परमेश्वर जे जीण
4
1 किस कि जे जिसम अन्तर दुख सीढ़ता, से पाप करणे इच्छाई केआं दूर बिश्ता। तोउं त, जीं मसीहे जिसम अन्तर भोई कइ दुख तकलीफ सीढ़े, तीं तुस बि तसे ई दुख सीढ़ण जे मझीन कशि बिशे, 2 ताकि तुस मतोक अन्तर तुं बचो जिन्दगी अपु जिसमे इच्छाई हेसाब जुए ना, बल्कि परमेश्वरे इच्छाई हेसाब जुए जीएल। 3 किस कि तुसी परमेश्वर ना मानणे बाड़े मेह्णु के ईं अपु इच्छाई हेसाब जुए जीण अन्तर जीं कि बुगड़ो मत अन्तर, बुरी इच्छाई अन्तर, प्याकड़पन अन्तर, मौज मस्ती अन्तर, मस्त मलंग त कुस्तुरी मुर्तिपुजा कर कइ पेहलाई सुआ टेम बरबाद कइ छो असा। 4 से त अभेईं हैरान भोई गो असे कि तुस तेन्के मस्त मलंग भोई कइ जीण अन्तर सात न देन्ते। तोउं त से तुसी जे गुरहाज कते। 5 पर तेन्हि परमेश्वरे अगर अपु हेसाब देण एन्ता, जे जीन्ते त मरो तेन्के पंची करण जे तेयार असा। 6 इस बझई जुए मरो तेन्हि बुचा बि खुश खबरी तोउं प्रचार भुआ, ताकि होरे मेह्णु के ईं पंची भोई कइ जिसम अन्तर तेन्हि सज्जा मेती, पर आत्मा अन्तर से परमेश्वरे मुताविक जीन्ते रेहियेल।परमेश्वरे खरे भण्डारी
7 सोबी चीजी के मुकुण नीड़ु एई गो असु। तोउं त, खबरदार भोई बिशे त कशि बिशे, ताकि तुस प्रार्थना कइ बटियेल। 8 सोबी केआं खरा कम ईं असा कि यक होरी जोई तीं परेम करे, किस कि परेम सुआ पाप ढक छता। 9 बजन चर चराते यक होरी सेवा पाणि करे। 10 हर यक जेईं जीं जीं वरदान मेओ असा, से तस परमेश्वरे दाह दयाई खरे भण्डारी के ईं यक होरी सेवा करण जे ला। 11 अगर तुसी बोक करणे वरदान मेओ असा त परमेश्वरे वचने प्रचार करे। अगर तुसी होरी के सेवा करणे वरदान मेओ असा त परमेश्वर दुतो ताकते बेलि सेवा करे, ताकि सोबी बोकी अन्तर यीशु मसीह बेलिए, परमेश्वर सुआ इज्जत मेईंयेल। सुआ इज्जत त सम्हाई अधिकार जुग जुगे लिए तसेरी भो। आमीन।
मसीहे दुख अन्तर हेस्सेदार बणुण
12 ए ट्यारेओ! तुसी परखणे लिए आगी ईं जे दुख तुसी पुठ लगो असा, एस ईं समझ कइ हैरान न भुए कि कोई अनोखी बोक तुसी पुठ भुण लगो असी। 13 पर जीं मसीहे दुख सीढ़ो थिआ, तीं तुस बि दुख सीढ़ते। त तुस खुश भुए, ताकि जपल से अपु सुआ इज्जत जुए एन्ता त तुस ती खुश भोई घेन्ते। 14 फि अगर मसीह पुठ विश्वास करणे बझई जोई मेह्णु तुं बेज्जती कते त तुस धन्य असे, किस कि सुआ ताकती बाड़ी आत्मा, जे परमेश्वरे आत्मा भो, तुसी पुठ शोलियार कती। 15 पर तुसी बुचा कोई बि मेह्णु मारण, चोरुण, गलत कम करणे त खुठि देणे बझई जोई दुख न मेओ लौता। 16 पर मसीहे भुणे बझई जोई अगर तुसी दुख मेईंयाल, त लज न करे। पर मसीहे भुणे बझई जुए परमेश्वरे गुणगान करे। 17 किस कि पंची करणे टेम एई गो असा। शुरुवात परमेश्वरे मेह्णु केईआं भुन्ति। होर अगर परमेश्वरे पंची असी केईआं शुरुवात भुन्ति त जे परमेश्वरे खुश खबरी ना मानते, अखिर अन्तर तेन्के की हाल भोल? 18 होर जीं धरमे कताब अन्तर लिखो असु कि
“अगर धर्मी मेह्णु बड़े मुश्किल जोई बचाल,
त जे भक्ति न कते त होर पापी असे, तेन्के ठेकाणा कोठि भोल?”a
19 तोउं त, जे परमेश्वरे इच्छाई हेसाब जुए दुख सीढ़ते, से भलाई कते रिहे त अपु अपु प्राण यकीन करणे लेएक सृष्टिकर्ता जिम्म कइ छड़े।