Injili dza yorejwevyo ni
LUKA
Maana ya Luka oreeyo hichi chuo
1
1 Kwa mutsakwa Tofilo: Wantu wenji waḍema kwora dzuu ya hayaḍe mambo yahendekeeyo kahi yehu. 2 Wora dza hiviḍe husumwiijwevyo ni hawaḍe wayaoneyeo haya mambo yakwakuhendekani hangu ḍabvu. Hawaḍe wayaoneyeo ndiwo wawaḍe wantu wadziyeo wakilalabva haya maagu. 3 Ndookomu Muhilwa Tofilo, kwa dzambo ḍya kwamba niiyachimiza haya mambo yonse urembo hangu yepfoḍabva, na kuwauza wantu weokuwapfo yepfohendeka, niḍiona t̯aro dzema kwora urembo mambo yahendekeeyo. 4 Nikworea hivi ili upate maagu ya hachi dzuu ya kula kintu uyongweezejwecho.Malaika kalalabva kumihigwa kwa Yohana Mut̯opya
5 Ngera za *Herod̯e epfokuwa haju jwa nsi ya Yud̯aya, kwiwapfo *mukohani mumodza eyeakihanwa Zakaria, ayawiye kit̯aro cha Ukohani cha Abiya. Ewa na muke eyeakihanwa Elizabeti, ayawiye yukoo jwa Mukohani mukuu Haroni. 6 Wowii wewa wantu wahachi na wamutsakiza Muungu, wakiuḅa amuri na sharia zonse za Ḅwana. 7 Wewa majarisa, ela ntawakuwa na wana koro Elizabeti ewa nd̯at̯a. 8 Nsiku modza Zakaria ekihenda kazi ya Ukohani, koro iwa maro ya kit̯aro cha Abiya, 9 dza ivyokuwa adha ya wakohani kubiga kura kumutsana huyuḍe jwa kufukiza vumba humu *Hekaluni. Maro imugwiya Zakaria nae kanjia kufukizani vumba humu Hekaluni. 10 Epfoakifukiza hiḍi vumba, huku nze t̯ut̯a ya wantu iwa yakuyombani. 11 Iyo saa malaika jwa Ḅwana kamut̯upukia Zakaria, na kasumama mukono kuyume wa haya *madhabahu ya kufukizia vumba. 12 Zakaria epfomuona, mojo umuḅaika na kanjijwa ni oga. 13 Ela huyu malaika kamwamba, “Zakaria, nkudzoshooge! Muungu kasikia mayombo yako, na mukaziwo Elizabeti kadzakuvyaiya mwanamuyume nawe kudzamuhana Yohana. 14 Wewe na wangine wenji, mudzawa na tsekea iyodze huyu mwana adzepfovyajwa! 15 Yohana kadzawa muntu mukuu usoni kwa Ḅwana. Nkakudzanwa tembo wala kiḍechonse chichonarumisa. Hangu kuvyajwani kwakwe kadzadzazwa na Ruhu Mudheru. 16 Na kadzawahendeza wenji wa wantu wa Isiraeli wamugalie Ḅwana Muungu jwao. 17 Yohana kadzayongowa usoni ya Ḅwana amuelekanyie machiyo yakwe na Ruhu na nguvu dze za Eliya. Kadzawatsanganya wababa na wana wao pfamodza kawii. Kadzawakengeuya wasiomuhikiza Ḅwana kuwa wantu wahachi na kadzawaelekanya wantu t̯ayari kumukaraḅisha Ḅwana.” 18 Zakaria kamuuza huyu malaika kamwamba, “Ni kintu ga cha kunimpa kuhikiza kuvyajwa kwa huyu mwana? Koro ami na mukazangu hujara muno.” 19 Huyu malaika kamwambukuya kamwamba, “Mimi ni Gabrieli niyenasumama usoni kwa Muungu. Kanihuma nikuyeheye haya maagu mema. 20 Ela t̯ayowa, kwa kwamba nkukuhikiza hi ḍaamisa ya hachi nikwambiiyeyo, nawe unawa ḅuḅwi, nkukudzaweza kunena hat̯a yadzepfot̯imia.”
21 Hiḍe t̯ut̯a ya wantu imuinda Zakaria huku wakimamat̯a kwamba chichokumuwekani amuḍe *Hekaluni ni kintu ga. 22 Epfoyawa huku nze, nkakuweza kut̯amuka chuuwo anene nao. Ishinu kanena nao kwa kuwabigia peni. Ndookomu wahambuya kwamba kat̯ongana na dzambo.
23 Maro ya Zakaria ya kuhenda kazi Hekaluni ipfosiya, kauja nyumbani kwakwe. 24 Ntakikuchia kit̯emo kiyeya, Elizabeti mukaza Zakaria kamiha. Kadzifitsa nyumbani myezi mitsano pfasipfo kuyawa nze. 25 Makisa kamba, “Ni t̯ei ga ya Muungu eyonayo kwangu hat̯a anihendeze nipate mwana? Hiḍi ni dzambo ḍya wantu weḍyowakinibalifa naḍyo muno, koro niwa sidzavyaa mwana!”
Malaika kamwambia Maria kwamba anamumiha Yesu
26 Ipfofika mwezi wa handahu wa mimba ya Elizabeti, malaika Gabrieli kahumwa ni Muungu ende mudzi wa Nazareti wiwo nsi ya Galilaya. 27 Humuḍe mudzini kwiwapfo mwanamuke galit̯ama eyeakihanwa Maria. Maria ewa kamanyana na muntu eyeakihanwa Yusufu ayawiye sindo wa haju D̯aud̯i. 28 Malaika akimudzia kamwamba, “Kwa naghea nto muvodhyegwa! Ḅwana ka pfamodza nawe.” 29 Hi kedhya ya malaika imuhusya Maria muno hat̯a kaḍabva kumamat̯a maanaye. 30 Kenge malaika kamwamba, “Nkudzoshooge Maria, koro Muungu katsakizwa nawe. 31 Ndookomu kudzamiha, na kudzavyaa mwanamuyume na sariḍye kudzamuhana Yesu. 32 Kadzawa mukuu na kadzahanwa Mwana jwa Muungu Awee Dzuu. Ḅwana Muungu kadzamumpa uhaju dza wa bibijwe D̯aud̯i. 33 Kadzawa haju jwa wantu wa Isiraeli maishi na uhajuwe ntaukudzasia.” 34 Maria kamwambukuya huyu malaika kamwamba, “Mimi ni mwanamuke galit̯ama. D̯ubva haya haya yanawadze, nami sidzi muyume?” 35 Huyu malaika kamwambukuya kamwamba, “Ruhu Mudheru kadzakusukia, na nguvu za Muungu Awee Dzuu zinakufinikiza dza kivwii. Na huyu mwana adzeyevyajwa anawa mudheru, na anahanwa Mwana jwa Muungu. 36 T̯ayowa, hat̯a mwenziwo Elizabeti ahanijwee nd̯at̯a hi hii saasambi ana mimba ujarisumeani mwakwe. Na hu ni mwezi wakwe wa handahu. 37 Koro kwa Muungu ntaku kisichowezekana.” 38 Ndookomu Maria kamba, “Mimi ni kikitu jwa Ḅwana, nayanihendekeye dza uneneyevyo.” Maria epfokwisa kunena hivyo huyuḍe malaika kagonzowa.
Kedhya ya Maria
39 D̯ubva Maria kanuka na rebvu kwenda mudzi wa mirimani wiwokuwa nsi ya Yud̯aya. 40 Epfofika kanjia nyumbani mwa Zakaria na kamukedhya Elizabeti. 41 Mweedha Elizabeti epfosikia kedhya ya Maria, huyu mwana humu humboni katsumpa. Nae Elizabeti kadzazwa Ruhu Mudheru, 42 na kaḍabva kunena na idzwi kuu kamba, “Muungu kakuvodhya kuchia wake wonse, na huyu mwana udzeyevyaa nae pia kavodhyegwa! 43 Ami ni ga, hat̯a mama jwa Ḅwana jwangu anidzie mimi? 44 Koro nipfosikia kedhya yako t̯u, huyu mwana katsumpa na tsaiko mahumboni mwangu. 45 Tsekea nzako, awe userefat̯ie kwamba haya wambiijweyo ni Ḅwana yadzat̯imia ḍugha!”
Shad̯u ya Maria
46 Maria kanena kamba,
“Mojo wangu unamukuzya Ḅwana,
47 na ruhu yangu itsaika.
Nina tsekea kwa dzambo ḍya Muungu mupfonya jwangu,
48 kwa dzambo ḍya kwamba kanivodhya,
mimi niiye kikituche kachuchu.
Koro hangu hi hii saasambi,
vivyazi vyonse wadzanihana, ‘Muvodhyegwa.’
49 Koro Muungu mwenye nguvu kanihendea makuu,
na jeje nka mwenziwe eyenaingana nae.
50 Nansoye inawa kwao wonse weonamushooga,
hangu kivyazi hat̯a kivyazi.
51 Kahenda mambo makuu na mukonowe,
kawad̯achasa hawaḍe weonadziona
kwa dzambo ḍya haya weyokumamat̯ani myojoni mwao.
52 Kawanuya mahaju wenye nguvu uhajuni mwao,
na kawakuzya hawaḍe weo wachuchu.
53 Weo nzaani kawakusya na mambo mema mema,
na majabva kawayavya mikono mihupfu.
54 Muungu kat̯imiza ḍamanoḍye kwa wabibi zehu,
na kamumpa ugijo Isiraeli muhumisi jwakwe.
55 Kakumbuka nansoye kwa Iburahimu na kivyazi chakwe chonse mumpaka mwiso
dza evyowambia wabibi zehu hangu kae.”
56 Makisa Maria kakaa hafufi myezi mihahu kwa Elizabeti, ndipfo akigala nyumbani kwakwe.
Elizabeti kamuvyaa Yohana Mut̯opya
57 Ipfofika nsiku ya kudzifunguya, Elizabeti kavyaa mwanamuyume. 58 Wantu wa hafufi na wa sindowe wepfopata haya maagu ya kuvyajwa huyu mwana, wonse watsekea nae. Waiona nanso ya Muungu kwakwe. 59 Ipfofika nsiku ya nane hangu kuvyajwani, wantu wadza kumuhinya. Wetsaka kumuhuna sari ḍya babajwe, Zakaria. 60 Ela mamajwe kawambukuya kawamba, “Sivyo! Ni kuhanwa Yohana.” 61 Hawaḍe wantu wamwamba, “Ela ntaku yuḍejwonse sindoni mwenu awee na sari ḍya Yohana!” 62 Makisa wamuuza na vihambwiizo babajwe, wakilacha kumanya atsakiyevyo kumuhana huyu mwana. 63 Ndookomu Zakaria kaḍama kiḅao cha kworea na kora kwamba, “Sariḍye ni Yohana.” Na wonse wamaka. 64 Iyo saa kaḅajwa kanwake, jwiimijwe jufunguka na kaḍabva kumushad̯a Muungu. 65 Wantu weoishi hafufi wonse washooga. Na maagu ya mambo haya yahendekeeyo yad̯achaa midzi iyo mirimani mwa Yud̯aya yonse. 66 Wonse wayasikiiyeo haya wayamamat̯a, wakidziuza wakyamba, “Ayu mwana kadzawadze?” Koro Ḅwana ewa nae.
Shad̯u ya Zakaria
67 Zakaria, babajwe Yohana kadzazwa Ruhu Mudheru na kanena hayaḍe ya Muungu eyotsaka anene. Kamba,
68 “Ḅwana Muungu jwa Isiraeli ashad̯we,
koro kadzia kuhugija swiswi hwiwo wantuwe.
69 Kahuyehea mupfonya eye jangina,
ayawiye nyumba ya D̯aud̯i muhumisi jwakwe.
70 Dza aneneevyo hangu kae kuchiiya na kwa manabii wakwe.
71 Kwamba anahupfonya kuyawana na nyabva wehu,
na wantu wonse wahukeveyeo.
72 Kamba anahuyanga nansoye kwa wabibi zehu,
na anat̯imiza ḍamano ḍyakwe ahendeyeḍyo nao.
73 Kamuyapfia bibi jwehu Iburahimu,
74 kwamba anahupfonya kuyawa kwa nyabva wehu,
na ahupfe kumuhumikia pfasipfo oga wa nyabva wehu.
75 Kanena hivi ili huweze kuishi na Muungu maishi,
na hudziyavye kwakwe kwa kuhenda miroye.
76 Nawe mwanangu,
unahanwa *nabii jwa Muungu Awee Dzuu.
Unamuyongowa Ḅwana
kuimuelekanyia njiaye.
77 Kudzawambia wantuwe kwamba Muungu anawayatsia nabvise zao,
koro ndivyo adzevyowapfonya.
78 Koro Muungu jwehu ni mumpowe na munanso.
Anahuyeheya mupfonya adzeewa dza dzuwa,
ḍiḍyokutsembuzani kwehu.
79 Ḍiwayangaiye wantu wonse,
waringijweo ni kiza cha kufwa,
ili ahuyongowe kwiko machiyo ya naghea.”
80 Ndookomu huyu mwana kakuya na kenjipfa na nguvu za kimwii na za kiruhu. Kakaa yuwandani hat̯a nsiku adzeyoakidzihambwiiza kwa wantu wa Isiraeli na kuwasumwiiya chuuwo cha Ḅwana.