Yesu kat̯aḅiri mambo yadzeyohendeka ngera za mwiso
13
1 Yesu epfoyawa na humuḍe *Hekaluni akwakuchiani, mumodza jwa hawa wanafund̯iwe kamwamba, “Mwaalimu, t̯ayowa namuna ya haya mawe ye Hekalu na mambakoye yaivyo mema na makuu!” 2 Yesu kamwamba, “Gula haya mambako ni mema na ni makuu ḍugha, ela hachi nyakumwambiani, ntakukudzasaa iwe hat̯a modza dzuu ya iwe ḍingine!”3 Ḅaad̯aye Yesu ewa kakaa chihako Murima wa Mizeituni wiwoukiyowana ne Hekalu. Pet̯ero, Yakobo, Yohana na And̯erea wamwendea wakiwa wao heket̯u na wamuuza wamwamba, 4 “Ḅwana, aya mambo uhwambiiyeyo yanahendeka ngera ga? Ni kihambwiizo ga kidzechoyanga kwamba haya haya mambo yamaawa hafufi kuhendeka?”
5 D̯ubva Yesu kawamba, “Manyani muntu atsekudzamwaarya. 6 Koro wenji wadzadzifwariza kudza kwa sari ḍyangu wakyamba, ‘Mimi ndimi huyu *Masiya.’ Nao wadzawaarya wantu wenji muno. 7 Kudzajumuka viha hapfa na hapfaḍe. Vingine vidzajwanigwa hafufi nanywi, na vingine mudzavisikia maagu ḅasi. Ela namutsehuka, koro haya haya ni had̯i yahendeke, kenge si maana ya kwamba mwiso umaafika. 8 Nsi zidzanuka kujwana na nsi zingine, na uhaju udzajwana na uhaju ungine. Kudzawa nzaa na mihehemo ya nsi kuntu garagara. Ela haya haya yonse ni dza ḍabvu t̯u ya tsungu wa kuvyaa.
9 Ela manyani! Koro wantu wadzamugija na kumupfiika magasani, na mudzabigwa malucha *masunagogini. Na kwa dzambo ḍyangu, mudzasit̯akigwa usoni ya mahaju na wat̯awala wangine, nanywi mudzayavya ushuhuḍa dzuu yangu kwao. 10 Na haya *Maagu Mema ni had̯i d̯ura yasumwiijwe hat̯a kwa wantu wa vyeet̯i vingine vyonse humu lumwenguni kaḅila mwiso ntaudzafika. 11 Mudzepfogijwa na mukipfiikwa na nguvu magasani, wala namutsehangaika na mat̯aro kwamba mwendadziheheadze. Hiyo hiyo saa ikifika, nywinywi nenani kiḍechonse mudzechopfegwa kunena ni Muungu. Koro sinywi mudzeowa kunenani, ela adzeewa kunenani ni Ruhu Mudheru. 12 Wantu wadzawaḍawanya wandugu zao wakayagwe, na wavyazi wadzawaḍawanya wana wao wakayagwe. Wana nao wadzawagarukia wavyazi wao na kuwaḍawanya wakayagwe. 13 Na wantu wenji wadzamukeva kwa dzambo ḍyangu. Ela huyuḍe adzeit̯isa hat̯a mwiso, kadzapfonywa.
Kunangwa kwa Yerusalemi
14 Mudzaona kija cha unanzi wa kinyaya kisumama pfantu kisipfomala. (Wewe musomai, imuka maanaye!) Mudzepfokiona, hawaḍe weo ḍyimbo ḍya Yud̯aya nawad̯aramiye mirimani. 15 Huyuḍe awee paani dzuu natsesuka anjie nyumbani akahwae kija kiḍechonse. 16 Na wala muntu awee nkondeni natseuja nyumbani kwendahwaa kotiḍye. 17 Hizo hizo ngera, wake weo waziho na weokwamusani wadzakunta d̯ina muno! 18 Hat̯a yombani kwamba haya haya mambo yatsehendeka ngera ya sika. 19 Koro kudzakudza ngera ya d̯ina nkuu muno isiyodzaonekana hangu kuumbwa kwa lumwengu, na wala ntakukwakudzaonekana d̯ina ingine nkuu dzeyohiyo. 20 T̯ambere Ḅwana nkandezihendeza mfufi hizo hizo nsiku, ntakundeewa jwa kupfona. Ela kwa dzambo ḍya watsanwawe, hizo nsiku kazihendeza mfufi.
21 Ndookomu hiyo hiyo ngera, yuḍejwonse adzeemwamba, ‘T̯ayowani, huyuno *Kirist̯o,’ ambu, ‘Huyuḍe hapfaḍe,’ manyani mutsemuhikiza. 22 Koro kudzat̯upuka manabii wa nsuwe na wantu wadzeodzihana Kirist̯o. Wadzahenda mafara ya kumakisa na kuyanga vihambwiizo garagara, ili t̯ambere indewezekana waweze kuwaarya hawa watsanwa wa Muungu. 23 D̯ubva nywinywi chimizani, haya haya mambo nimayamwambia d̯ura yasidzahendeka.”
Kudza yupfii kwa Mwana jwa Ad̯amu
24 Yesu kagija kunena kamba, “Ela hizi nsiku ze d̯ina nkuu zikisia,
Hiḍi dzuwa ḍinanjia kiza,
na hu mwezi unayatsa kuyangaa.
25 Hizi nyoha zinagwa,
na hizi mbingu zonse zinanjia sukuso.
26 Hapfo ndipfo wantu wonse wadzepfomuona mwana jwa Ad̯amu akidza na nguvu na marembo makuu mawinguni. 27 Kadzawahuma malaikawe, nao wadzawat̯ut̯aisa watsanwa wakwe wonse kuyawa mpembe zonse za lumwengu.”
28 Makisa Yesu kawasumwiiya inganyo kawamba, “Dziyongweezeni kuyawana na muhi wa mutini. Mwipfonauona uḅaa magomba manana, munakwamba ngera ya dzuwa imaafika. 29 Dza vivyo, mudzepfoyaona haya mambo nimwambiiyeyo yamaḍabva kuhendeka, ḅasi ni mumanye kwamba Mwana jwa Ad̯amu kamaawa muḍyangoni. 30 Hachi nyakumwambiani, hichi hichi kivyazia ntakinasia chonse kaḅila haya haya yonse nimwambiiyeyo ntayadzahendeka. 31 Mbingu na nsi vinasia, ela vyuuwo vyangu ntavinasia meshi.”
32 Yesu kagija kunena kamba, “Ela ntaku muntu yuḍejwonse aimanyiye hiyo hiyo nsiku wala saa. Hat̯a hawa malaika na huyu Mwana, nao pia ntawaidzi. Koro aimanyiye hiyo hiyo nsiku ni Baba jeje heket̯u.”
Wani matso
33 Yesu kawamba wanafund̯iwe, “Ndookomu nichokumwambiani ni kwamba, chimizani na muwe matso, koro ntamudzi kwamba hiyo hiyo ngera inakudza ari! 34 Kudza kwa Mwana jwa Ad̯amu kunaweza kuinganywa na muntu anukiye nyumbani akinjia charoni. Ela asidzanuka, kamuḍama kula muhendakazijwe dzuu ye kazi eyonamala kuhenda na kamuamuru huyu mwamia muḍyango awe matso. 35 Ndookomu nyakumwambiani mumire, koro ntamudzi kwamba ayu mwenye nyumba anagala saa ga. Ntamudzi kwamba anakudza kioro ambu siku kahi. Na wala ntamudzi kwamba anakudza bworu ya magura ambu nsi kucha. 36 Adzepfokudza ḅwikira, manyani atsekudzamut̯onga mwakuyaani. 37 Nichokumwambiani nywinywi ndicho nichokwambiani kula muntu, ya kwamba muwe matso.”