पतरसे
लिखो पेहली चिट्ठि
अस कोई बि महापुरुषे खास दोस्ती के बोक शुणुण जे त लेख पढ़ुण जे ती पसंद कते। किस कि तेन्हि तेन्के नीजी जिन्दगी त कमी के बारे ठीक ठाक पता भुन्ता। होर तेन्हि महापुरुषे बारे तेन्के मत सुआ खास भुन्ता। महापुरुषे कोउं बोक अब्बल लगती, होर कोउं बोक खरी ना लगती, ई शुणुण जे मेह्णु तेन्के पता पता दौड़ते।
बाइबल अन्तर यीशु चेली बुच शमौन पतरस सोबी केआं खास थिआ। तेन यीशु किओ चमत्कारे कम जीं कि सुआ मछली टाण, अन्हे सारेरण, कोढ़ी ठीक करण, मरो तेन्हि दुबारी जीआण, पाण पुठ हंटण त दुष्ट आत्माई नशाण बगैरा बगैरा अपु टीरे बेलि काओ थिउ। सद एतुरु ना, तेन यीशु परमेश्वरे लंघो “मसीह” पिछाणा, पर पता से पिछाणण केआं मुकीर गा। तोउं बि पता यीशु तसे धे अपु चेली साह्मण जे निआंग दिती। यीशु स्वर्ग घेण केआं पता, शुची आत्माई जुए भरो शमौन पतरसे प्रचार करणे बेलि हजार हजार मेह्णु यीशु मसीह पुठ विश्वास किआ। पतरसे बि सुआ चमत्कारे कम किए। तेन सतसंगे यक स्याणा त मुखिया बण कइ विश्वासी यीशु मसीहे बारे शिचालताथ।
पतरस लगभग ईसवी 64-69 बुछ ई चिट्ठि तेन्हि गैर यहूदी विश्वासी जे लिखो थिउ, जे होरे होरे जगाई बिशतेथ। चले, इस चिट्ठि पढ़ कइ यीशु मसीहे खास चेला शमौन पतरस विश्वासी भाई भेणि जे की की शिचालता, तसे बारे पता लान्ते।
विषय सूची
नमस्कार (1:1-2)
जीन्ती उम्मीद (1:3-12)
शुची जिन्दगी जीण (1:13-25)
जीन्ता घोड़ (2:1-10)
विश्वासी मेह्णु के जीण (2:11-25)
धाणि त जुएली (3:1-7)
भलाई करण जे दुख सीढ़ण (3:8-22)
परमेश्वर जे जीण (4:1-6)
परमेश्वरे खरे भण्डारी (4:7-19)
सेवक त सतसंग जे (5:1-11)
अखिरि बोके (5:12-14)