Mufaano wa faro ya Iburahimu
4
1 D̯ubva hwambedze dzuu ya bibi jwehu Iburahimu? Muungu kamuhwaadze kuwa muhachi usoni kwakwe? 2 T̯ambere Muungu andeewa kamuhwaa Iburahimu kuwa muhachi kwa dzambo ḍya mahendoye mema, ḅasi Iburahimu andeewa na kintu cha kudzivunia. Ela nka saḅaḅu ya kudzivunia usoni kwa Muungu. 3 Koro haya matsoro yamba, “Iburahimu kamuserefat̯a Muungu, nae Muungu kamuhwaa kuwa muntu muhachi.” 4 Muntu eyenahenda kazi anapfegwa maipfo. Na haya maipfoye nkayapfegwe dza kwamba ni nt̯unu, ela anayapfegwa kwa kwamba ni hachiye. 5 Ela kwa Muungu muntu anahwajwa kuwa muhachi kwa dzambo ḍya kumuserefat̯a jeje eyenawayatsia hat̯a wanabvise, na wala nkahwajwe kuwa muhachi kwa dzambo ḍya mahendoye. 6 Hat̯a haju D̯aud̯i kanena dzuu yeḍihiḍi dzambo, epfonena dzuu ya tsekea ya muntu yuḍejwonse jwa Muungu eyenamuhwaa kuwa muhachi pfasipfo kuyowa mahendoye. 7 Kamba,“Wana tsekea iyodze
hawaḍe wa Muungu awayatsiiyeo mazuka yao
na kuziwafutia nabvise zao!
8 Wana tsekea iyodze
hawaḍe wa Ḅwana asiowat̯alia nabvise zao kawii meshi!”
9 D̯ubva ai tsekea ya haju D̯aud̯i aneneeyo, nza Wayahud̯i ḅasi ambu hat̯a wantu wa vyeet̯i vingine? Dzaambia si ya wantu wonse? Hunakaa na kwamba Muungu kamuhwaa Iburahimu kuwa muntu muhachi kwa dzambo ḍya faro eyokuwa nayo. 10 Epfot̯aligwa kuwa muhachi, ewa kamaahinywa ambu ḅaḍo? Humanya ya kwamba Muungu kamuhwaa kuwa muntu muhachi d̯ura, makisa kadzakahinywa nyuma. 11 Iburahimu kahinywa ḅaad̯a ya kwamba Muungu kamuhwaa kuwa muntu muhachi. Kuhinywa kwakwe kwiwa ni alama ya kuyanga kwamba Muungu kamuhwaa kuwa muntu muhachi kwa dzambo ḍya namuna amuserefat̯iyevyo Muungu, ingawa ewa nkadzahinywa. Ndookomu Iburahimu ndiye baba jwa kiruhu jwa hawaḍe wonse wamuhikiziyeo Muungu na wakit̯aligwa kuwa wahachi, ingawa ntawadzahinywa. 12 Na pia ni baba jwa kiruhu jwa hawaḍe wonse wahinyijweo na wakimuhikiza Muungu. Si baba jwao kwa dzambo ḍya kuhinywa, ela ni baba jwao kwa dzambo ḍya kwamba wamuhikiza Muungu dza viviḍe vya baba jwehu Iburahimu amuhikiziyevyo hat̯a kaḅila nkadzahinywa.
13 Muungu ewa kamuahid̯ia Iburahimu na yuvyeejwe kwamba kadzajumumpa huju lumwengu jwonse juwe jwakwe. Iburahimu nkakuiwekejwa hi hii ahad̯i kwa dzambo ḍya kuziuḅa *Sharia hat̯a, ela kaiwekejwa kwa dzambo ewa kamuhikiza Muungu, na Muungu kamuhwaa kuwa muntu muhachi. 14 Koro t̯ambere hawaḍe wa kupata hivi vya Muungu evyonaahid̯i ni hawaḍe weonauḅa Sharia, ḅasi ni kunena kwamba kumuhikiza Muungu ntaku maana, na hat̯a hi ahad̯i ya Muungu ntai faiḍa iḍeyonse. 15 Hi Sharia inawahendeza hawaḍe weonaivunza wakaadhiḅigwa. Ela ikiwa kwamba ntaku sharia, ḅasi ntakuwe na muntu jwa kuadhiḅigwa kwa tsowa ḍya kuvunza sharia.
16 Ndiyo maana kumuhikiza Muungu ndiḍyo dzambo muhimu. Muungu kaihuwekea hi ahad̯iye ḅure, ndookomu ni ahad̯i iyo na uhakika. Hi hii ahad̯i si ya hawaḍe weo na *Sharia t̯u, ela nza hat̯a hawaḍe wasio na Sharia wamuhikiziyeo Muungu dza Iburahimu. Koro Iburahimu ndiye huyu baba jwa wonse weonamuhikiza Muungu. 17 Dza vya matsoro yaneneyevyo yakyamba, Muungu kamwamba Iburahimu, “Nikuhendeza kuwa baba jwa vyeet̯i vinji.” Epfoakiyambijwa haya haya, Iburahimu ewa usoni kwa Muungu na kayahikiza. Huyu ndiye huyu Muungu eyenawafufuya wafu, na hat̯a mambo yasiyodzahendeka akayahwaa dza kwamba yesakuhendeka.
18-19 Hi hiḍe ngera, Iburahimu ewa na chima cha myaka gana. Ela nkakufwa mojo, kagija kumuserefat̯a Muungu t̯u hat̯a ingawa edzimanya kwamba kamaawa jarisa ghogho, na mukaziwe ewa ni nd̯at̯a. Muungu epfomuahid̯i Iburahimu kwamba anawa baba jwa vyeet̯i vinji, na kwamba yuvyeejwe junawa yukuu dza hizi nyoha, Iburahimu kamuserefat̯a Muungu, ingawa dzambo dzaḍyo ḍinaonekana kwamba ntaḍiwezi kuhendeka. Na Iburahimu kadzakawa baba jwa vyeet̯i vinji ḍugha. 20 Iburahimu nkakungiza kajela iḍeyonse kwa hi ahad̯i ya Muungu amuwekeeyo. Ishinu serefano yakwe igija kuwa na nguvu na kamuyaviza shad̯u Muungu, 21 akiwa na uhakika kwamba Muungu ana uwezo wa kuhenda hivi aahid̯iyevyo.
22 Na ndiyo maana Muungu kamuhwaa Iburahimu kuwa muntu muhachi kwa dzambo ḍye faroye eyokuwa nayo. 23 Hivi vyorejwevyo kwamba, “Muungu kamuhwaa Iburahimu kuwa muntu muhachi,” ntavikworegwa kwa dzambo ḍya Iburahimu jeje heket̯u hat̯a, 24 ela vyoregwa kwa dzambo ḍyehu pia. Vinahupfa uhakika wa kwamba hukimuhikiza Muungu, huyu amufufwiiye Ḅwana jwehu Yesu *Kirist̯o kuyawa kwa wafu, ḅasi hat̯a naswi pia Muungu anahuhwaa kuwa wahachi. 25 Ḅwana Yesu kayavigwa apate kufwa kwa dzambo ḍya nabvise zehu, na kafufujwa kuyawa kwa wafu ili naswi huweze kuwa wantu wahachi usoni kwa Muungu.