu pakkesullena.
18 Sämbä'i änä'mu sumala wattunnapi,
ianaanna tä'i, iam tia isanga umpemuluam katilakaam.
19 To pa'keaha' la nalambi' pa'dallena,
maka' la umpamoloi, la tuttuam tama kakajuanna pa'keaha'na.
20 Patanannii talinga petundam pepakilalaam anna pehingngiiko pepanännä',
anna mendadiko to keaka' allo di dako'na.
21 Buda pattuju penabanna hupatau,
sapo' DEBATA umpa'tantui kasulelakoanna.
22 Pangkaha' pa'kamase sola kamanontongam dipemmitai lako mesa tau;
aham to mase-mase anna la mesa to si ma'tula' tatappa'.
23 Mengkahea' längäm Puang Allataala ullolongam katuboam,
lambi' happa' mamma'na puli bengi, tatikkedu' tatigiam.
24 To busungam la mehhaku' mandam dokko pihim,
sapo' moi messimpo nakapahhisam toi.
25 Sämbä'i to patelle, anna mala keaka' to saidi' kapaissanganna;
tappakadai to kepikkiham, anna mala tuttuam buda kapaissanganna.
26 Änä' to muala tangngelo'na kullena ambena anna ussua lao indona,
umpakasihi' kalena anna umbosii sanganna.
27 O änä'ku, ianaanna tä'i muaku si umpehingngii pepanännä',
tä' mala tala umpelleiko ulalam diona kapaissangam.
28 Sa'bi tatappa' umpa'pa'de undu' lollä,
pudu'na to tameada' muande bo'bo' kakadakeam.
29 Tokam pa'tahungkungam lako to mantelle,
anna pesämbä' la dipaabanniam boko'na to maho.