याकूबे
लिखो चिट्ठि
नमस्कार
1
1 ए में ट्यारे यहूदी मेह्णुओa, जे पूरी धरती अन्तर टडिए असे। अउं परमेश्वरे त प्रभु यीशु मसीहे नौखर याकूब, तुसी सम्हाई जे नमस्ते कता।bविश्वास त बुद्धि
2 में भाई त भेणिओं! जपल तुस होरे होरे परेशानी के बेलि परखिन्ते त तस तुस खुश भुणे बोक समझे। 3 किस कि तुसी पता असा कि तुं विश्वासे परीक्षाई बेलि तुं सीढ़णे ताकत बधती। 4 त इस सीढ़णे ताकत हउ बि बधण दिए, किस कि जपल सीढ़णे ताकत रज्जि बधती, त तुस बगैर कोई दोषे पक्के भोई घेन्ते। होर तुसी अन्तर कोई घटी ना भुन्ति।
5 पर अगर तुसी अन्तर बुद्धि घट असी त तेस दानी परमेश्वर केआं मगीण दिए, जे सोबी कें धे दिल खोल कइ देन्ता। से भलेमास भोई कइ तुन्धे दी छता। 6 पर जपल तुस मगते, त पूरे विश्वास जुए मगीण दिए त कोई शक ना करे; किस कि जे शक कता, से समन्दर पुठ ब्यार बेलि उछड़ो त चलो छल्हारी के ईं असा। 7 तेन्हि मेह्णु परमेश्वर केआं कुछ पाणे उम्मीद ना रखीण। 8 किस कि से मेह्णु दुमने असे त अपु सोब कम टिग कइ ना कते।
गरीब त अमीर
9 गरीब विश्वासी मेह्णु ठुक लोओ लौती किस कि परमेश्वरे से बोडे किओ असे। 10 त अमीर विश्वासी मेह्णु इस पुठ ठुक लोओ लौती कि परमेश्वर से नीच किओ असे किस कि से घासे फियुड़े ईं खतम भोई घेन्ते। 11 किस कि जीं दिस निसणे पता, तेज धुपे बेलि घास शुख घेन्तु, फियुड़ भीं झड़ते त तेन्के रंग खतम भोई घेन्ता, तीं अमीर मेह्णु बि अपु धन कमान्ते कमान्ते खतम भोई घेन्ते।
परीक्षा त फल
12 धन्य असा से मनख, जे परीक्षाई अन्तर शान्त बिश्ता, किस कि जपल से परीक्षाई अन्तरा उतीर घेन्ता त से तेस जीवन देणे बाड़ी मुकुट डबता, जे परमेश्वरे अपफ जोई परेम करणे बाड़ी धे देणे जुबान दुतो असी। 13 जपल केसे परीक्षा भुण लगो भोल त तेन ई ना बोलो लौतु कि “परमेश्वर में परीक्षा नेण लगो असा” किस कि बुराई जुए ना परमेश्वर परखिन्ता, होर ना से अपफ केसे परीक्षाई अन्तर छता। 14 पर मेह्णु अपु बुरी इच्छा अन्तर फस कइ परीक्षा अन्तर पड़ता। 15 जपल बुरी इच्छा मन अन्तर घेन्ति त से पाप जमाणती, होर पाप बध कइ मौत आणता।
16 ए में ट्यारे भाई त भेणिओं! तुस धोखा ना खे। 17 किस कि हर यक दान जे खरा त नरदोष असा परमपिता परमेश्वर केईआं एन्ता। तेन दिस, जोसुण त तारे बणो असे। से परमेश्वर ना कदी बदलिन्ताc होर ना केसेरी उडारे बेलिए अन्हारिन्ता। 18 तसे इ इच्छा भुई कि अस सच्चे वचन पुठ विश्वास कर कइ दुबारी जमियेल, ताकि तसे बणाओ सम्हाई पुठ अस पेहला फल भुई बटियेल।
वचन शुणुण त मनुण
19 में ट्यारे भाई त भेणिओं! ई बोक तुसी समझुण लौती कि हर यक मेह्णु शुणुण जे तेयार बिशे त सोच समझ कइ बोलीण दिए त झट लेहेर ना किढ़े। 20 किस कि लेहरी कइ मेह्णु परमेश्वरे धरमे कम कइ ना बटते। 21 तोउं त, हर किस्मे गन्दे कम त दुष्ट विचार जे बधते घेन्ते, तेन्हि छड़ दिए। होर अपफ घटाई कइ तुसी शिचालो तेस वचन मनीण दिए जे तुं प्राण बचाई बटता। 22 तुस सद से वचन शुणणे बाड़े न बणे जे अपफ धोखा देन्ते। बल्कि तुस वचन मान कइ तेस हेसाब जुए जीणे बाड़े बि बणे। 23 किस कि वचन जे सद शुणता, पर तस मान कइ जीन्ता नओं, से तेस मेह्णु ईं असा जे शिशे अन्तर अपु शकल हेरता। 24 किस कि से अपफ त हेर कइ घेई घेन्ता, पर से झठ बिसरी घेन्ता कि से कीं थिआ। 25 पर जे मेह्णु अजाद कराणे बाड़ी, तेस खरे नियम पुठ ध्यान देन्ता, त तस मान कइ जीन्ता, तस हर कम अन्तर अशुश मेती, किस कि से सद शुण कइ बिसरीन्ता नओं, बल्कि तिहांणि कम बि कता।
सच्चे धरमे कम