सेवक त सतसंग जे
5
1 ए ट्यारेओ! अउं अपफ सतसंगे यक स्याणा भो त यीशु मसीहे दुख सीढ़णे उगाह असा। होर जपल से सुआ इज्जत जोई वापिस एईयाल त अउं बि तसे हेस्सेदार भुन्ता। अभेईं अउं तुसी सतसंगे पुराणे सेवकी जे ई लिखता। 2 तुस परमेश्वरे तेस सतसंगे, जेसे जिम्मेबारी तुसी मेओ असी, तसे सुसुर देखभाल करे। ई केसेरी दबाव अन्तर एई कइ ना करे, पर परमेश्वरे इच्छाई हेसाब जुए खुश भोई कइ करे। होर बुरी कमेई लिए न, बल्कि अपु मन लाई कइ करे। 3 तेन्हि पुठ अपु हक जताई कइ ना, पर सतसंग जे यक नमूना बण कइ करे। 4 जपल बोडा पुहाल, मतलब मसीह प्रकट भोल, त तुसी सुआ इज्जते बाड़ा मुकुट मेता, जेसे चमक कदी ना मुकती।5 इहांणि, ए जवानों! तुस बि सतसंगे स्याणी के वश अन्तर बिशे। पर तुस सोब के सोब होरी केईआं अपफ जे घट समझे, किस कि धरमे कताब अन्तर लिखो असु कि
“परमेश्वर घमण्डी के विरोध कता।
पर जे अपफ जे घट समझते, तेन्हि पुठ दाह दया कता।”a
6 तोउं त, परमेश्वरे ताकती हथ पड्डे अपफ जे घटाण दिए, ताकि से तुसी ठीक टेम पुठ खड़ करियाल। 7 अपु सोब चिन्ता तसे हवाले करे, किस कि से तुं ख्याल रखता। 8 समोझि कइ बिशे, त चौकाने रिहे, किस कि तुं दुश्माण शैतान गरजते शेरे ईं तोपता रेहन्ता कि केस चीर कइ खऊं। 9 विश्वास अन्तर मजबूत भोई कइ, होर ई जाण कइ तसे सामणा करे कि मतोके सोब प्रभु चेले बि तुं ईं दुख सेहण लगो असे। 10 परमेश्वर सोब दाह दयाई करणे बाड़ा भो, त तेन तुस मसीहे बेलि अपु अमर सुखे हेस्सेदार बणुण जे भिहो असे। तुं थोड़ी टेमे लिए दुख सीढ़ण केआं पता, से अपफ तुसी सिद्ध, विश्वास अन्तर पक्का त ताकतवर बणान्ता। 11 तसे राज जुग जुग तकर चलते रिहे। आमीन।
अखिरि बोक
12 मेईं ई दुई चोउर अखर सिलवानुस केईआं लिखाए। अउं तस यकीन लेएक भाई समझता। त मेईं तुसी हिम्मत देण जे त ई बताण जे लिखो असु कि तुस जे दुख सीढ़ते, तेस पुठ सच्चे परमेश्वरे दाह असी। त तुस परमेश्वरे दाह अन्तर पक्के भोई बिशे। 13 बेबीलोन शेहर अन्तर जे सतसंग असा, तठियाणि तुं ईं चुणो मेह्णु तुसी जे नमस्ते कते त मरकुस बि जे में ट्यारा कुआ ईं असा तुसी जे नमस्ते कता।
14 गड़ामेड़ा कर कइ यक होरी जुए मीण दिए। जे सोब मसीह पुठ विश्वास कते, तुसी सोबी जे शान्ति मेती रिहे।